陳皮五香鴨腿瓜粒湯飯

陳皮鴨腿湯飯係我小時候其中一個最愛!
不過英國中菜館餐牌上一定唔會有依味;
近年返親香港都唔多覺有，
所以自從我來咗英國之後，一次都無食過鴨腿湯飯.........

已經唔記得對上一次食鴨腿湯飯係幾時咯~
不過我對鴨腿湯飯有一個好深刻既回憶......
小學時代喺太子羊城酒家(已結業!)，
一路喊一路食面前果兜鴨腿湯飯
(大概剛被V媽媽狠狠教訓咗鑊金既! )
雖然記得自己當時喊得好淒涼，
但更加記得果兜鴨腿湯飯既美味!
(咁算唔算係美好回憶呢? )


好開心自己可以煮到同回憶中一模一樣既鴨腿湯飯!
以後隨時都可以重溫依個我小時最愛既味道咯! 呵呵~~~~
(As long as 超市有鴨腿賣......)


--------------------------------------------------------


1. 鴨腿2隻去掉多餘脂肪，洗淨抹乾。

2. 用五香膏、紹興酒、糖、少許雞粉、生抽和老抽抹勻放雪櫃醃過夜。

我用依隻BART 五香膏，亦可用普通五香粉!

3. 用廚房紙吸去多餘醃汁，燒熱油鑊將鴨腿略煎至兩面金黃。


4. 預熱焗爐180C，將煎好的鴨腿放在烤架上，放入焗爐烤15分鐘。

鴨腿烤過後大部份油份會流出，鴨腿湯就唔會油膩架嘞~


5. 冬菇6隻浸軟後搾乾水切粒; 冬瓜適量去皮切粒備用。


6. 鍋中下少許油燒熱爆香薑2片，再下冬菇粒爆炒一會。


7. 加入清雞湯(大紙包裝)和清水各1L煮滾。


8. 下冬瓜粒和(4)已烤好的鴨腿，加入果皮1塊，待湯再大滾後轉小火滾30分鐘即成鴨腿瓜粒湯。


9. 白飯盛入碗中淋上鴨腿瓜粒湯，放上鴨腿再灑上新鮮切碎莞荽即成。