阿V奔月

一年容易又中秋~
話咁快仲有唔夠半個月又到月餅節嘞!
眼見好多朋友9月頭甚至8月尾已紛紛開始焗月餅，
但我完全無汲取往年既教訓，
如往年一樣懶鬼上身拖得一日又一日......
加上今年6299返咗香港整少份我就更加懶~

上星期尾終於頂唔順自己咁軟皮蛇，
摷定d月餅模出來警剔自己真係要開工嘞!!!!

第一水只整咗手10隻單黃蓮蓉月，
依盒4隻送比朋友; 另外6隻未到中秋已經比我 + Mr.T食鬼哂!

整緊月餅時忽發奇想......
叫Mr.T幫我畫張"阿V奔月"圖來贈贈慶~

真係不得不讚吓自己老公!
我咁遲落order，佢畫吓停吓食吓零食hea 吓......
都可以一晚就完成依幅令我滿意到尖叫既圖!! 大愛呢~ ♥

一早約咗朋友第二日攞月餅比佢，
見幅圖反正咁快畫起咗.......

一於當做月餅盒封面啦! (古裝既我可愛嗎? )


再接再厲第二水整咗12隻......

今水用上年訂製既私家模，我要讚自己印模印得好靚啊!
呵呵~~~~~~

話咁快金黃月餅又出爐嘞!


舊年寄咗盒月餅比V爸爸V媽媽，
收到後佢地同舖頭其他人分甘同味，
大家食完後都讚好食!

早幾日V媽媽收到盒某出名酒店奶皇月餅(唔係乜乜樓! )V媽媽打來同我講: 把鬼~ 阿妹妳整d月餅好食得多!!
V媽媽話一年一次既傳統節日，
只有傳統蓮蓉月先有資格叫做月餅~
其他咩冰皮月餅...奶皇月餅...雪糕月餅......
喺V媽媽口中一律係"鬼五馬六"!

依盒6隻"李"既月餅寄比V爸爸V媽媽~

逐隻獨立包好，盒內再墊啪啪紙，咁就唔怕整爛嘞!

每隻月餅蘿柚例牌有我個嘜頭，以明正身係我親手整既!

最後點少得老公親手畫既阿V奔月圖呢?
咋咋淋火速寄去香港~~~~~~

忍唔住自己又食咗隻!
自家製既鹹蛋黃紅卜卜如果汁糖，好味~~~~


每逢佳節倍思親......
其實由細到大我都唔叫做鍾意食月餅，
來英國前既中秋，我甚至試過一啖月餅都無食!
喺英國生活耐咗，明明依度無乜中國傳統節日氣氛，
但我反而越來越重視依咋中國傳統節日，
今年中秋未到，不過我已經食咗5個月餅........


廣式月餅做法click here~