Always - 幸福之三丁目

06年10月同老公、Jeff + CJ 一齊返香港註冊行禮，Jeff + CJ 既媽咪可以book 到平機票 - Qatar Airline~ 本來我一聽到要喺Doha 轉機，就唔係好想搭Qatar...不過Jeff + CJ 為咗去我地香港既婚禮，自己出機票錢，我都唔好意思阿之阿左~~~

就係因為我搭咗Qatar，有幸睇到一齣令我2分30秒就感動到流得出眼淚既戲......

喺回程飛機上面，我剛瞓醒無意中見到老公睇緊"Always - 幸福之三丁目"~

當時老公已睇咗2/3，佢同我講話依套戲好好睇! 我八卦去"裝"吓，咁啱劇情講到窮到褲穿窿既男主角，用空既戒指盒同女主角求婚，而女主角喊住應承咗既一場戲........就係依場短短2分半鐘既戲令我喊咗出來!

不過好可惜 - 到落機時套戲仲未做完，中途cut 咗喎.........就係咁返到英國我地上網買咗依套戲既DVD (好鬼貴!!!! 第一集都要£20!!!)，老公發現飛機上既版本係刪減咗既，足版更加好睇!!!

07年再遊台北時，無意中喺書店發現有"幸福之三丁目"既漫畫，我先知"Always" 原來係由漫畫家西岸良平，一個自1972年開始連載既漫畫 - "幸福之三丁目"改編而成......

 我一口氣買哂5本"幸福之三丁目"漫畫，裡面既故事全部係短篇~ 而電影版就係由漫畫裡面既短篇串連而成! 不過...漫畫版只限台灣地區出售，所以香港應該唔會有得賣..........

"Always" 第一集喺日本奧斯卡攞咗12個大獎! 故事背景大約係1957 - 58年 (昭和30年代)，二次大戰後十多年既東京，發生喺三丁目裡面小人物既故事......感人得來又唔會太煽情，但又有好多搞笑場面!!! 絕對係一套近年來少有既好戲~~~

不過唔知點解 - "Always" 喺香港好似冇出過!!! 我地上網買到既都只係日本版，只有英文字幕~ 反而台灣戲院有上影之餘，仲有台版DVD..........08年頭"Always" 第二集喺台灣上影，5月份就出咗DVD......咁啱我地第一集既DVD 花鬼咗...有成15分鐘睇唔鬼到要跳過去! 於是我地又上網買返1 + 2 既合訂版。

個人覺得第二集比較煽情，亦唔夠第一集好睇~ 不過都不失為一套好戲!

 有興趣既朋友去開台灣可以買台灣版本，或者上網買只有英文字幕既日本版~~~~