My MIP's Birthday 2012年11月21日 (附朱古力海綿蛋糕食譜)

尋日係我至愛既MIP (Most Important Person)Mr.T 牛一!
上星期一連兩日整咗2個比客人既蛋糕，
Mr.T望住成品既相只有流口水既份兒怪可憐啊......
一年一度牛一，當然唔少得整返個生日蛋糕比佢啦~

第一次整朱古力味既蛋糕，味道好好，算係大成功啊!
唯獨唧花技巧仍然要改善.......

首要解決既係我果套48款忌廉唧花咀，究竟唧出來係咩樣呢?
曾經有網友比過唧花咀圖解我，
不過之前電腦壞咗reformat 時無鬼咗!

今次3層朱古力味蛋糕層之間無放到雜果，只夾咗朱古力忌廉;
蛋糕面就用朱古力忌廉圍住圓形唧花，中間灑上刨碎黑朱古力~

蛋糕周圍用朱古力忌廉 + 原味忌廉梅花間竹隔色打斜唧上條紋，
再用刨多咗既黑朱古力碎圍住餅底;

最後蛋糕面放上士多啤梨，忌廉花放上金銀糖珠;
Mr.T鍾意食金莎，所以整2粒金莎過佢~

本來仲想自己整個Happy Birthday 朱古力牌.......
不過我臨整時先發現原來屋企無白朱古力存貨!

唯有用幻彩Happy Birthday 膠牌代替......大功告成!


16cm 朱古力海綿蛋糕
1. 預熱焗爐180C; 蛋糕模用牛油紙墊底。

2. 蛋白和蛋黃各3隻分開。

3. 低筋麵粉40g、可可粉10g和咖啡粉1茶匙(optional)先篩勻備用。
(咖啡粉作用可加強朱古力風味! )

4. 蛋黃加入幼砂糖10g打至發白變稠。

5. 蛋白置大碗內，加入鹽1.5g和塔塔粉少許打先至啤酒泡狀，再入幼砂糖55g打至乾性發泡後，分3次加入(4)中用膠刮拌勻。6. 將(3)的粉分3次篩入(5)內，每次篩入粉後用膠刮輕手拌至完全無粉粒，再下其餘麵粉。7. 小碗內牛奶和菜油各18g，雲呢拿精油少許一同拌勻。8. 將一小匙(6)麵糊加入(7)內略略拌勻。

9. 再將(8)倒回(6)中用膠刮完全拌勻。

10. 將混合物倒入蛋糕模內，輕輕左右搖勻。

11. 放入焗爐中層烤30至35分鐘，測試蛋糕熟後取出倒扣在蛋糕架上待涼。


Mr.T好鍾意個蛋糕，返到來食咗1/4!

Happy Bday my darling Hon! ♥