小V超級珍藏大曬冷 - 老公親手造既小禮物~

最近天氣熱，開始換季~ 一換季我就好大陣象 - 成屋都係衫同鞋!!!

百忙之中，比我摷返收埋咗...老公咁多年來親手造來送比我既咭~~~ 每逢乜節物節...special occasions...老公都會送花、禮物 + 佢親手造既咭! 咁多年來儲埋一大堆，我得閒都會攞出來睇吓回味吓.......

 依張歷史最悠久~ (我當時鍾意XO!) 雖然只係打印機印出來既公仔貼出來做既咭，但依張令我最感動!!!

 當時因為我自己既原故...同老公分咗手~ 但老公堅持大家可以做朋友~ 不過因為分手前我對老公做咗好多衰野，佢所有朋友都唔鍾意我，成日講我壞話......當時身為朋友既老公就做咗依張咭送比我~ 裡面寫住: "I just wanted to say thanks for being such a wonderful friend. You are such a lovely person, don't change for anyone. Don't ever let anyone get you down as you don't deserve it." 而家有時睇返，再唸吓以前既自己...我都會眼濕濕.......

 我最鍾意依張05年收到既生日咭~ 除咗畫得我好可愛之外 ，手工可以媲美街買返來既咭! 仲有就係右上角寫"Princess"~ 我好鍾意老公成日叫我做公主......

 我平時發咗一d古怪既夢，我都會同老公講......e.g. 我夢見一隻有好多條脷既龜(!?!?); 我夢見自己玩緊pogo stick.......依d咁既傻野老公都會一一記住! 再加埋一d我平時鍾意既公仔 + 卡通人物...就成為咗我收到既咭既主角~~~~~

 我相當佩服老公既創意! 有時收到一d看似簡單平凡既咭........

 但箇中"奧秘"往往會令我笑到收唔到聲~~~

 唔係只有special occasions 我先會有咭收，平時既日子間唔中老公都會送一兩張小小心意咭比我~ 依張係結婚前冇耐收到既，裡頭既乾花係老公自己整! 老公話係我地拍拖果年(99年) 整既，佢一直keep 住直至結婚前用來做咭送比我~~~~~~

 有時收到既咭好似玩具咁有得玩! 依張06年既生日咭，(中間果個緊係我來啦~) 中間既我係可以轉既 - 老公話下次我唔知想要乜野禮物時，可以用依個"輪盤"來決定! 有手機、手袋、鑽石、化妝品、香水、神秘禮物 + 太陽眼鏡(?!?)...我緊係死都轉去手袋 or 鑽石啦!!! 哈哈~~

 07收到既唔係生日咭...而係一個"08年既生日月曆"~ 老公設計咗好多個唔同形象既我做封面!

 月曆裡面每一個月有一張我地一齊去過旅行既地方既相，每個月唔同國家~

 老公仲喺每張相中加咗一個我既公仔 - 但縮細咗混入人堆裡面，要細心睇先搵到出來! 每個月下面仲有一個放大咗我要搵既公仔 + 一首佢作既"押韻傻詩"! 依個08年1月份就係用巴黎羅浮宮既相 + 帶住畫家帽既我 + 傻詩:"So here's January the start of another year, It's cold and wet outside so have to hold Hon close & keep her near. It will now be one of the favourite months of all time in my life, because on the 13th of this month silly Hon agreed to become my wife!" (佢係06年1月13日同我求婚既!)

 依"本"唔係咭~ 係一本老公創作 + 我做主角既漫畫.......

 裡面既"故事"大部份都係串我惡死 + 細膽 + 論盡既!!!

 老公話佢只識畫我，唔識畫佢自己! 所以通常有佢既部份，佢會畫隻蛋來代替......因為佢比我改咗個花名"豬蛋"! 事源有次佢用一張米色既薄被蓋住坐喺地下打機，我從佢後面望去，好似一隻巨型既蛋......

 今年既情人節我收到依個"落雪紙鎮公仔"代替咭! 裡面既"我"係老公用黏土造既~~~~~

依一堆咭 + 小禮物，對我來講好有sentimental values! 我覺得比我任何一個手袋...任何一粒鑽石更珍貴~~~~ 走難時第一樣要攞既野一定係佢地!!!!!