紅銅鍋 Copper Pot (附簡易清潔銅鍋方法)

多年前因為貪靚扮pro，擁有慾作崇買下第一個紅銅煲仔，
發現無論傳熱保溫都甚正! ❤
 
最近搵到心水完美炒鑊De Buyer，鑊已買夠，告一段落~
又輪到我條煲癮蠢蠢欲動!
考慮咗幾個星期買單柄定雙耳，終於扑咗槌......

最後買咗個雙耳...Mr.T 話雙耳煮完野直接放上飯枱靚好多，
單柄放上飯枱會好阻訂喎~

唸唸吓都好有道理既!


 
好靚仔~ ❤ 
(我對個單柄仍然念念不忘...唔排除有買佢既可能性! 哈哈~~~~)

幾年前買既16cm 雙耳的式銅煲仔，平時超粗用來淥麵烚蛋煮罐頭湯........

我一向唔主張廚具就住就住來用兼要長期保持新蔟蔟既樣，
所以多年來我從來無polish 過依個銅煲仔，
經過歲月既洗禮後佢變成咁既樣...幾乎完全睇唔出佢係一個銅煲來!


無意中睇到網上2個清潔銅鍋既方法，好奇下即管試試效果如何......

1. 檸檬切半加粗鹽擦拭，即時見效! 
不過好似我依個情況嚴重既重症，有某d頑固位捽極都唔甩......

2. 對付頑固既長期銅漬，要用茄醬ketchup!
將整個鍋銅既部份，塗抹上一層厚厚既茄醬，靜置30分鐘至1小時，之後用暖水洗乾淨，徹底抹乾~

氧化咗既銅鍋就會重現銅色架嘞!



同場加映..........
 

日本製炒(龍)蝦拆(青)蟹湯麵碗~ 造型可愛! ❤

自從早前發現屋企附近一間印巴人開既£1店(網誌)，
有一批質素非常好既烘焙工具賣之後，我得閒就去逛吓，睇吓有無新貨到......

皇天不負有心人!

依套翻糖糖牌cutter，名牌PME 出咗套一模一樣，
其實我睇中咗PME 果套好耐，但4個塑膠cutter 賣£7，我一直孤寒唔捨得買......
估唔到今日可以£1買到喎! 呵呵~~~~~~

圓頭 + 尖頭gum paste tweezers~ £1 each!
名牌Wilton 有類似既糖皮夾，不過每隻要承惠£6......

大中小星星fondant plunger cutter set~ £1!!

矽膠朱古力模~ £1 each!!!

成咋野只係7個英鎊大洋! 哇哈哈~~~~~~
 

Mr.T 阿姨想食栗子蛋糕~
之前我都提過 - 英國只萬聖節前後一段短時間先有新鮮栗子賣!
自家整栗子蛋糕，只可以用現成栗子蓉...... 

依隻Merchant Gourmet 栗子蓉，超市原價每罐£2.25......


  
尋日驚見清貨減到10p 一罐!

咪以為就快過期先減得咁勁喎，其實有效食用日期仲有2年呢!

一口氣掃哂減價架上12罐!
12罐原本要£27，而家只£1.20，撿到便宜好開心!!
栗子蛋糕on its way~~~~~