My Guardian Angels

我又失蹤咗幾日......

因為我又去咗Birmingham 陪老公出trip! 

尋日朝早搭通宵巴士返到屋企~

今次去Birmingham 發生咗一段小插曲，

令我有一d感想好想記低一下......

自問大部份時候好精靈 + 記性不錯 - 但只限我精神充沛既時候!

眼瞓或肚餓係我兩大致命傷，
個腦會即時停止運作，要幾失魂有幾失魂!! 

我有一個習慣 - 出門多過1日的話，

預咗返來後有大堆污糟衫 + shopping，

所以臨行前我一定會勁執屋，

咁返來後就唔洗執野執得咁辛苦嘞!
事源星期六(11月12日)朝早我起程去Birmingham，

前一晚星期五晚，我就係因為執吓依樣搞吓果樣.......

搞到3am 先上床瞓覺，不過...仲未執行李!

加上天氣凍無咗Mr.T 依個人肉暖水袋，
瞓得好差~ 只模模糊糊瞓得幾粒鐘，

就要起身沖涼、執行李、餵魚餵蝦、淋花、

check 電制門窗、倒垃圾......
但整個過程我一直處於夢遊狀態~~~~
直至我去到長途巴士站排緊隊等上車，

想起一樣野突然成個人醒哂 -

餵魚餵蝦淋花熄電制拖住大袋垃圾行李喼論盡地出門口.......

依咋片段我通通都記得!

唯獨完全想唔起自己有無鎖門!!!!!! 

到達巴士站時，架巴士已經到咗，

如果折返返屋企去check，一定會miss 班車;

但唔check 既話，
我肯定往後喺Birmingham 依幾日會心神不定囉囉孿!
不知所措之際我打比一位男性朋友，

戰戰兢兢地開口問對方一個非常唔好意思既favour -

麻煩佢特地幫我走一趟，

去確定一下我依隻大頭蝦有無鎖門......

朋友先傳來一連串哈哈大笑，
隨即爽快地拍哂心口話無問題! 
(約30分鐘後朋友來電告知我有鎖門 + 叫我安心喺Birmingham 玩得開心d!)
依件疑似忘記鎖門事件，
看似舉手之勞雞毛蒜皮一條，但真係令我好感動~~~ 

外國同香港真係好唔同 - 至少交通已經無香港咁方便;

朋友家離我家頗遠，而且我打比朋友既時候佢正要準備返工;

就算人家得閒，無義務一定要幫你.......

雖然大家係認識咗十多年非常熟絡既老友，

但我開口時真係非常唔好意思~

其實最令我感動係朋友既反應......

我一路唔好意思麻煩到佢，
佢就一路"無問題~ 無問題~"咁安慰我!
好感激朋友幫咗我依個咁麻鬼煩既favour，

讓我可以安心同老公渡過一個愉快既long weekend~

人心難測，曾經睇清楚過一個帶住朋友面具既"陌生人~

事實係依個世界實在有太多......

a. 冷漠既人 - 事不關己己不勞心，冷眼旁觀撓埋雙手;

b. 幸災樂禍既人 - 唔出手幫助，仲剥住花生等睇戲;

c. 勢利既人 - 會幫手，但一路幫一路比說話人家聽，比面色人家睇;

d. 偽善既人 - 小恩小惠後以恩人自居，一副"我有恩於你"既姿態......
 
真正既朋友喺你需要幫忙既時候，

有時可能愛莫能助有心無力，未必可以幫到你，
 
可能只可做到一句簡單既問候，

不過已經可以令我覺得warm，

給予我支持讓我可以撐下去;

但無論幫到忙與否，

朋友都一定唔會令你有難受既感覺~
十多年前人生路不熟隻身來蘇格蘭讀書，

好感謝上天賜我一個好老公及一班好朋友，

我需要佢地既時候總會be there for me 看顧我、支持我......
You guys are my guardian angels!