富貴榮華搬新屋 (2011年9月14日)

 依個圓形水晶缸係富貴榮華既"舊屋"~

早在富貴榮華入住之前，已經有過不知幾多手住客......

 富貴榮華最初入住時，仍然用緊舊住客剩低既波子......

 早前我買咗棵水草; 又特登去Strathclyde Park 湖邊執咗咋石仔......

將富貴榮華既居所重新"裝修"，

打造成充滿大自然氣息既風格!

(可惜棵水草太高 - 無論打直或打橫擺，總有一部份會凸出水面!!

)



上星期我如常幫富貴榮華換水~ 不過2日後一個早上......

老公: 咦...Honhon 妳倒瀉水呀?

 我: 無呀......

我行埋去一睇......圍住魚缸周圍既枱布濕咗一大撻圓形水跡

- 好明顯水係來自魚缸!

即時摷返個emergency 膠魚缸出來頂住檔~ 一撥開缸底石春，就睇到缸底打橫有一大條裂痕!!

不過條裂痕究竟係點來? 仍然係一個謎......



舊既唔去，新既唔來~

個缸突然爛咗，正好比機會我又去shopping!

不過奄尖得來要靚又要型既我，唔想要pet shop 果種三尖八角設計死板既魚缸，所以行咗幾日兼去過好多間shop 都搵唔到心水......

 最後無意中比我喺Glasgow Fort TK Maxx 搵到依間"豪宅"比富貴榮華!!

 而家棵水草終於可以打直棟起，唔會凸出水面嘞!

豪宅內籠闊落得來又唔阻地方，唯一缺點只係重咗少少......

新居仲有一個比舊居好好多既地方 - 方便影相!

舊居因為係圓弧形，好難捕捉富貴榮華既動作神態，影到既相大部份都係變哂形......

不過豪宅新居長方形四四正正，逐條影close up 都完全無問題!

富貴榮華真係好鬼得意~

好鍾意幫佢地影相!



>>>>>>>>>>>>>>>>>>>>>>>>>>>>>>>>>>>>>>>>>>>>>

除咗換新屋之外，仲換咗隻新魚糧......

 之前富貴榮華食開依隻魚糧，我喺V媽媽舖頭攞既!

依隻係半浮沉魚糧 - 即係落水後先浮一段時間，再慢慢沉底~

不過我餵親魚，通常魚糧仲係浮既時候，已經比富貴榮華食鬼哂!!

依邊買唔到依隻半浮沉糧......

 所以我買咗依隻試吓，不過依隻原來係沉糧 - 一落水即刻全部沉哂底!

唔知係咪因為富貴榮華食開浮糧...我見到佢地眼甘甘望住魚糧沉底，戇居居咁一粒都無食到!

於是我將魚糧整碎d再餵過，不過都係沉哂底!!

唸住第二日再買過另一隻魚糧比佢地，點知......

 隔咗個零鐘頭，我發現原本沉底既魚糧無鬼哂......

富貴榮華個肚全部脹卜卜!

(噢賣葛~ 我仲以為佢地食唔到沉底魚糧!! )

好彩斷食1日後 + 佢地開大之後，身型終於回復正常~

 24小時內身型可以相差咁遠，你地都真係好誇張啫!

 為免再錯手或有任何其他原因餵多份量，最後我都搵到返依隻半浮沉魚糧~

 另外買咗盒紅蟲乾梅花間竹來餵富貴榮華!

各位有養魚既blog 友請注意~~~~

大家千其唔好因為覺得魚魚食野個樣好得意就不停去餵魚~

因為魚魚係唔知飽既，換句話說 - 你餵幾多比佢地，佢地會照單全收!

魚魚應該隔日，甚至每隔2日先餵一次; 而且每次餵好少既份量已經足夠(當然要視乎返你養緊魚既種類 + 數目啦! )

咁魚魚食得太飽會點呢? 有2個可能性......

(1) 釘蓋;

(2) 魚魚食得太飽未消化得哂 + 未來得切開大，魚糧就有可能會逼爆魚魚個魚膘!

魚膘爆咗既魚魚未必一定死，不過就調整唔到身體浮沉及平衡，於是魚魚會反轉游背泳......成世都係咁好慘架!!