素鍋燒烏冬

天氣凍凍地想食打邊爐......
不過撞正初一十五食齋既日子，咁點算好呢?
邊個話食齋唔可以打邊爐架? (自言自語......)
其實齋既打邊爐材料都可以好豐富，而且仲好好味呢!
齋火鍋材料隨意，如果食蛋牛奶素既話，
仲可以加雞蛋或玉子豆腐~

今次我整既係花齋全素，
材料有: 菠菜、花菇、竹笙、木耳、豆腐卜、煎豆腐、金菇......

仲有上次食過依隻全素水餃......
再加包烏冬落去，食完暖笠笠又飽肚!


1. 花菇、木耳和竹笙洗淨浸軟，搾乾水份備用，保留浸冬菇的水。


2. 菠菜洗淨切段; 豆腐卜切半; 實豆腐切成適當大小，煎至金黃備用。


3. 燒熱鍋爆香薑片，下花菇、木耳、竹笙和豆腐卜炒一會，下糖和素蠔油調味兜勻。
P.S. 素味道比較清淡，先將部份材料加調味略炒，可將味道餵入材料中~


4. 下浸冬菇的水蓋過材料煮滾，下素水餃、煎豆腐、金菇和烏冬麵滾2分鐘。


5. 最後下菠菜煮至翻滾，用海鹽或香菇粉調味即成。