Wide Mouth Frog Restaurant@Dalziel Park Hotel & Golf Club Motherwell (2014年4月26日)

剛過去既星期六(4月26日) Mr.T 休息無返工，
因為星期五晚佢同朋友夜蒲把酒吹水......

星期六佢仍然可以晨咁早屹起身陪賢妻食早餐，抵讚! ❤

食完早餐去IKEA + garden centre 買野，
一轉已經買齊哂我想要既野，返到屋企3點都未夠，
趁天氣好Mr.T 洗車...砌埋個木架...再清潔埋鼠鼠籠，
過咗非常productive 既大半日，剛好到dinner time!

可能天氣太好，Mr.T 意猶未盡即興話想出街食飯~
見佢打咗2個電話後就話行得! 問佢去邊度食佢又唔肯講，
只係話去一間我地未試過既餐廳.........

泊好車行到門口...我已經想調頭走! 酒店來既!!!!!!
Dalziel Park Hotel 係一間高爾夫球俱樂部裡面既酒店，
Mr.T 訂枱既"大口青蛙餐廳"位於酒店裡面........

餐廳門口裝潢好靚......

餐廳裡面裝修classy，樓面大，枱 + 枱之間分得好開夠private，右邊有一列窗光猛得來又不失情調，成個環境好fining dining 餐廳feel，坐得好舒服~ ❤

咁點解我想走人呢? 因為死人Mr.T 出門口前唔肯話我知去邊度食飯，
我無化妝...著緊運動top 牛仔褲...仲要加對Crocs!!

不過帶位見我咁既"身勢"都無請我走......
坐低後發現都有其他著得causal 既客人，於是我安心地打開餐牌~
咦...食物價錢唔貴喎! 仲要點餐後上菜速度奇快!!

我既頭盆Sole Goujons

好多餐廳既goujons 都有一個通病 - 麵包糠上得太厚，
炸出來幾乎只食到麵包糠炸皮......
Sole 係類似左口魚既扁平魚，魚肉通常不厚，
我本身對依個goujons 無乜大期望，點佢只係因為突然想食炸魚......

不過，依個sole goujons 真係十分非常好食到不得了~ ❤
熱辣辣麵包糠炸皮薄而香脆，裡面魚肉又厚又滑又juicy (條sole 一定好大先有咁厚肉!);
果一小兜比我食到乾乾淨淨既他他汁一流，絕對唔係現成野來;
仲有檸檬底下果一小執又綠又紫紅不知名沙律菜，完全無汁，得果幾條仔已經齒頰留香!!

Mr.T 既頭盆Potted Smoked Mackerel

份量頗大，果3小片異常香脆既sourdough croutons 唔夠皮，應該比多幾塊~
煙魚醬食落非常香滑充滿煙燻魚香，但稍嫌太smooth 無咬頭口感! 
(我不是食家，但我係一個喜歡講口感既人! 吹咩~~~~)
Mr.T 食到底先發現 - 原來有幾塊大舊魚肉沉底無撈勻......

我既主菜係是日special 煎三文魚配荷蘭醬

好食到唔知點形容! 成塊三文魚無魚皮，但淋咗荷蘭醬上面，表面仲係脆脆，
裡面就啱啱熟又軟又juicy; 菠菜苗無煮到淋劈劈出哂水;
果4粒charlotte potatoes 又軟又香甜...配埋個味道subtle 荷蘭醬.......
2個字 - first class! ❤

Mr.T 既主菜Braised Lamb Shoulder

上菜時第一個感覺 - 咁香既! 第二個感覺 - 咁巨型既!!
依碟野slow cook 咗12粒鐘，你話好唔好食嘞?
(我食咗Mr.T 依份幾啖! 嘻嘻~~~~)


依餐即興飯食得好開心滿足~ ❤
有一樣野想特別mention 一下 - 我 + Mr.T 留意到是晚餐廳裡面既客人，
真係每一枱客人一路食飯一路開心傾計，成餐飯無見到有客人低頭篤手機!
咁先係出街食飯應有既氣氛嘛!

Wide Mouth Frog 無論環境、服務、食物，都係fine dining 餐廳既水準~
不過只係平時我同Mr.T 出去食一餐中式任食打邊爐既價錢!
但下次再去Wide Mouth Frog 時，我一定會著靚dd........

http://lisini.co.uk/home/venues/dalziel-park/about-dalziel-park#.U1-E1KLeGCk