Cheap Cheap 筍野~

Primark 係愛爾蘭一間大型廉價服裝連鎖店，幾年前進軍英國，喺短短幾年間英國已有開過百分店，而荷蘭、德國、西班牙亦有Primark 連鎖店~ 經常喺街上都可以見到幾乎每人都手抽住一個Primark 紙袋!

Primark 除咗售賣服裝之外，仲有床單、咕臣、毛巾、浴室配件等家用品! 佢地既產品以 款式時尚、選擇多 +  價廉而出名~ 我從來冇見過Primark 有一樣貨品超過£30!

至於質地就見仁見智嘞! 當中有質地好亦有唔好，加上佢地同一時間有太多款式，而且又經常有新貨......所以去Primark 買野，要好有耐心 + 細心慢慢揀先會搵到款式質地都有返咁上下既筍野!

香港暫時仲未有Primark 分店，不過我就曾經喺壹週刊睇過，有一間樓上小舖喺英國買Primark 既貨，放喺店裡面售賣，但價錢就以倍數上升!

 今個星期買咗2件衫 + 2 對鞋~

 依2件top 其實已經出咗一段時間，我好鍾意胸前既蝴蝶結，我覺得好cute~~  

不過依件衫之前一直賣緊£10一件，以Primark 來講我覺得好貴啊!!! 所以一直唔捨得買......但總算守得雲開 - 因為依排Primark 減緊價，而家件衫減到£3一件! 一連買咗2件唔同色都只係£6咋~~~

 近排Primark 來咗好多新款 + 好鬼靚既婆仔鞋，我買咗依對金色只要£4!

 其實依對婆仔鞋仲有其他顏色e.g. 黑、白、啡 + 銀~ 每個色都好靚~ 對鞋又舒服!

我本來想買多對銀色......可惜我超細腳 - 3號~

無論銀色 + 其他款式既鞋都好少有3號......(唯有來緊既weekend 再碰碰運氣啦!)

 依對高跟涼鞋喺Primark 來講算貴，因為要£17~ 不過好靚又唔太高，著上腳好舒服!

 (高跟鞋我就要著4號~~~~)

 而且鞋跟仲係真木來喎! 十幾磅真係抵到爛!!!!!!!

依對涼鞋有3個色e.g. 白、啡 +  紅~ 其實我最鍾意紅色，不過又係冇我size!

早排先有位網友同我講 - 細腳係"富貴 + 大家閨秀"既象徵......我覺得好鬼麻煩就真!

Primark 既衫咁平，當然好大機會喺街同其他人撞衫~ 不過我著乜用乜一向係唔理其他人! 我覺得只要適合自己，著 / 用得舒服開心就夠嘞! 況且每個人氣質型格都唔相同 - 同一件衫著喺唔同人身上，效果可以有好大差別架!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

我除咗成日去Primark 買野之外，各大超市既服裝部，都係我間中既蒲點! 點解係"間中"呢? 因為超市既衫款式多數比較老成......

剛過既weekend Tesco 服裝部所有物衣服8折! 我都有些少收穫......

 搵咗依種長身cardigan 幾日，不過周圍都冇! 但就比我喺Tesco 搵到~ 可惜唔係我心目中最想要既黑色! 所以買咗件桃紅......(各位英國網友~ 如果知道邊度有依種黑色長身cardigan 賣，唔該單聲我知吖! Thanks~~~ )

 另外我仲買咗依件深灰純綿上衣~

 依件衫由原來£7減到£2~ 我見質地咁靚又咁平，所以買來喺屋企著!

我清楚記得我比錢時係1個£1銀 + 5個20p~ 總之啱啱好係£2啦! 但印籍既收銀員先同我講件衫只要£1.55，跟手比返果5個20p (£1)我......比單我時再找多45p比我!!!

 我搲哂頭......明明件衫應該要£2架嘛~ 不過佢只收咗我55p! 我發呆完後正想出聲同佢講，但(1) 印籍收銀員英文好差; (2) 我後面排哂長龍，已有客人露出唔耐煩樣......

因為咁......我只用咗55p就帶咗依件衫返屋企嘞! 事後老公都話: 咁又真係好抵喎!  
(不過我真係唔係有心呃人架!!!!!)