再來頭文字V...and A!

有網友話好掛住我d敗家文!
以下依咋野其實已經敗咗一段時間，
都係時候出文架嘞~
否則我聽日去完烘焙展返來萬一又敗多咋野，
就有排都寫唔完!!

Mr.T之前送咗套22ct 金頭文字V tea set 過我......(網誌)

我: 不如買埋套A咯?

Mr.T: 女人杯來既，我都唔用依d! 我: 我整afternoon tea 時你咪有得用囉!

Mr.T: 妳有幾耐整一次afternoon tea? 一陣我clumsy打爛......
 
得得得~~~ Mr.T最後果句就夠嘞，
即時嚇到我打消買埋22ct 頭文字A既念頭!
我都唔想一套咁靚既杯死喺佢手上!!

唔知最近興頭文字呢?
上星期我一個人行街街.......

比我搵到依隻頭文字coffee mugs~
Mugs 夠哂男人嘞啩!!?! 一人一隻!

攞上手手感唔錯!
感覺比一般coffee mugs 輕薄，原來都係骨瓷來果喎~


想買把好既麵包刀好耐!
見到好多讚陳X記有售既日本製麵包刀好好用，
可惜上次返香港唔記得買，返到來揼咗心口好耐........

雖則切麵包唔一定要用麵包刀，
而且我屋企d刀多到可以租比古惑仔劈友，
不過始終感覺心癢癢.......

咁啱TK Maxx返咗大批孖人麵包刀，就買把來止痕啦!
(未開光! 連盒都拆........未知好唔好用住~ )


好多時有d野本來完全無打算買.......

好似依個減價mini muffin tin 咁，
見到佢想食香港舊式餅店果種迷你牛油蛋糕仔，於是買咗......

仲要買埋啱位既迷你cupcake cases 先開得工!

復活節前見到幾靚幾得意既cupcake cases，
可惜買咗無時間整，出年見啊~~

麵粉篩...其實我本身都有一個，
不過有次整濕咗未乾透我就用來篩麵粉，
從此底部邊緣牢牢結咗一條洗唔甩既乾硬麵粉邊........
DISGUSTING!

平靚正發花癲抹手巾~ 想買多一條，可惜白色只剩一條，藍色就大把........
(遲吓要返去再睇吓有無白色!)

我強推依塊網! 其實依塊網喺平價家品店已經賣咗好幾年，
經常行街都見到，平到無朋友~
因為佢簡陋既外型唔多起眼，我一直當佢透明.......

有一日手痕攞咗塊去比錢(咁都得!!?! )
用來焗薯條、pizza、蒜蓉包........
方便乾手淨腳，唔洗又用焗盆墊住焗架，
焗出來既食物應脆則脆，
而且塊網係軟既，慳位唔阻訂，
用過先知佢係一塊好網來!


林家歐巴桑Gaile早排寄咗d正宗台灣珍珠粉圓過我.......

所以我特別買咗個shaker bottle 準備自製珍珠奶茶~
依個shaker bottle 可以話係我見過英國pound shops，
質料 + 手工都最好既塑膠食具產品!

容量刻度清晰;

仲有埋隔渣器~

我打算買多1個用來調沙律醬汁!!

我唸個個女人屋企都有大咋未開未用既skincare存貨!
我都唔例外...不過我一向只用high street skincare 唔用貴野，
所以我可以買更多!! 哈哈~~~~

蛇毒面霜有抗皺修護 + 美白既功效，
白色水質既精華液非常容易吸收，完全唔油膩~

有防曬效果滋潤日霜，滋潤得來完全唔油，
而且無味道，個人覺得依隻日霜好正!

Balance Active Formula 係英國high street skincare品牌，
第一次用依個牌子，
好驚喜估唔到會搵到適合自己既洋人skincare品牌~

而家用緊既OLAY眼霜就快用哂，今次買依隻NIVEA試吓!


其實我眾多護膚品存貨之中，最多就係handcream!
不過每次搵到自己鍾意既香味都會忍唔住手再買.......

尤其依3枝M&S買1送2...無錯係買1送2!
更加無可能忍到手唔買!!
想買盆野綠化吓個浴室~
不過超市睇來睇去都唔啱心水，
一係唔靚，一係就鬼鬼鼠鼠咁太細盆!

有日去咗屋企附近既B&Q，
哇~~~~~~~ 不得了...鬼火咁靚又多款式又大盆仲好鬼平!
花多眼亂揀過不亦樂乎!!

揀完一大輪，最後買咗prayer plant (左) + peace lily (右)

依棵peace lily大棵過 + 靚過我之前買比Mr.T 放喺office果棵，
於是我叫Mr.T攞依盆大既返office，
細果棵就攞返來屋企放客廳窗台;
盆prayer plant 就放浴室~

依個係Mr.T送比我既! 同系列既Pandora's Box玩咗3星期終於玩哂;
而家玩緊之前玩過但未玩哂既Curious Village;
之後先開始玩依個~

Easter前Glasgow終於都開咗間Forever 21~我發現佢地所有店都好巨型!
三大層仲未有時間行，要擇個日去血拼!!!!