2013年7月10日星期三

拉麵與牛歡喜 (附食譜)

7月3日: 照燒雞扒蒜香豬骨湯底拉麵

第一次自煮日式拉麵..........

雖然拉麵唔係自家製只係現成貨........
(話時話依隻拉麵幾好食! 下次都會買返佢~)


不過第一次自己熬既豬骨湯底白雪雪又香甜,好有成功感!

真係忍唔住要讚自己整得好好味~~~~~


挑~
自吹自擂...樣好就代表好味架嗱?
我有證據架........


有人放工後特登兜去買咗一打Krispy Kreme Original Glazed比賢妻,
返到來忍唔住每人吞咗2隻,然後賢妻先去淥麵.......



當賢妻自己果碗麵仲有1/3時,Mr.T果碗已經變成咁!
依個應該算係好味既證據嘞啩?


一包拉麵有3個; 咁啱我熬既豬骨湯底啱啱好夠3碗麵!

只係無哂雞扒......其餘粟米 + 昆布都有剩,
烚多隻蛋,整咗碗無肉拉麵比自己做午餐!

照燒雞扒蒜香豬骨湯底拉麵食譜click here~




7月5日: 格格安格斯西冷碟頭飯

是日本來買咗餸煮飯,
不過99突然來電約我去逛Costco........



逛完後仲醒咗我2大塊靚靚28日熟成安格斯西冷.......



臨時改變主意整快手碟頭格格牛扒飯!


好牛味! 讚~


無菜點算??? 有飯後果嘛!


99醒既勁甜橙 + 勁甜車厘子.......


仲有我買既超級勁甜菠蘿!
我 + Mr.T不約而同地話 - 從來未食過咁甜咁香既菠蘿!
平時唔鍾意食生果既我都覺得依盒菠蘿好正好正~~~



7月7日: 鹹酸菜炒牛肉; 沙茶醬炒蜆; 清炒學斗白

是日星期日,本來我唔煮飯,
不過之前買咗既餸,原本打算星期五煮,
臨時煎咗格格牛扒無煮到......星期六全日躝咗街又無煮到.......
餸菜再留就唔新鮮,所以點都要星期日晚煮咗佢!

湯就唔煲嘞!
因為第二日星期一係初一食齋; 星期二去燒野食,
就咁三餸晚餐啦~


雖然仲未有機會試真正既"牛歡喜",
不過依味鹹酸菜炒牛肉應該都有9成風味啩!
鹹酸菜炒牛肉食譜click here~



星期五喺Costco買既急凍蜆.......


唔想剁蒜頭豆豉,加上唔係好想食豉椒炒,
試吓用沙茶醬來炒,效果出乎意料之外好味!
Mr.T都話好正~ 不過今次太猛火炒到無汁乾哂,
下次要小心d,有汁應該會更加好味!!
沙茶醬炒蜆食譜click here~


白菜我只鍾意食
細細棵既白菜仔,或者依種肥肥短短既學斗仔!
所以見親有
學斗仔賣我都會買~



7月8日: 蘑菇意粉

是日初一食齋.........

星期五喺Costco買咗盒巨型Portobello蘑菇.........



巨型得好緊要! 仲大過麥漢堡包........
本來想用來整忌廉蘑菇湯,不過食齋唔食得忌廉........



切咗一隻,就咁用橄欖油來炒意大利粉,
只用素菇調味粉 + 黑胡椒調味~
意粉不多,不過隻菇真係好大隻,食一隻已經飽飽地........





 photo Untitled-1-1.jpg

5 則留言:

  1. Kanny...yan's Blog2013年7月10日 下午7:49

    白雪雪的豬骨湯好吸引, 我好怕食拉面, 因為怕D湯好油, 但你果個好正呢~~
    [版主回覆07/12/2013 03:24:38]要d湯唔油好簡單架咋,煲好湯後攤凍,包好放入雪櫃,等d油凝固後浮面後撇走,再煲返滾,咁d湯就唔油架嘞~ [(winking)]

    回覆刪除
  2. 個豬骨湯底好濃好正喎,又唔會出面街食咁油... 不過要煲成六個鐘, 真係好好心機先得呀! 你煲完湯既粟米仲食唔食呀?
    [版主回覆07/12/2013 03:21:57]用咁多料煲足6粒鐘緊係濃啦!
    要唔油好簡單,煲好湯後攤凍,包好放入雪櫃,等d油凝固後浮面後撇走,再煲返滾,咁d湯就唔油架嘞~
    d粟米我都有食架! 不過4條咁多緊係食唔哂啦!

    回覆刪除
  3. 嘩....隻菇大到好似會食人咁!有d驚~
    [版主回覆07/12/2013 03:17:39]超市成日都有得賣依種大蘑菇,不過咁巨型我係第一次見咋!

    回覆刪除
  4. 原來忌廉唔係齋??
    [版主回覆07/11/2013 17:57:49]一切來自動物身上既食物都唔係齋!
    蛋+奶只係素食,叫做蛋奶素;
    齋除咗唔食一切來自動物身上既食物之外,五辛(即蔥、蒜、洋蔥、韭及蕎頭)都唔可以食~

    回覆刪除
  5. 第一次見咁巨型Portobello蘑菇!!
    [版主回覆07/12/2013 18:09:29]我都係第一次見咁大隻!

    回覆刪除

Related Posts Plugin for WordPress, Blogger...