黑洞夫妻之Endless Slab Mondays任食燒排骨@Tony Roma's (2013年7月29日)

真係好耐好耐好耐無去過Tony Roma's既Endless Slab Mondays嘞~
突然唸起，令到食肉獸Mr.T非常掛住，
早個零兩個月已經話要去勁擦返餐!

顧名思義"Endless Slab Mondays"只係星期一先任食，
不過先前幾個星期一，
一係Mr.T工作臨時有事要遲返;
一係我臨時有事要幫99幫朋友整野;
又或者撞啱係初一十五齋期...........最終去唔成!

剛過去既星期一(7月29日)，
Mr.T離開office前打比我叫我換定衫返來接我，
8.30pm我地已經坐喺餐廳裡面等食!

差不多3年無食過，雖然offer仍在，
不過已經由之前£15.50，加到而家£19.95~

而家仲貼心地為每位客人準備一條膠袋口水肩，
不過現場所見......完全無人用!
(我都無用架，只係用來影相咋!!)

因為之前已食過幾次Endless Slab Mondays，
我記得佢地個奶昔好難飲! 特別提醒Mr.T千其唔好點奶昔!!
我地之前亦已試勻哂排骨4種口味:
Original, Carolina Honeys, Blue Ridge Smokies and Red Hots，
我又記得以Red Hots最好食..........

所以第一回合我 + Mr.T都係點辣辣既Red Hots!


第一回合每份排骨包2個side order..........

Mr.T點咗蒜蓉蘑菇 + 黃飯;

我就點咗蒜蓉炒豆 + 黃飯~
(好後悔點咗黃飯! 少到無朋友!!
我見隔離枱碟凱撒沙律好大碟好正啊........)


我認為食燒排骨要好似BBQ咁，
棄刀叉豪邁地用手食先食得暢快!
咁食到一手都係，當然無咁好氣一路食一路影低戰績~
不過唔緊要! 每份排骨都插住枝旗仔..........

我食咗3份Red Hots;

Mr.T食咗4份Red Hots + 1份Original = 5份!

其實除咗第一回合之外，
第二回合開始，排骨只有第一回合既一半，
而且唔會再有side order~
第三回合排骨剛送到，我地開始感到周圍客人奇異既目光!

到Mr.T點第四第五回合，可能廚師開始覺得煩........
一次過比咗兩份 - 即第一回合既份量!
(咩野啫~ 咁話明任食架嘛.........)