2013年4月9日星期二

The Cake & Bake Show 2013 Manchester (2013年4月6日)


剛過去既星期六(4月6日),
我同Mr.T去咗Manchester既The Cake & Bake Show 2013!


3月尾從網上得知4月5日至7日一連三日,
Manchester Central依個烘焙展,即時決定要去!
因為蘇格蘭好似無見過種似既烘焙展(演唱會就多!!
),
但南下Manchester, Birmingham, London.......
就年年都有幾次依類cake show~

我 + Mr.T預計星期日應該最多人,
所以我地決定去星期六果日~
好彩遲遲都未訂票........

因為賢妻星期四無意中喺網上搵到6折票喎!
(原價£14.50 each; 6折只需£8.70~ )
是日天公造美,全日都好好太陽 + 藍天白雲, 精神特別好,心情特別靚呢!


地點係Manchester Central,由市中心步行約10分鐘就到,
非常方便!

之前網上訂咗票,入去後第一時間去排隊攞票!會場算大,時間尚早,人流未算太多,好快就攞到票入場嘞~


我未去過依類烘焙展,但睇電視見過美國有類似既大型展覽,
展品無論專業或業餘水準都奇高! 堪稱鬼斧神工~
以為依個cake show都會有"好勁"既展品,
但老實講,真係有點失望........


唔敢話人地整得唔好整得差,
不過可能之前受電視睇到既美國cake show影響到期望太高,
相比之下,Manchester依個cake show既展品真係太平平無奇!




鞋比手袋造得好,因為鞋既像真度更高~




依咋金碧輝煌既cupcakes造型好華麗!


雖然我覺得依個cupcake造型有d怪,
不過就好欣賞依隻金象既手工,好精細~ (應該係朱古力來! )


之前喺FB見過依個同實物一樣大細既Mulberry Bayswater Bag蛋糕~


終於可以近距離一睹佢既真身!
雖然有部份細微地方做得唔夠仔細,
不過像真度已經有95%~


依個係我全場最鍾意既蛋糕!
雖然果咋似用紙剪出來既"白色草"有點老土,
但糖藝造出來既透明玻璃波波感覺好夢幻啊~


色彩繽紛唔同造型既cake pops......不過見到都覺得勁甜!



糖花展覽就非常精彩! 望落去似真花多過係糖花呢~


依札粉紅玫瑰簡直出神入化!!


由10.30am行到大約差不多1pm,
因為是日無食早餐,開始肚餓手軟腳軟~~~
於是喺入口比職員吸個印仔喺手背,
出去食完lunch再返來.........

喺Manchester搵野食真係好難!
(幾年前第一次去Manchester已經有咁既感覺!!)
周街最多就係唔想食既連鎖餐廳 - 因為全部Glasgow都有!!!


於是一直行返去巴士站附近既韓國餐廳 - BAEKDU~
之前已幫襯過好幾次,老闆係一位非常友善既韓國人,
食物正宗又好味!


叫咗韓式紫菜飯卷; Mr.T要辣牛肉湯飯;
我就要辣海鮮豆腐湯飯,美味既一餐~


食完lunch有返氣力,
慢慢散步返去Manchester Central繼續睇cake show!



途經Albert Square見到個奥運金郵筒~




晏晝返入會場,比朝早少咗一大半人!



我認為cake show最勁既展品 - 巨型薑餅屋...連花園!
成間屋係用真既薑餅 + 糖霜造出來.......



連地下小石路 + 花花都係糖霜薑餅.......


連依個真人大小size既金髮小朋友都係食得既,
不過應該係翻糖蛋糕來!


現場除咗有專業展品之外,
仲有大咋比賽入圍既業餘得獎作品~
不過唔好意思.......我真係覺得唔靚囉!

所以只係咁二立吓,連相都唔想影!!

有好多現場示範技巧~
其實cake show仲可以另外買票上堂專人授課,
不過一直以來無論煮野食或烘焙我都係自學,
我唔想 + 覺得無必要去打破依個傳統! 嘻嘻~~~~


Cake show又點可以無得shopping呢?
我當然有買野啦! 不過下一篇先比大家睇吓我有咩戰利品~


我專攻烘焙用具,但現場亦有好多食得落肚既野........


黑白朱古力造既pizza, 肉醬意粉 + 炸魚薯條,
造型係幾得意,不過成份都係朱古力......甜死!!!





周圍行吓睇吓買吓......行到4點零鐘腳痛走人!


我 + Mr.T一直都覺得Manchester係一個好悶既地方!
喺市中心周圍逛咗一陣已經頂唔順(因為無乜地方好行!!),
5點零鐘就去咗食超早癲拿........

Red Hot食buffet啦! 之前食過又平又多選擇好抵食,
可以慢慢食揼吓波鐘~~~~~


今次來Manchester睇cake show無渣車,
因為未去過Manchester Central怕會多人難泊車~
我地又覺得Manchester好悶,無唔打算過夜,
所以搭巴士即日去即日返!

不過食完癲拿仲有個幾鐘頭先夠鐘搭車........

去咗車站附近既Crown Plaza Hotel歎咗杯香濃earl grey~







Photobucket

13 則留言:

  1. 真係同us 的CAKE SHOW差好鬼遠
    [版主回覆04/09/2013 22:09:17]真係差好遠! 無論規模、展品或參賽作品都相差好遠~ 我睇電視美國連業餘參賽者作品都好過依度專業果d! 但相對評審要求都高好多好多......

    回覆刪除
  2. I like to watch U.S. cake TV shows... some of them are really pretty and creative!
    [版主回覆04/11/2013 06:40:42]yes~ they are really amazing!

    回覆刪除
  3. sweet sweet 啊
    [版主回覆04/11/2013 06:38:55]

    回覆刪除
  4. 糖花真係好似呀
    [版主回覆04/11/2013 06:38:23]如果唔知係糖花的話仲會以為係真野來!

    回覆刪除
  5. 我都覺得d透明波波同d花真係好靚,唔講都唔知係食得架!!
    [版主回覆04/11/2013 22:13:33]糖波波只展出無示範,我都唔知係點整! 不過真係好靚~
    [ok回覆04/11/2013 17:07:16]贊成呀!我基本上唔太識整甜品唔太明白點可以令到d波波可以透明成咁?初時諗可能係用白糖,但d白糖煮完係會變啡黑色又唔會變透明囉,而唔煮過又唔會溶成咁
    d花就覺得它造型神似加上調色的技巧好勁!!
    [版主回覆04/11/2013 06:37:37]依兩樣真係好靚~ 不過個人覺得亦係技巧最高!

    回覆刪除
  6. 你哋好恩愛啊!
    兩個都好幸福。
    [版主回覆04/11/2013 06:35:41]Thank you Valerie!

    回覆刪除
  7. 我鍾意個巨型薑餅屋...連花園!

    [版主回覆04/11/2013 06:35:24]果個係全場最勁既展品!

    回覆刪除
  8. 個CAKE SHOW普通左少少,不過都好多謝你的現場報導
    你去果段時間係咪復活節?我上年又係復活節去Manchester,條街四圍都靜英英,又難搵野食,曼聯場波又悶....去過Manchester一次我好夠哂皮喇
    [版主回覆04/11/2013 06:34:52]雖然展品有d失望,不過shopping 補返數! 英國好少烘焙用品店,大部份都係網上店,而且用具唔係間間都一齊全,依類cake show一次過集中哂唔同店,所以都值得去既!

    唔係復活節,係啱啱過咗果個星期六呀! 今年復活節早咗3月尾嘛~ 南下既復活節的確好鬼悶,尤其係曼城......

    回覆刪除
  9. 我想最靚個D你都影低咗,水準就好似你講咁低少少。個MULBERRY最像真,玫瑰花都唔錯,CAKE POP就弱少少,不過最弱都係個些幾層的糖皮蛋糕,香港有些餅店都整得好過佢,之前電視有個澳洲節目說間餅店的真人SHOW之類,個D整成溜冰鞋、航空母艦個些好厲害。
    你上次整個比卡超CAKE POP都靚過今次的展品!我想如果齋看蛋糕展品,應該有D失望。不過,買下用具及食下嘢應該補償番。哈哈,唔知點解見到個小童蛋糕,我會想起細個去大坑胡文虎見到的公仔。
    [版主回覆04/11/2013 22:11:31]香港人一向乜都係功利主義行先.....
    [NatIvan回覆04/11/2013 15:32:38]十八層地獄真係好正。我想小時候去過三至四次左右,因為我們住係港島,家人差不多兩三個星期就帶我們去維園玩,胡文虎個花園而家想起,真係一個AMAZING的設計!哈哈!就算而家保育個景賢里都跟胡文虎差一大截,因為個別墅入面的花園又好多勸世及警世的公仔及雕塑設計,如果在外國,我想係會保留,不過,在香港,真係⋯⋯好難!舊時好多外國遊客去看,不過,細個時當然不懂欣賞。但我記得細個時去看,D公仔都有點風霜,當然大宅的主人要維護真的一點也不簡單,也難怪他們要賣出去再起樓!想番起,都有點懷念!
    [版主回覆04/11/2013 06:29:39]係呀~ 我平時成日睇美國cake show電視節目,以為今次依個水準會差唔多...結果期望越大失望越大!

    妳講起虎豹別墅...我好後悔以前無去睇過十八層地獄! 而家已經無機會睇咯.....

    回覆刪除
  10. WA!!對鞋真係好靚
    [版主回覆04/11/2013 22:08:40]我期望展品水準高好多.....雖然展品麻麻,不過shopping唔錯~

    回覆刪除
  11. cake本來是西方發明既,但他們整到甜到漏又唔夠松。所以我都好少吃。返到香港,就吃好多補數。我都唔知有咁既show.不過我baking真系嘛嘛。學過朋友教落點整好鬆好靚的cake,我整佐好多次都失敗,可能溫度掌握唔到,只能整鬼佬板既cake.
    [版主回覆04/14/2013 07:45:18]洋人蛋糕甜 + 較實唔鬆係有原因架! 洋人生理構造比亞洲人多口水分泌,所以佢地無論蛋糕或麵包都唔似我地亞洲人鍾意果種鬆、軟、輕,比較重口味~ 亦因為咁,我地亞洲人唔習慣西洋麵包糕餅味道 + 口感!

    其實baking要掌握溫度好容易! 買個爐溫計就攪掂~

    回覆刪除
  12. 咁都叫做玩左一日既。
    [版主回覆04/14/2013 07:40:19]我地係好enjoy 呀!

    回覆刪除
  13. Wow nice show...I loved the 巨型薑餅屋連花園, it is amasing! 成間屋made of真既薑餅糖霜造 !?....... And also the 朱古力造既pizza.. Delicious..

    Peggy
    [版主回覆04/25/2013 00:55:33]個show就唔係好nice,不過薑餅屋連花園真係好amazing! 係呀~ 成間屋...磚路...花花...小朋友.....全部都係薑餅造既!!

    回覆刪除

Related Posts Plugin for WordPress, Blogger...