2014年4月16日星期三

去舊迎新2014

近個零星期蘇格蘭陽光普照,氣溫和暖,
明顯已到春季水尾,之後好快就到最適合燒野食既蘇格蘭夏天嘞~

每逢季末,都係敗衫褲鞋襪既好時機!
尤其冬季總係比其他季節既衫褲鞋襪貴,
春季末各店正準備推出夏季衫褲,好多店都會有清冬季貨既大減價,
依個時候就可以搵到一d質素高,但價錢平到嚇死人既筍野!
以下就係一個好好既例子.......

依對一千零一對4號深啡真皮長boots 就係一對春季尾減價筍貨!
全對真皮,皮料好靚好軟熟,cutting 一流好貼小腿,巴西製造~ 


有幾筍? 先唔睇我買咗幾錢...未減價時原本£49.99.......
講真一對長boots 簡簡地都要過百英鎊,依對d皮料仲要咁靚,
其實TK Maxx 價£49.99 已經超值好抵買!

睇個價錢牌,紅色減價貼紙一張叠一張,似乎減價減咗好多次都賣唔出!
得閒得滯逐張搣出來睇,發現依對boots 足足減過5次價......

第一次先由£49.99 減到£37.......


第二次減到£25......


第三次減到£17......


第四次減到£11......


最後第五次減到...£7先比我買返屋企! 哇哈哈~~~~~

減咗咁多次都賣唔出...究竟對boots 有咩問題呢?
無問題喎! 若係都要話有問題的話......
你可以話因為佢係一對4號來囉~ 鬼婆多數大腳嘛! =P


之前提過我最近忙於全屋大掃除........

先清理廚房,足足執咗三大紙箱殘舊、重覆或我覺得唔好用既廚具出來,
不過唔會浪費啊 - Mr.T 攞返公司比d staff 任揀!
三大滿滿紙箱既舊廚具,揀剩一箱,
剩低既就留返來summer 開檔玩car boot sale,
如果仲有剩就捐去charity~


咁去咗d舊野...當然要迎返d新野架啦!
之前一直將所有烘焙材料塞哂喺一個三層架上,
日子耐咗越來越多野 + 越來越亂.........

周圍搵咗咗個幾月,終於比我搵到依個尺寸good fit 既四層膠櫃筒,
放喺kitchen trolley 隔離位置啱啱好!

最高一層放開咗封但未食哂既粉麵 + 即食麵;
下面三層就專用來放蛋糕材料、裝飾工具 + 包裝用品;
至於麵包材料就照舊留返喺之前既三層架上! so organised~ ❤
美中不足既係 - 依個櫃筒無黑色或白色囉!!!!!


雖然我已改用鐵鑊,但仍有保留少量易潔鑊/煲,
之前用開既木鑊剷已太殘舊,我又一早睇中咗依枝Zyliss 矽膠剷......
依枝Zyliss 好我想買好耐架嘞! 不過我一直忍手因為想等有白色,
無奈等極都只有紅色...oh well~

講開又講 - Zyliss 既矽膠產品真係滿分10個good!
當我孖人牌矽膠鑊剷用耐咗,矽膠部份拆舊洗極都立黐黐要報銷,
我枝買咗更耐既Zyliss 矽膠刮刀仍然多年如一日! impressive~


而家唔洗再刻意避開不鏽鋼既utensil 嘞! 依枝又平又靚又好渣手~


屋企得我 + Mr.T 兩丁友,不過杯就多到50個口都飲唔哂!
今次清理廚房都送走咗唔少mugs....... 
 
但轉個頭又買咗4隻返來!
咁實在太靚 + 價錢太平平平平吖嘛!!


農曆新年時先換過爐頭蓋,2個月貨仔又比我唔小心燒燶咗...... =P


最近有個手作仔project,特別買咗咋公仔屋miniature........

浴室套組...金色水龍頭好高貴啊~~~~


我至愛之一黃膠鴨!


咁廁所緊係要有廁紙架啦!


我去果間公仔屋配件店有獨家產品 - 樽裝Irn-Bru! 蘇格蘭風味~
(Irn-Bru - 一種喺蘇格蘭土生土長會愛不釋口 (e.g. Mr.T),但我覺得好難飲既蘇格蘭汽水)


瓷磚一咋...都係個project 要用既!


不過依塊關於廚房,我只係貪得意先買.......


另外有d我想要既配件公仔屋店無存貨,我心急唔想等網上order,
以一套"森林家族"bathroom set 來頂替!


特登走去Hamleys (英國一間大型連鎖玩具店)買森林家族.......
裡面竟然有隻真既pony!


細細隻 + 眼大大,全隻純白色,超可愛~~~~






11 則留言:

  1. 對boot隔住個mon都feel到好皮,真係抵到無朋友.

    回覆刪除
    回覆
    1. 因為皮好軟,所以我塞咗2本對摺既雜誌入去撐住來影相,影出來小腿位好似好闊咁.....但其實依對boots cutting 好靚架! 8->

      刪除
  2. 7磅真係抵到爛!!!!!!!!!!!!
    我都儲好多miniature,個瓷磚好得意呀!!

    回覆刪除
    回覆
    1. 我見到個價錢牌時仲以為自己眼花睇錯! :))

      妳儲果d miniature 係咪rement 食玩? 我反而無儲miniature,但我鍾意自己整! (樹脂黐土迷你食物)

      塊瓷磚係正經DIY shop 買,唸緊可以點用! =))

      刪除
  3. 你地度叫irn blu, 我地E度叫iron brew..... 特級難飲, 陣味好似細個果陣香港D醫生開果D有cherry味既咳水!!! ::kk3161 btw.... . 你果幾隻寶貝鼠鼠呢? 好似好耐都無見到佢地既賣萌相喔.....

    回覆刪除
    回覆
    1. 唔明點解喺蘇格蘭土生土長既人全部都好鍾意? 我有位朋友以前返香港渡假,仲要打箱入倉帶返去飲.....(果時香港仲未有得賣!)

      相一直影咗好多,只係無咩時間揀相 + update! 其實d miniature irn bru 係買來比佢地影相架! ;) (影咗 + 執緊相!)

      刪除
  4. Hi this is Yuki from rsvp communications ltd. We would like to invite you to attend an new product launch event. Would you pls leave your contact to me? My email is yuki@rsvp.com.hk
    Thanks.

    回覆刪除
  5. Used to have a lot of good deals in TJmaxx and Marshall in US but no more..... No more mark downs, mark downs and mark downs......... They will donate it instead of giving customer more mark downs...... One time, I found an all clad pot 8" pot for $25 usd. A handknitted colorful cotton vest for $3.00. Kycero knife for $4.00..... no more good old times.

    回覆刪除
    回覆
    1. donate it? no more good deals then why bother shopping there anymore?
      you remember everything you bought from TJ Maxx and the prices as well!!?!? i go to TK Maxx at least once a week, have found countless good bargains in the past! my favourite shop~ :-bd

      刪除
  6. 英國碼4號? 亞洲人最common 3-5英國碼 (即36-38), 咁d鬼婆咪39碼或以上.....

    回覆刪除
    回覆
    1. 喺英國緊係計英國碼4號啦!
      我無話所有鬼婆腳都一定大過4號,只係比例上洋人女人比較少細腳

      刪除

Related Posts Plugin for WordPress, Blogger...