飲飲食食買買買倫敦2009兩日遊 - 戰利品篇

倫敦兩日遊第3目的 - Shopping 是也!

當然係集中shop 喺蘇格蘭買唔到既野啦!  短短2日收穫相當豐富~~~ 我地2個人得4隻手，再買都無手攞.......

星期四晚深夜起程渣車南下，第二朝星期五清晨就到達倫敦!

倫敦天氣同蘇格蘭截然不同 - 當蘇格蘭仍然又大風又凍......

 而倫敦就藍天白雲，陽光普照，天氣和暖~~~ 絕對係行街shopping 既perfect time!

喺Luton 機場泊好車，就搭巴士向倫敦市中心進發~~~~~

落咗巴士唔夠15分鐘，手上就有第一袋戰利品 - Marc by Marc Jacobs~

Marc by Marc Jacobs 係Marc Jacobs 比較平價既另一品牌......

£20都唔洗就有可以滿足到我少少名牌虛榮心理!  有心型鏡盒1個; 鎖匙扣 + 銀包仔1個..... 抵到爛~~~~

最衰一路行個肚仔一路打哂雷鳴鼓催我去食野............如果唔係收穫應該可以更豐富!

到咗Piccadilly 既Japan Centre，餐廳仲未開門......

 於是把握時間去咗餐廳隔離既Japan Centre 家庭用品部shopping!

上次去倫敦時，家庭用品部喺餐廳樓上，地方淺窄; 去年家庭用品部搬咗過餐廳隔離既舖位，地方大咗好多，貨品選擇亦多咗好多!

裡面有好多貨品都熟口熟面 - 香港吉之島10蚊店貨品! 雖然價錢比香港貴少少，不過因為蘇格蘭無同類貨品賣，所以比多少少錢都無所謂~~~~

今次去倫敦去得真係合時!

以前既Japan Centre 地面係餐廳; 家品部喺樓上; 而樓下係日本食品部;

今次除咗家品部搬咗過隔離舖之外，Japan Centre 剛剛上星期將食品部搬咗過隔離街Regent Street，開咗一間大food hall!

 Food Hall 經常人山人海! 雖然我有好多野想買，不過真係無手攞啊.......

右面既係鰹魚片 (bonito flakes)......Glasgow 泗和行賣得貴到發癲 -細細包都要成£8; Japan Centre food hall 買依兩大包，每包只係£1.95 咋!!!

Food Hall 裡面仲有新增設咗以前無既日本麵包部......

 哈哈~~~~ 連比卡超麵包都有喎! (不過老公話好核突......所以無買到~)

經過Convent Garden Neal Street - 倫敦fashion 集中地......

 對依條靚靚冚裙一見鍾情!!! 減價之餘仲有細碼......注定我要帶佢返屋企~~~~

 動漫展既戰利品 - 除咗一大堆漫畫，仲有少量袖珍食品模型~ 

 臨返上蘇格蘭前，最後衝刺買咗咋壽司帶返屋企! 右面既辣吞拿魚手卷超正~~~

 依間叫做Wasabi 既壽司店平到笑! 各種壽司鎊零銀2舊，仲可以自由組合!

14舊壽司再加1個手卷，只係£12!

倫敦人真係幸福啊~~~~~~~~

多年前V阿姨喺Sogo 買咗盒Chocolate Daifuku (日式朱古力糯米滋)比送比老公，從此老公就愛上咗!

後來喺倫敦出名賣和果子既店 - Minamoto Kitchoan 搵到依種Chocolate Daifuku......

每次我地再去倫敦，都會去Minamoto Kitchoan 及及~~~

不過好可惜老公所愛係季節限定，並唔係每次去都買到!

之前我地只買過2次~ 今次就空手而回........

今次短短2日倫敦之行，喺飲飽食醉，買到手軟之下圓滿結束!

而且仲比我遇到佢......

 佢就係的的式式，外型可愛既環保電動車仔!

依架車仔喺倫敦相當普遍~~~~

車仔細細竟然仲係4坐位~ 有部份泊車位仲附設叉電設置，泊車時可以叉住電補充電源!

Cute 爆~~~~