2013年7月9日星期二

一枝獨秀



我好鍾意花!

除咗白菊花之外,我幾乎咩花都鍾意~

上星期一(7月1日)同Mr.T出完街渣緊車返屋企,
經過屋企附近一塊圍咗鐵絲網
閒人免進既私人爛地......

見到爛地正中間有一朵好靚既桃紅色花花開得好燦爛!


相係喺鐵絲網外勁zoom過去影既,
始終有點距離,睇唔係好
清楚佢係咩花????

有網友話佢係西洋牡丹;
我比相99睇過,佢都話係西洋牡丹.........


自從發現咗花花後,我出親街就算唔順路,
都會刻意特登兜路去塊爛地望吓朵花花~
我覺得佢咁靚但生喺塊爛地度感覺好浪費啊!

於是心裡盤算營救花花計劃........
同Mr.T商量後,決定星期日清晨去營救花花!

點解唔夜晚去呀?
星期六夜晚係洋人出街蒲既黃金時間!
我屋企附近有好多clubs + pubs.......
夜晚黑媽媽睇野唔清楚,唔方便行事,
比人誤會我地想爆格咁就大鑊了! (爛地隔離係住宅......)
蘇格蘭既夏天清晨5、6點天已經完全光哂,星期日清晨,夜蒲既人已收檔歸家覺覺豬,
唔到晏晝都唔起身..........依個時候行事最適合不過!


就決定星期日清晨啦!
於是星期六晏晝去踩線,睇吓邊個位容易d入去........

發現只短短5日,花花由原本1朵變成4朵!!!!!



原本果棵開多咗一朵花花;


不遠旁邊另外又生咗2朵盛開花花!


較定鬧鐘星期日6am出門口........
身手敏捷既Mr.T兩三下手勢就攀過咗高高既
鐵絲網.......
再兩三下手勢就將兩棵花花連根拔起,前後唔洗5分鐘........


6.10am花花門已經喺我屋企浴室浸緊水!


有一朵比風吹斷咗,我用花樽插起佢~


花花開得好燦爛好靚! 不過....我硬係覺得佢唔似西洋牡丹!


尤其係依個波波.........令我懷疑依朵咁靚既花花其實係.......


名副其實既鴉片花(重瓣)or 罌粟花,又名大煙花~


之前我影過既野
罌粟(網誌),花梗、花莖、花蕾上都有細絨毛;
不過今次依隻
重瓣罌粟花梗、花莖、花蕾全部都好光滑.......

若割開依個波波,會流出白色或黃色汁液,
經提煉後可以製成鴉片、可卡因、海洛英、嗎啡.......



我地將花花攞咗去99屋企種喺花園,
希望佢繼續開靚花花啦!


P.S. 喺英國種鴉片花係合法既!
若種來作提煉毒品用途先至犯法~




Speaking of 花花........

4月中買咗盆白玫瑰,
剛買返來時開得好靚有好多朵花!
殊不知個零星期後.......花開始一朵朵謝,葉又變黃,
花蕾開到一半已凋謝.........完全唔知咩事!!?!!?


本來準備入垃圾桶,但我唔忿氣又有dd唔捨得!

而且我發現每次幫屋企植物淋水時,
依盆玫瑰特別輕 - 因為d泥乾哂.......
所以我懷疑係我淋唔夠水!



於是我先剪哂枯黃既枝葉,再keep住日日淋水,
除此之外無乜點理佢........


皇天不負有心人!
幾個星期後生咗一個花蕾,慢慢開花.......






雖然只係得佢一朵,不過至少開得成花,
枝葉又無枯黃,而且開始越來越大棵!
所以早幾日幫佢換咗個大d既花盆
~






Photobucket

15 則留言:

  1. 令我想到陳秋霞的一首金曲-罌栗花-誰將罌粟花種於路旁,任令他生長....
    [版主回覆07/12/2013 05:34:53]哈哈~~~~ 而家應該唱"誰將罌粟花種於爛地,任令他生長...."

    回覆刪除
  2. 我鐘意種的有香味的花,可惜我天生蠢頓,一的地唔惜打理佢地。一的cooking show, the chef cut their herbs from their garden or balcony, 好fresh. 但的乜泥加乜水,太復習啦。我試過買一盤好靚的chili, 因有蟲,我用殺甲曱的殺蟲水。the plant died.
    [版主回覆07/12/2013 05:36:12]辣椒我種過2次,但2次都有芽蟲!

    回覆刪除
  3. 我覺得種花種乜都好係要好有心機好有耐性。
    我以前都曾經有一剎那好想開始種下野,但又驚自己三分鐘熱度或做左植物殺手,最尾乜都無種過。

    Btw, 有個煮食問題想請教下你,我炒腐乳通菜時煮完d菜永遠都黑黑地咁既色,我見你炒完都仲係翠綠色,係咪有咩秘訣架?
    [版主回覆07/17/2013 00:37:06]仙人掌耐旱,好易種架! 係一個好開始~
    洗完菜一定要瀝乾身先好炒,否則菜本身已有水份,炒時會出水; 再加埋洗菜殘留既水...基本上係半烚半蒸菜,都唔係炒菜來咯!
    通菜就更加,鐵質高,唔夠乾水加速氧化~
    [燒肥亞回覆07/16/2013 16:19:11]等我買既仙人掌試下先

    真係唔講都唔知要加醋呀!可能我平時d菜唔夠乾身,我再試下先。
    多謝你教我呀
    [版主回覆07/12/2013 05:05:37]其實要試過先知自己係咪植物殺手架嘛! 未試過又點知唔得呢?
    因為通菜含高鐵質,炒時會氧化所以容易變黑!
    首先洗完既菜一定要瀝到好乾; 第二落多少少油,第三隻鑊要燒到好熱 - 依兩點可以快手炒熟d菜; 第四唔好加水,加少少醋,只要隻鑊夠熱,醋好快會蒸發,唔會影響味道架~

    回覆刪除
  4. 好有心機呀~
    怛我係植物殺手~種乜死乜...
    [版主回覆07/12/2013 03:57:07]其實我除咗心機之外,根本對種野一無所知架!

    回覆刪除
  5. 爛地上竟然有啲顏色咁靚既花花〜咁呢種花其實都幾粗生架喎
    你地都幾鬼馬,偷偷入去採花〜 嘻嘻〜
    記住得閒入去你99 個花園度睇下啲花花,update 下生長情況俾我地知喎
    [版主回覆07/12/2013 03:56:16]係呀~ 我都覺得佢好粗生,如果唔係唔會幾日間開咗咁多朵!
    見到朵咁靚既花花喺塊爛地度,個心好唔舒服嘛.....

    回覆刪除
  6. 初睇我都覺得係牡丹,不過同你一樣睇到你影個果實都估係鴉片花,有"毒"花果然係靚D.
    [版主回覆07/12/2013 03:54:46]個個都話係牡丹,直至見到個波波.....

    回覆刪除
  7. V,

    我今年都買咗一盤和你一樣的白玫瑰,不過我種咗在前園,我唔敢種在家中,唔知點解我屋內種親花都瓜,或者有虫,總之就係唔會生存,但綠色植物就好鬼興旺,但我個心又好恨家中有點花點綴一下, ,種室外都好過冇啦


    久不久就很想跟你打個招呼

    Agnes
    [版主回覆07/12/2013 03:54:11]屋裡面種竟然都有蟲!!?!?
    想家中有花點綴好容易啫....插花咪得囉!

    回覆刪除
  8. 白玫瑰
    [版主回覆07/12/2013 03:52:26]我好鍾意玫瑰架! 咩色都鍾意~

    回覆刪除
  9. 哈哈哈..你地兩個雌雄大盜採花賊...好好笑.....不過朵花真係幾靚...我家有個天台可以種野,但我只有盤薄荷.....本來都好想種瓜種菜..但又怕有蟲......又怕無時間攪....
    [版主回覆07/12/2013 03:51:26]見到朵咁靚既花花喺塊爛地度,個心好唔舒服啊~
    自家種好呀! 唔洗怕有農藥食咗會病嘛~

    回覆刪除
  10. 好鍾意妳用花樽插起枝花張相好靚
    [版主回覆07/12/2013 03:35:25]Thanks Andrea! 我都幾鍾意果張相~

    回覆刪除
  11. 初初驟眼睇仲以為係康乃馨添
    我家姐喺英國都有種罌粟花, 但係紅色花瓣, 黑色花蕊果種囉... 你呢隻好靚, 好大朵呀!
    你好有心機種植物啊... 我屋企淨係種左盆rosemary咋~
    [版主回覆07/12/2013 03:34:56]哈哈~~~~ Mr.T又係以為係康乃馨! 不過康乃馨邊有咁大朵呀? 仲大過隻飯碗呀!!

    罌粟花喺英國好普遍,不過多數都係單瓣 + 有毛既野罌粟,果d整唔到毒品,紅色果種應該係有毛既~

    我屋企都有種rosemary! 另外仲種咗豹紋竹芋、白鶴芋、白玫瑰 + 發財樹~

    回覆刪除
  12. 花花好靚呀 只是短短5日就開多幾支 強呀 !! 希望種在99花園的花花繼續盛放 ^^
    [版主回覆07/12/2013 03:29:31]我唸依種花應該幾粗生!

    回覆刪除

  13. [版主回覆07/12/2013 03:28:04]咩罪証? 英國種鴉片花係合法既,只係提煉先犯法~

    回覆刪除
  14. 你就算唔賄賂我,我都識做
    選擇性耳聾和弱視
    [版主回覆07/12/2013 03:26:54]我無犯法呀! 英國種鴉片花係合法既,只係提煉先犯法~

    回覆刪除
  15. 我屋企門口前2年就種了這種花,不過係白色唔係桃紅色. 幾靚.
    [版主回覆07/26/2013 20:41:48]真係好靚,仲好大朵!

    回覆刪除

Related Posts Plugin for WordPress, Blogger...