日本 - 照燒雞扒蒜香豬骨湯底拉麵

心血來潮想整..........

即時走去買咗3條豬筒骨返來熬豬骨湯!

1. 豬筒骨3條(約1kg~ 叫肉檔劈半!)，汆水5分鐘。

2. 取出沖洗乾淨。

3. 蔥1條切段; 珍寶蒜頭3個搣開(不用去皮!)

4. 粟米4條斬半; 細洋蔥2個去皮一開四(唔記得影!)


5. 大鍋中煲滾清水約1.8L，先放入豬骨，後放入其他材料，再加入4片薑(厚切!)


6. 煲至回大滾後，撇去浮面雜質，蓋上蓋轉小火煲6小時。

7. 撈起渣滓，用密隔過濾2次，盛起雪白豬骨湯。


8. 將熬好的豬骨湯盛起，待涼後以保鮮紙封好放入雪櫃，待油份凝結浮起，用湯匙除去油塊，以白胡椒粉和海鹽調味，即成豬骨濃湯。

我碗拉麵大解構!
抱歉我從來都唔鍾意食日式叉燒!
(叉燒，還是中式的好!)
所以我選擇整自己鍾意食既照燒雞扒~


9. 日式照燒雞扒食譜click here~

 
10. 昆布絲浸軟後，搾乾水份備用。


11. 烚蛋我用咗cheating方法令佢睇上去似滷蛋...(滷得1隻咁大把我真係睬你都傻! )
先將蛋烚熟去殼，然後用珠油/老抽搽勻成蛋，靜置10分鐘切半...攪掂!


12. 預備適量綠巨人罐頭粟米 + 日式魚板2片(每碗)(遺憾今次買唔到鳴門卷魚板! )


13. 白芝麻白鑊烘一下備用。

14. 我用中式超市依種現成拉麵~ 照包裝指示煮滾一鍋水，加少少油，再下麵煮滾1分鐘，撈起過冷河，瀝乾盛入麵碗中。


15. 將照燒雞扒、昆布、烚蛋、魚板和粟米排好鋪在麵上。


16. 煮滾(8)的豬骨濃湯淋入碗中，灑上(13)烘好的白芝麻和蔥花，再灑上少許胡麻油即成。



我用依隻極上胡麻油~

熱辣辣~ 香噴噴~~ おいしい~~~