二人世界晚餐週記

雖則叫做"晚餐週記"，
不過由於我唔係每晚都煮飯，
所以唔係一星期7餐!
好似剛過去一星期我只煮咗3餐......

9月11日二餸一湯: 蕃茄紫菜滾魚腐; 土魷蒸肉餅; 西芹炒魚柳
唸唔到煲咩湯就決定滾湯~
簡簡單單蕃茄、紫菜、魚腐 - 依幾樣野我屋企常備，
幾時想飲依個湯都得!

好耐無整依個突然好想食!
今次無落冬菇但落多咗魷魚仔乾，非常鮮味~

最近成日都想食魚，不過洋人超市鮮魚種類有限，
買急凍魚柳就最好，無骨啖啖肉，價錢又平，
而且仲有好多煮法呢!


雖然只係二餸一湯，不過有湯有肉有魚又有菜，
仲可以煮少一味~

蕃茄紫菜滾魚腐食譜click here~

土魷蒸肉餅食譜click here~

西芹炒魚柳食譜click here~

9月13日碟頭飯: 白汁雞皇飯

最近天氣開始涼咗少少.......

依個飯有菜有肉又有汁，熱辣辣香噴噴，好滿足!

白汁雞皇食譜click here~

9月14日二餸一湯: 蕃茄紫菜滾豬肝; 幼枝西蘭花炒牛肉; 芝士蕃茄濃湯焗魚柳

早幾晚滾湯時浸多咗紫菜用唔哂放咗喺雪櫃，
是晚再滾多次蕃茄紫菜湯，不過無魚腐，
所以改用豬潤~ (又唔記得影相!!! )

FB見到朋友整芥蘭炒牛肉，搞到我又想食!
不過用幼枝西蘭花代替芥蘭，其實味道都好相似~

老公食咗一塊牛肉問我: 哇~ 好tender 呀! fillet 來架?
我極少買牛柳，因為價錢實在太貴，用來炒我更加唔會用牛柳!
一向我都係用肉眼扒~
其實只要醃得得宜，肉眼都可以炒到牛柳既效果!

又係魚柳!
最近發現超市急凍魚柳又平又大包，實在太抵食嘞~~~~
依味只係我忽發奇想亂煮一通，
估唔到效果唔錯喎! 香噴噴酸微微既芝士蕃茄濃汁，
配埋啖啖肉魚柳，真係好好送飯呢!

蕃茄紫菜滾豬肝(參考食譜)click here~
幼枝西蘭花炒牛肉(參考食譜)click here~

芝士蕃茄濃湯焗魚柳食譜click here~