自製意大利粉 - 基本意粉麵糰

 大家仲認唔認得佢呢?
今日我終於同依個新屎坑開咗光嘞!
依部意粉壓麵機真係好鬼好玩~~~ 短短個零鐘頭就成為咗我既新歡!

我細個時曾經好恨要一個手搞式鉛筆刨!

其實只係為咗玩果個搞動既部份  不過V媽媽以"依舊野咁鬼大舊"既理由唔肯買.......

依部意粉壓麵機正好彌補返我依個童年遺憾! 哈哈~~~~

廢話少講! 開工~~~~~~~~~~~~

大部份意粉食譜都係用中筋麵粉 (plain flour); 亦有人用高筋麵粉 (bread flour)~

 不過根據倫敦意大利餐廳兼意菜烹飪學校 - "La Cucina Caldesi" top chef Giancarlo Caldesi 所講，做pasta 最好用"00 plain flour"!

 我選用McDougalls Premium 00 Plain Flour，英國各大超市有售!

P.S. 意大利麵粉粗幼度標示分為1, 0 & 00; 當中以1最粗，而00最幼細~ 所以做出來既麵條質感最幼滑!

基本意粉麵糰 (3-4人份)

 麵粉200g, 雞蛋2隻, 橄欖油1茶匙, 海鹽少許。

P.S. 材料 + 做法係根據我一本英文食譜書~ 唔知係咪西方人細食......個人覺得依個份量並唔足夠4個人，只係啱啱好2人份啫! 大家可以依住 - "每100g 麵粉用1隻雞蛋"依個準則來增減材料份量~

1. 先將上述所有材料放入mixing bowl。(有人話要將麵粉放喺平面，挖一個"井"來放入濕材料.......不過其實並不需要! )

2. 先用麵糰膠刮將(1)的材料略略拌勻，然後改用手搓合成麵糰。

3. 乾淨平面灑上麵粉，麵糰放在平面上搓揉至光滑無粒; 一邊搓要一邊逐少加入少量水份，注意麵糰唔可以太乾或有裂痕，直至麵糰光滑如BB仔皮膚，大約需時8至10分鐘。

4. 將搓好的麵糰放入密封三文治袋，讓麵糰鬆弛30分鐘。

5. 取出麵糰大概分成2至3份; 用手將麵糰壓扁，在麵糰兩面灑上少許麵粉防黏。

6. 同樣在意粉壓麵機滾軸部份灑上少許麵粉，並將厚度setting 轉去"1"，放入(5)的麵糰先壓一次。

7. 壓完一次的麵糰薄片會呈不規則"牛脷形"。

8. 將麵糰薄片頭尾摺向中間，放入壓麵機再壓一次後，讓形狀較為平均。

9. 將壓麵機厚度setting 轉去"2"壓一次; 再轉去"3"壓一次......如此類推~ 直至麵糰薄片壓至所需厚度。

 P.S. 注意步驟(9)一定要go through 每一個號數 - 號數越大越薄~ 作用為增加意粉長度 + 加強口感!


切割意大利粉

我依部意粉壓麵機隨機包埋一個可做2種意大利粉既attachment - Spaghetti & Fettuccine (絲帶闊麵)~

今日第一次用部機，想睇吓唔同效果~ 所以一次過整哂2種唔同意粉!

Spaghetti......

Fettuccine......

壓出麵條後，要在麵條上灑上麵粉，用手略略撈勻防止麵條黏結。

 放在通風處或掛在意粉架上，讓意粉風乾最少1小時，即可放入加入鹽的滾水內煮食!

提提你NOTE:

- 煮滾一鍋水，加入海鹽，放入風乾好的意粉煮3至4分鐘即熟;

- 若不立即煮食，可將麵條放在雪櫃普通格保存2-3日;

- 另可將做好的麵條放入雪櫃雪至完全微微硬身，再放入三文治袋內密封，儲存在冰格;

- 新買返來既意粉壓麵機，第一次用之前先要進行"洗機" - 不過意粉壓麵機切忌用水清洗!!!!!

"洗機"既方法為: 先用乾布抹乾淨意粉壓麵機，再做一個乾爽不黏手既麵糰，每一個度數 + 配件重復壓數次~

壓出來既麵糰上會有灰色，依d係製造意粉壓麵機生產過程上殘留既機油!

即晚煮咗整好既意粉來食!  

我將2種意粉撈埋來煮  - 忌廉煙三文魚大蝦意粉~

可能我無用意粉架，所以意粉全部曲曲地~~~ 尤其係spaghetti......煮完後似公仔麵!

下次要攤直來風乾至得!!!