Bye bye lump! 2013年7月10日 (慎入!)

上次返香港，好記得果日係舊年既年初三，
我同V媽媽去一位auntie屋企拜完年，
返到屋企後V媽媽突然問我.........
"阿妹~ 點解妳頸後面有舊野凸出來?"

如果唔係V媽媽發現，我都根本完全唔知道依舊野既存在!

唔知都由自可........一知道咗就覺得佢好礙眼!!

尤其喺側跟望勁覺眼! (難怪V媽媽成日誤會我寒背.......)


摸上去軟軟地有彈性，一整塊喺皮肉下面但完全唔痛，
總覺得舊野唔屬於自己身體一部份，
就好似隆胸隆錯左膊咁既感覺!


返到英國後，唔知係心理作用定係點，
硬係覺得舊野越來越大!
我成日會不自覺地用手"拎"吓佢，
下意識企圖"拎"返細佢.......反正拎幾大力都唔痛既~

Mr.T的咗我去睇醫生........
睇過幾個GP個個一望都話係fatty lump，醫學上叫lipoma，
即係脂肪瘤(唔係癌症! )
脂肪瘤情況好普遍，成因不明兼無法預防，
全世界大約有1%既成年人會有唔同程度既脂肪瘤~
脂肪瘤唔會防礙健康，所以可以不理，
不過.........個瘤絕對唔會縮返細，只會有機會越生越大舊!
我去照過超聲波，發現個瘤已經有6cm x 7cm咁大，
於是我決定要割咗佢出來!!

手術定咗星期三(7月10日)朝早10am，
到咗醫院等到成10.30am先到我，只需局部麻醉，醫生先圍住個瘤打麻醉藥，
大約打咗10針左右，都唔算好痛~
我初時以為打完麻醉藥要等一陣藥效發揮先開始，
殊不知依頭佢打完最後一針，
果頭就聽到佢用手術電燒刀吱吱聲咁切開我!
雖然完全唔痛，但感覺好奇怪.......

因為局部麻醉，所以我整個手術過程完全係清醒既!
個醫生一路剪我，仲一路同我吹水~
雖然麻醉咗，但其實開刀既位置仍然有感覺，
而且感覺仍然好敏感，只係完全唔覺得痛，
一時感覺到醫生塞咗咋手指入去，好似掘金咁挖挖挖 ;
一時又感覺到佢用手術剪剪吓我........
醫生話我個瘤生得好貼皮好緊，
而且仲有好多蜘蛛網狀既纖維索掹緊肌肉，
要剪斷哂纖維索先攞到個瘤出來~當佢用剪斷纖維索時，我聽到一種好似我喺廚房切緊豬潤，
用廚剪剪斷豬潤白筋果種"chop chop"聲!

成個手術過程大約45分鐘左右~
其實一般脂肪瘤手術只需20至30分鐘，
(當然係要視乎瘤既大小啦!)不過因為我個瘤生得好鬼緊特別麻煩過人，
所以時間比較長!

45分鐘後得出依pat個個都話似雞油或免治雞肉既"V油"!

而我左膊就多咗大舊紗布.......好鬼熱呀!!!!!!!
藍色紗布24小時後可以拆，不過裡面仲有塊膠布，
一星期唔可以濕水亦唔可以掂個傷口........
依兩晚沖涼都要Mr.T幫手~

做完手術返到屋企打電話比V媽媽報平安，
V媽媽問我: 妳尋日去燒野食有無食牛肉?
係喎! 之前果日去燒野食，完全忘記咗唔好食牛肉依回事!!
食咗2塊西冷.......希望傷口乖乖地唔好發炎啦!
Bye bye lump~~~~~
You're not welcome so don't come back!