Sumo Noodle Cafe@Falkirk (2014年4月12日)

剛過去星期六Mr.T 休息，
我地去咗Falkirk 搵一間而家買少見少既dollhouse miniature shop~
本身買完野就唸住走去第二度食野，
因為印象中Falkirk 好少餐廳選擇，無乜野好食，
不過其中一件我要既貨，miniature shop 無現貨，
店主好好人話可以即時幫我造，但要等一粒鐘!

反正要等一粒鐘，我又真係好肚餓，索性食住lunch 打發時間，
大街都係麥麥、酒吧之類既店，
醒目Mr.T 轉向一條唔多起眼既橫街.......

發現一間日式小店，雖然一睇門面格局就知道係中國人開.....
不過是日強勁大風兜頭吹，令我好想食一碗熱辣辣湯麵，
Sumo 既出現如同救星!


一打開餐牌，價錢好平，食物有日式又有中式，
不出我所料 - 係中國人開既店~
但依種平價小店正宗與否對我來講無乜所謂，只要食物好味就得嘞!
我 + Mr.T 都係點2 course set lunch.......

我既頭盆Chicken Yakitori~
兩條無切開既雞胸肉，感覺係炸出來而唔係燒出來，
不過唔會乾爭爭味道唔錯!

Mr.T 既頭盆...唔知咩Garlic Chicken Wings
依個好明顯唔係日式，根本就係中式外賣店食到既椒鹽雞翼!
不過整得好好食! 炸皮好脆，雞翼junicy~~

又一次眼大過肚...除頭盆 + 主菜外，我另點咗個加州手卷做side order~

有史以來食過最多料既手卷! 每咬一啖都會跌料...好messy~
咁足料應該好好食先係，不過.......
佢地用果隻蟹柳太cheap 唔好食;
料雖足但欠缺咗加州卷既靈魂 - 蛋黃醬!

Mr.T 就點咗叉燒春卷.......(滴汗......)
我只食咗半條，因為我覺得唔好食! 淡茂茂完全無味道，
更莫講叉燒味，唯一可取只係得個脆字~

我既主菜 -牛肉辣湯拉麵~ 依個...真係好食到不得了! ❤
湯底濃且辣味剛剛好; 拉麵煮得剛剛好唔會太淋; 牛扒雖薄但唔會乾硬，
好大碗又勁足料，牛扒 + 拉麵食極都有! 
係我出街食過最足料抵食既拉麵~

Mr.T 繼續中式! 依個完全係中式蘑菇雞配炒飯......
不過依個無論雞 + 炒飯都好好味!


值得一提 - 佢地用既綠茶葉好好飲!
而且茶葉份量好慷慨，我唔需要點雙份茶葉比double 價錢 (抽水哇哈哈!)

依餐絕對係一餐唔正宗呃洋人既"日本野"! 雖然食物有好味亦有唔好味，
但喺無乜啱我口味餐廳既Falkirk，橫街小店價錢又咁平，
淨係食果2個頭盆 + 2個主菜都抵返!
下次再去Falkirk，一樣會去幫襯~

Facebook: https://www.facebook.com/pages/Sumo-Noodle-Cafe/125977800786344