Party at The Palace 1503 - Linlithgow Palace (2009年5月24日)

老公唔知點搵到Linlithgow Palace 一連星期六、日兩日，有一個慶祝蘇格蘭歷史既festival - Party at The Palace 1503~ 本來想尋日去既，不過尋日太遲起身!  

所以今日(5月24日)先去......

 原來依個festival 好多人去! 好彩我地早到啫，如果唔係冇位泊車......

 不過早到泊好車後，我地走咗去食野~ 食完野排咗成20分鐘先買到飛......早知一早買咗飛先啦!

 雖然叫做Palace......不過建築上無論外觀內觀都唔係好靚! 同凡爾賽宮相差好遠啊~~~~ 不過始終歷史 + 文化背景唔同就真既......

但Linlithgow Palace 周圍既環境就好靚! Palace 位於一個湖邊既小山坡之上~~~

皇宮裡面有好多演員著哂古時代既衫~ 仲有模仿當時皇宮生活既活動......

 相中係當時其中一個流行既活動"Poetry Challenge"~ 2個人相繼讀出文章，類似中國人既"呤詩作對"，有觀眾圍觀 + 比評語~ 佢地講既野我完全唔明! 因為係舊時代用語，即等於中國既文言文......不過原來果個時代既人已經會講粗口果喎.......

 皇宮中間有個大庭院，圍住大庭院四周既就係四個打通既皇宮建築物~

見簡介上既地圖，有皇宮既廚房! 緊係要去睇睇啦~~~~

 我好有興趣知道古時皇室喺咩地方煮食......

 原來係一個超大 + 得幾條"窿"當窗既地下室......大佬呀~~~ 黑媽媽點煮野食呀??? 不過個廚房大到可以喺裡面踢波! 有個咁大既廚房又唔駒呀~~~

 廚房中間有個好似口井咁大既爐，應該夠十幾個人喺度BBQ~

基本上皇宮內裡全部都係石室，成個羅馬鬥獸場咁款!

皇宮外面既大片草地有其他節目......

 模仿十六世紀時代既人煮食方式，演員們仲會同遊客講解當時既生活~

 蘇格蘭既羊毛 + 紡織製品都好出名~ 亦有模仿當時點製造羊毛製品既過程!

 大草地另一邊有馬術表演......

 由演員扮演當時蘇格蘭最大4個貴族既騎士 - Campbell, Douglas, Hamilton & Lindsay~

 4大貴族既馬上長槍比武~ 騎士演員仲著哂金屬盔甲! 真係"鄧"d馬仔好鬼辛苦......

我食雪糕呀!!!! (我好日都唔食吓雪糕，緊要影低咁有歷史性既一刻啦~~~ )

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

我一向都鍾意睇同歷史有關既野，連去旅行最鍾意睇既都係博物館! 是次festival 對我來講好新鮮 + 新奇~~  

咁究竟依個festival 係為咩而舉行呢?

十五世紀時既蘇格蘭 + 英格蘭，已經一直持續咗超過200年既戰爭; 到咗1502年，蘇格蘭國王詹姆斯四世(James IV) + 英格蘭國王享利七世(Henry VII)簽訂咗停止戰爭既和平條約 - Treaty of Perpetual Peace~

為咗龔固條約，1503年8月8日，詹姆斯四世喺愛丁堡迎娶咗享利七世既女兒 - 瑪嘉列‧都鐸公主(Margaret Tudor )~ 雖然之後和平條約只係維持咗10年左右，但詹姆斯四世 + 瑪嘉列‧都鐸既婚姻，就造就咗後來蘇格蘭 + 英格蘭既統一......

而依個festival 就係為咗慶祝James IV + Margaret Tudor 既婚姻~ 不過......我 + 老公唔係好明 - 點解唔係8月8日先慶祝呢????