筍尖炆五花腩 (高速煲)

我唸無人會好似我咁.......
依個高速煲買咗差不多6年，尋晚先至第一次開光!

當初買佢因為:
(1) 慳火;
(2) 佢勁靚仔~ 尤其鍾意佢唔似其他高速煲咁有條長柄!

不過買咗咁耐我都未用過係因為:
(1) 唔識用 - 佢張說明書實在簡陋到似乎只係比本身已經識用高速煲既人睇;
(2) 怕死!

其實4年前我都寫過篇blog 請教網友點用高速煲，(網誌)
不過由於網友用既型號同我個唔同，
佢地講解完我都唔係好明.......
未完全清楚之前我完全無把握!

早幾日喺士多房見到依隻煲，
於是係咁二上網做吓research，
睇吓搵唔搵到依個型號既用法，
6年前搵唔到既野，本身我都打定輸數，
唸住搵唔到就擺隻煲上ebay 賣咗佢.......
點知竟然比我搵到一模一樣型號既YouTube demo!

就係咁......經過咗6年被埋藏喺士多房既日子後，
尋晚佢終於有幸踏入我個廚房一展身手嘞!
第一炮先來個"筍尖炆五花腩"......

1. 原條五花腩汆水後，取出用凍水沖洗淨，切成麻雀大細。


2. 用胡椒粉、糖、生抽、珠油(唔係豬油呀! )、少許雞粉和麻油醃最少30分鐘。

珠油又稱黑珠油或滴珠油，一種濃稠如念慈庵帶甜既調味料~
用法同老抽差不多都係上色作用大於調味，
不過我個人覺得珠油上色效果及味道都比老抽好，
而家無論炒麵或炆卥肉類，我都以珠油完全取代老抽!


3. 水浸筍尖瀝乾，切塊備用。


4. 燒熱高速煲後落油，爆香薑片、拍扁蒜頭數瓣和八角1粒。


5. 下五花腩肉爆炒至金黃灒紹興酒，加入筍塊炒勻。


6. 將醃五花腩之醃汁加入煲內，加水至浸到五花腩和筍尖最少一半。


7. 勺量下多少許珠油，加入冰糖兜勻。

8. 蓋好煲蓋(自動鎖煲!)，大火以2度加壓。

9. 黃點升起後，再待箭咀所示的圓孔有蒸氣噴出，轉小火開始計時煮15分鐘。

10. 15分鐘後先熄火，可將灰色制轉向蒸氣符號人手減壓; 或待10分鐘讓煲涼後黃點下降(自動減壓)。
P.S. 我要炒其他餸，所以無用人手減壓~


11. 減壓後開蓋，再開火煮滾，勾粟粉水芡兜勻至汁稠，上碟即成。



高速煲用後感......
用過後對高速煲既恐懼感已經所餘無幾，
我覺得幾好用，不過暫時仍然唔多敢用人手減壓~
肉的確好快就炆得淋，但論入味程度始終同慢火炆有分別，
我唸醃肉時調味要重手少少!
不過我依種鍾意食炆餸既人，下下炆野都要粒幾兩粒鐘，
若再加埋煲3粒鐘老火湯......電費真係好襟計!
經過今次高速煲初體驗，我決定keep 住個煲唔賣佢豬仔啦!