唔用殺蟲水既盆栽去蚊滋方法 + 廚房通告2則

先來兩則廚房通告.......

(1) 唔知各位blog友最近有無收唔齊回應電郵通知既問題呢?
好不幸.......我有! 而且情況已經幾個星期都完全無改善過.......
加上欄位"最近的回應"顯示有限，
只要我睇到既，我都會盡量回覆大家既留言，
但亦有極高可能會漏覆你/妳果個!
請大家多多包涵啊~

(2) 為免除閒雜人等，小妹已將Facebook setting 全面轉做private!
我仍然歡迎各位blog友add 小妹吹吹水，
想add 我FB既blog友們可以喺blog 依度私回留個email 比小妹~

好! 入正題~

話說幾年前62比咗棵"發財樹"過我地，
(即Jade Plant~ 又名Money Tree、翡翠木、吸財樹、玉樹、燕子掌、八寶樹!)不過我嫌62個原裝花盆太過老土得滯，
所以我換咗個懶靚既白色花盆.......

日子耐咗，棵發財樹越生越大棵，開始太重斜埋一邊!
今年4月我已開始意識到要換一個大d既花盆.......

軟皮蛇既我拖到7月尾先幫佢換盆........
(之前個花盆咁鬼細真係委屈哂佢! )

換盆後一發不可收拾越生越茂盛!
(睇來不久既將來要再換一個更大.......)

換咗大花盆後有一個問題隨之而來 - 討厭既蚊滋仔!
呢~ 即係黑色好細隻 + 飛得好慢好煩人果d呢!!
朝朝早起身最少見到5、6隻蚊滋仔喺花盆外面擺pose......
淋水時又見佢地喺泥裡面蜂擁而出......好鬼核突呀~~~~~~

早排夏天仲成日見佢地喺發財樹d葉上一pair pair 交尾.......高峰期期間我仲要用最最最原始既方法捉蟲 - 用手指逐隻篤死佢地!
幾分鐘下來可以有廿幾三十隻收穫，
我攞哂去當餓姦力魚糧餵榮華富貴(我d金魚!)

有感長始下去"愚婆捉蟲"唔係辦法，
但我又唔想噴殺蟲水喎!
有網FB友教我用辣椒水，不過有人話無用;
有人叫我換泥，但我換依個盆時包泥已經係新買，
難保再換後又再來料........;
有人又話唔好淋水等d泥乾，但遲早都要淋果喎，
避得一時唔避得一世，非長遠計也!!

老公幫我網上搵到依個方法 - Tumble Dryer Sheets!
(滾筒式乾衣機紙)

唔知香港興唔興乾衣機? 英國就好興~
(可能因為依邊成日落雨，唔可以下下都將d衫晾出去!)
不過我屋企其實係無乾衣機既，
因為以前喺親戚屋企住時試過攪爛or 攪wer 咗我幾件衫.......

依包乾衣機紙作用似柔順劑，
令d衫攪完後熱辣辣香噴噴軟綿綿 + 無咁易摷~
依包野40張只售幾蚊雞，我見咁平即管買來試吓啦!

就咁輕輕鋪喺泥上面，另外我又用佢來抹一次花盆表面~
根據網上research，
蚊滋仔好怕tumble dryer sheets 既味道.......

果然第二朝起身，蚊滋仔數目銳減至3隻!
而且3隻都係喺葉上，花盆上一隻都無!!
再之後果日有2隻 - 2隻都係停喺花盆旁邊玻璃窗上呢~

再再之後果日，就見到1隻伏屍紙上，
而尋日 + 今日......1隻都見唔到!似乎真係好有效咁喎~

我發現用tumble dryer sheets 仲有一個好處........
就係經過花盆側跟時聞到香噴噴呢!
盆栽有蚊滋仔問題又買到tumble dryer sheets 既話，
不妨試吓依個方法吖~