結婚戒指6歲了! (2012年10月11日)

上星期一(10月8日)Mr.T一早就出咗trip，
原本到13日星期六先會返來，
11日星期四係我地結婚6週年紀念，
當日湊巧我有醫生appointment，
其實appointment 我自己去都得，
不過Mr.T星期三深夜特登山長水遠返來，
陪我第二日去睇醫生兼過結婚週年~

星期四天氣好好，睇完醫生我地去咗麥麥歎早餐!


食完早餐行咗一陣街......

Mr.T吼我行緊TK Maxx，"借屎遁"偷偷走去買咗份禮物比我!

蝴蝶綁得咁靚，真係有d唔捨得拆呢......

巴黎鐵塔lucky charm~ 大愛! ♥

我條Sweetie Bracelet 又多一個charm 嘞!
巴黎鐵塔太新淨，同條鍊 + 其他charms 有色差......
不過我鍾意黃黃地，希望巴黎鐵塔快d變黃黃地~

早幾個月我喺南下見過依套心型量杯，一見已經好鍾意~
不過十幾鎊咁鬼貴，我真係唔捨得買......
果日竟然比我喺TK Maxx 見到......累飯筍價£2.99!
感覺好似TK Maxx 同我慶祝結婚週年! 哈哈~~~~


本身出緊trip 既老公其實忙到甩碌，
佢為咗陪我睇醫生之前一晚漏夜趕返來，
有大咋文件未有時間整理......
行咗一陣我地就返咗屋企，
花咗大約4粒鐘我幫老公手夾手夾搞掂哂大咋文件，
老公讚我做野又快手又醒目，
醒過佢d staff 多多聲，哈哈~~~~~


搞掂哂d文件後，5點零鐘老公又要趕返去繼續出trip.......
雖然當時落緊毛毛雨，但我堅持要送老公去搭車~
一來唔捨得老公，二來心痛老公為咗我要咁頻撲，
我覺得老公真係好好好鍚我!送完老公搭車自己一個人行返屋企既路上，唸唸吓我都唔知係感動定係掛住老公.......
一個人偷偷地喊咗出來~
(好彩當時條街無咩人啫! )


有云"一日不見，如隔三秋"，
我同老公兩日無見，足足隔咗六秋!
等到頸都長咗幾呎，老公星期六傍晚終於返咗來嘞~
老公入門口第一句就同我講: Honhon~ I missed you so much! 雖然只係走咗2晚，但覺得好似好耐無見過妳!
之後老公送我一份好特別既小禮物......

依個係用天然蘇格蘭野花heather (石南花)壓縮而成既寶石鍊墜~



石南花係一種蘇格蘭郊外常見既紫紅色野花，
對蘇格蘭有好大生態價值~
(圖為幾年前我同老公遊車河時喺山邊摘返屋企插既! )

製造依種叫做"Heathergems"既寶石，
首先會採集一d年老既石南花枝幹，
枝幹經修剪 + 清潔後，加入天然染料染色，
再以80噸壓力壓縮成塊形狀，
然後再經切割、打磨、組件等工序，最後成為一件首飾~

P.S. 年老既石南花生態價值低，
採摘咗後可騰出更多空間讓年青石南花生長，有助生態發展~

每一塊Heathergem 顏色紋路都唔相同......

我依個鍊墜兩面顏色唔同~

老公知道我對朱義盛敏感，特別將銀鍊換成金鍊~
我覺得金鍊同依個鍊墜既顏色更加相襯呢!


我都有準備迎接老公返來架......

我一早整定個遲來的6週年彩繪蛋卷(第一次整! )，
等老公返來一齊點蠟燭切蛋糕~

不經不覺左手無名指上既結婚戒指已經帶咗6年~
好多朋友覺得我 + Mr.T比6年前更肉麻!
吹咩~~~~ 係要痺屎你地!!