大枝野 (2012年11月10日)

大家有無見過咁鬼大枝"辣椒仔"?

好鬼重......

重大過我個頭!

果日喺Harvey Nichols見到佢我第一時間唸.......

(1) 咁鬼大枝要食幾耐先食得哂呢?

(2) 依枝野要£80，究竟會唔會有人買既呢??

(3) 如果我買咗佢返屋企擺十幾廿年，第日會唔會升值呢???



最少4個月前我開始搵緊一樣野，但一直都搵唔到.......
我從來無唸過依樣野喺英國會咁難買，
越搵唔到我就越想要!

大約2個月前，我終於搵到一個類似既代替品!
不過同我心目中真正想要既仍然爭一大段距離......

因為波浪紋實在太過唔夠明顯!
不過我都有殺錯無放過咗先~

個零月前我喺愛丁堡發現依間乜都貴過人既懶高級廚具店~
佢地d野其實係靚既，只係價錢太嚇人!
尤其係果d TK Maxx 都有得賣既貨........

當時入咗去巡視一下，順口問吓佢地有無我搵緊既野賣，
佢地答我 - 啱啱賣哂! 入咗貨但船期delay 咗喎~
當時我既反應緊係: Yeah yeah yeah......我真係信咁啱呀!

Weekend 去開愛丁堡，又經過依間廚具店，
完全無抱任何期望下純粹入去及及有咩新貨，竟然..........

搵咗4個幾月，終於比我搵到嘞 - Pastry Wheel Cutter!
有點感動 + 激動~~~

(原來佢地真係有得賣果喎，仲有好鬼多貨，
大大細細，直柄曲柄都有!)

要咁波浪先似樣架嘛!


又了咗一件心事!
不過唔知點解我硬係有個預感 - 喺不久既將來，
依種pastry wheel cutter 將會周街都有得賣，
而且仲會比我依個價錢平........好多........