一粒鐘臨收工意外收穫 (2012年8月21日)

星期二約咗朋友傾野，
本身已經約得晏，加上我遲到咗10分鐘，
去到City Centre 已經差唔多4.45pm，
Weekdays 大部份店舖收6pm 正，
有d 仲5.30pm 已經關門......
把握時間關門前最後粒零鐘，一路行街一路傾!

先入書店，5分鐘後......

我就買咗依本講Wedgwood 歷史 + 產品既書!

一切有關我自己鍾意既野，我都有興趣知多d~



書店之後去咗一間百貨公司，
企圖搵一樣我已搵咗幾個星期，
但暫時仲未搵到既野~
(至於係咩野......等我搵到後先開估啦! )
不過雖然搵唔到果樣野，但就搵到佢地......

我一向鍾情豬型物體! 但並不只限廚具喎~
見到依盒野寫住"Perry Pig Soap"咁得意......

原來打開個盒後仲加得意!

"Perry"香噴噴造型又可愛，唔捨得用啊!

依舊番梘除咗有豬仔之外，
仲兔仔、青蛙、河馬、鴨仔 + 大笨象，
全部各有不同名呢!
但以"Perry"最可愛~


發現豬仔番梘之後，行去第二個department......

竟然比我見到佢 - 手機電話筒!
雖然依個野爆無聊，不過我已經恨咗好耐~

Back to 2009年，
喺林家歐巴桑個blog見到依個野即時好鍾意~
但當時英國仲未有得賣，我又唔想上網買喎!
如是者日子一天一天過去不了了之......
直到大約2年前喺英國一間大型連鎖電器舖終於見到有得賣，
心大心細流哂口水~~~~~

不過......
Mr.T: 從來未見過咁pointless 既野! (懶有見地地)
我: 咩pointless 呀? 佢可以防手機radiation 架! 用得多手機傾電話，遲早d radiation 整到我好似你一樣咁蠢呀!! 所以你應該要買一隻比我!!! (狡辯地)
Mr.T: 如果妳真係想要既話，我會買比妳! 不過如果妳真係唸住佢可以防radiation 唔會變蠢的話，我唸已經太遲.......(勁吋咀地)

我緊係無咁白痴覺得依隻野真係可以防radiation 咁偉大啦!
但我覺得依舊野好搞野，
同埋我好懷念細個時用撥輪式電話果種聽筒既手感~
不過最後我都無買到，
因為電器舖果隻係矽膠表面，

display 出來果幾隻已經變到好鬼污糟;
加上攞上手又重， 咁點帶出街用呢?
雖然我好鍾意，但佢始終係一 舊無聊玩具，

而電器舖賣£25 咁鬼貴，我唔捨得買啊!!!!!!!!!!!!

尋日見到依隻唔係矽膠唔會污糟，
塑膠手感同我懷念既手感最接近~
而且佢只係電器舖1/5價錢 - £5!
Bonus 仲要係我最鍾意既桃紅色!!
我真係唸唔到唔買佢既理由啊!!!
同行朋友都買咗隻比女朋友呢~~~



依個時候大部份舖頭開始關門，
不過IKEA 仲有3粒鐘先關門!
向IKEA 進發~~~~~~

仍然未搵到我想搵果樣野!
不過屋企既密實袋已經用哂，要入貨~
用過IKEA既密實袋，唔想用其他牌子啊.......
(另外買咗兩包糖比Mr.T!)


是日根本無打算買野，
所以粒幾鐘已經係好好既意外收穫咯~~~


-------------------------------------------------

今日天氣超好! 於是出街行吓順便買日用品~


不過除咗咋日用品之外，仲有2樣意外收穫......

新玩具 - 木刻電筆~

見到佢，腦內即時想起幾個搞作念頭!

大眼雞洗衣機型梘粉罐~
同我部洗衣機一樣樣架! so cute~~~~