13年前9月9日(99年9月9日)，
一個當時處於水尾青春期既0靚仔，
戰戰兢兢地問一個晨早已過咗青春期既女青: Will you be my girlfriend?
女青曾經發過誓唔會同年紀比自己細既人拍拖，
不過水尾青春期0靚仔擁有一對有魔法既bling bling 大眼睛，
身經百戰既女青最終招架不住(或頂佢唔順!)，
跌咗入水尾青春期0靚仔bling bling 大眼睛既圈套!
一眨眼就足足13年......
13年過去.......女青，已經變成咗中女;而水尾青春期0靚仔亦變成一個個肚有好多毛，
令中女覺得佢好sexy 好turn on 既男子漢;
有時多毛男會突然攬住中女，
以一口好似好流利既法文，對住中女疑似綿綿情話.......
由於中女完全唔識法文，
根本唔知多毛男講乜，亦唔知佢講得啱唔啱......
雖然中女會以廣東話同多毛男講: 都唔知你噏乜春!
不過中女心裡會暗自甜絲絲覺得好冧~~~~
向多毛男回贈一個香吻......
無論多毛男工作有幾忙，
每日中午時份都一定不忘打個電話比中女，
問吓中女"妳食咗lunch 未呀? 食咗乜野呀??"
之後順便問埋晚餐有乜野食......
雖然好多時中女會聽到電話另一邊傳來茅廁沖水聲......
不過多毛男每日由茅廁打出既電話，
會令中女感覺非常窩心~
多毛男又會日日幾次Whatsapp or Line 無聊message 比中女，
中女知道正為事業努力拼搏既多毛男，
無論幾忙都會時時刻刻記掛住自己.......
多毛男每日放工返到屋企，
無論中女晚餐煮d乜，
多毛男一定會一邊大啖大啖地捧場，一邊誇張地讚好味，
任何時候多毛男都係中女既最大粉絲，
逗得中女心花怒放!
13年下來，多毛男依然無手尾、大頭蝦、無記性........
不過喺bling bling 大眼睛魔法之下，
多毛男既無手尾、大頭蝦、無記性.......
喺中女眼中通通神奇地變成可愛優點!
令中女心甘情願為多毛男執手尾~
皆因多毛男仍然每日氹得中女哈哈大笑，
令中女非常享受依個中咗13年既圈套~
13年來中女仲未被多毛男激死，
睇來下一個13年都應該唔會有問題!
-----------------------------------------
Mr.T公司似乎好鍾意喺9月第一個weekend 搞event!
連續2年我地既拍拖週年都係weekend，Mr.T公司都要整個Mr.T非出席不可既conference......
今年9月9日係星期日，
喺Marriott Glasgow 有個携眷聚餐conference，
原本我都有份出席，
不過晨早撞正"親友來訪"我臨時縮沙，
喺屋企休息到黃昏後啪咗2粒必理痛，
先會合開完conference 既Mr.T食晚飯!
原本Mr.T一早訂咗上次我地試過好鍾意既海鮮餐廳Creedence，
點知我地去到時，發現餐廳當晚竟然比人包咗場!
侍應翻查訂枱紀錄.......
發現有個moron 將我地既booking 訂咗下個星期日!
唔緊要啦~ 依間無得食咪食過第二間囉!
佢地好有禮貌不停同我地道歉，
我地遲d仍然會再返去幫趁~
於是又走咗去食壽司!
(食埋依水暫停嘞! 開始感覺有d厭咯.......
)
)
雖然今次唔係一札花，
不過係老公至少一個月前已準備好既自製乾花~
點解我知道"至少一個月"?
因為有個無記性既人將乾花夾咗喺工作記事簿上，
一個月前有一日，有人漏咗記事簿喺屋企，記事簿內有當日要用既重要資料，於是打電話返來叫我代為翻查資料......
(我有篤爆嗎? 當然無啦!
)禮物欠奉，暫時無乜野特別想要~
反正我平時都係想要乜就買，可以免禮嘞!
之前Mr.T去咗南下做野大半年，
大半年來每星期只見一兩日，
終於等到Mr.T回歸蘇格蘭，
終於都回復從前每晚臨瞓合上眼前 + 每朝一早醒來撐大眼.....
就見到Mr.T既日子!
依大半年來令我 + Mr.T更加珍惜大家相處既時間;
令我學懂去邊度食飯、有無禮物收、有無花收.......
全部都唔再重要! 只要身邊係一個對既人~
因繁忙工作多咗對大眼袋，不過魔法仍然存在啊!
我愛你~
沒有留言:
發佈留言