自製鹹蛋 - 鹽水浸製法

早幾日有網友問我 - 有無試過自己整鹹蛋?

我一直覺得自己整鹹蛋唔化算，因為中式超市鹹蛋約£3.8X一盒 (一盒6隻約$50); 而超市既新鮮鴨蛋大約£3一盒~  自己整又要花時間醃製，倒不如買現成鹹蛋來得方便!

屋企鹹蛋存貨無哂; Weekend 去中式超市又忘記咗買......於是今日戚起條筋，決定嘗試自己整鹹蛋! 

一直都見到Tesco 有鴨蛋賣，早排我都買過一次來煎蠔餅~

點知今日去Tesco 時，先發現佢地唔再賣鴨蛋!!!!

因為無demand 喎.......

 唯有買咗盒"加大"雞蛋來代替鴨蛋~

 頂! 返到屋企先發現有一隻爆鬼咗!!!!!

本來我想試吓比較少人用既乾身"裹鹽法"......不過蛋包咗鹽後要曬曬太陽，但今日天陰陰無乜陽光，所以今次用返較普遍既"鹽水浸製法"~

開始整嘞! 醃6隻鹹蛋......

1. 先將鴨蛋 / 雞蛋洗乾淨，徹底瀝乾。
盒蛋有1隻爆咗，所以我用隻早幾日買既雙黃雞蛋補上! 反正我鍾意鹹蛋黃多過鹹蛋白~~~ 唔知雙黃鹹蛋會係點既呢?


2. 我用既水 + 海鹽比例為7:2~ e.g. 700ml 水, 200ml 海鹽;

P.S. 網上research 時，發現各人水 + 海鹽比例都唔同! e.g. 4:1, 6:1, 3:1......今次我採取中位數3.5:1 (即7:2)

3. 將水、海鹽和1湯匙花椒拌勻煮滾後，離火放涼。

4. 待(3)的鹽水全涼後，用滾水將醃浸鹹蛋的容器內外消毒。

5. 將鴨蛋 / 雞蛋完全擦乾後，整個蛋先沾上一層紹興酒。

6. 小心將蛋放入容器內，倒入(3)的鹽水，再加入3湯匙紹興酒。

7. 關蓋密封，並標明醃製日期; 置於常溫下醃浸3至4星期即成生鹹蛋。

提提你NOTE:

- 鹽水一定要蓋過全部蛋;

- 醃浸完畢後試味，如認為夠味就要取出其餘鹹蛋，抹乾放進雪櫃保存~ 不然蛋會過鹹;

- 買雞蛋時保留一個雞蛋紙盒，可作保存鹹蛋之用 ; 鹹蛋可存於雪櫃約1個月。
啱啱今日先醃，但我已好鬼心急!!!! 
一個月後再向大家報告鹹蛋成果!