二人世界煮飯仔 (附食譜)

唔經唔覺Mr.T 由南下返咗Glasgow 已經2個月，
之前佢仲喺南下做野時，
Weekend 返來Glasgow 會趁機煮飯比佢食，
而家佢返咗來終於可以回復正常 - weekdays 煮飯仔; weekends 出街食! 

久不久條壽司癮就會吊起，
上星期日(8月20日)我地又去咗食YO!Sushi!
唔知點解佢地水準硬係咁參差?
可能今次好好食，不過下次再去就好差.......
至慘係Glasgow 得2間迴轉壽司，
不過2間都係YO!Sushi - 即係根本無competition 無選擇!
Anyway 今次戰跡都保持到水平 - 28碟 + 4碗味噌湯 + 6杯綠茶

8月21日: 節瓜雞肉湯螺絲粉

是日同朋友去咗躝街，
朋友送我返到屋企已經差不多8點，
若因為我去咗躝街shopping 搞到老公放工返來無飯開，
自稱賢妻既我會好過意唔去.......
放低shopping 拿拿淋去超市買盒雞脾肉 + 1隻鬼佬節瓜，
煮依個湯粉至快手又好味!

節瓜雞肉湯螺絲粉(參考食譜)click here~



煮飯回復正常後，最正就係我唔洗再戇居居食自己!
而且餐餐可以煮多幾樣唔同口味既餸菜~

8月23日三餸無湯: 雙椒紫蘿牛肉; 豆角炒煙肉腸 & 蒸魷魚仔乾

本來是日想煲湯，
不過前一晚唔記得咗攞舊瘦肉出來溶雪!
所以依餐無湯飲......


依餐早幾日前整咗雙椒紫蘿雞柳，
老公話好好食!
不過紅椒青椒各都只用咗半隻，
快手用埋剩低果d，今次用來整牛肉啦!

我鍾意炒牛肉多d~
今次唔用新鮮菠蘿，用咗細罐地捫......
竟然唔甜 + 淡中帶酸 - 酸過新鮮菠蘿 + 仲要有渣!
地捫仲要貴過哂超市裡面其他牌子，罪加一等!!
早知我買返超市cheap cheap 自家品牌啦~

想食菜但唔想食鬼超來來去去既西蘭花，所以買咗包豆角~
不過已經有炒牛肉，唔想再炒雞或豬......
醒起屋企長備至少1包煙肉腸! 就炒煙肉腸啦!!

依隻煙肉腸好香好好味而且仲好平，超市經常有特價~
包裝裡面有另一個真空膠包裝，
唔需要放雪櫃儲存非常方便，
所以我屋企食物櫃中長備至少1包!
用來炒、放湯煮粉、整pizza.......
隨時想食，點食就點食!!

好耐無蒸過魷魚仔乾，
我發現越細隻既魷魚仔乾就越鮮甜!
其實淨係依碟仔我已經可以吞2碗白飯，唔再需要其他餸~

雙椒紫蘿牛肉食譜click here~

豆角炒煙肉腸(參考食譜)click here~



62 + 99早前由香港返咗來，
隨後又馬不停蹄即時出發去咗搭郵輪，
上星期先啱啱返咗來，
不過99今個星期四又再返香港，
老公今年完全無見過99!
於是星期日(26日)我 + 老公返咗去6299度食飯......

菜乾羅漢果湯、白切雞、炆鮑魚、煎魚 + 灼菜，
(仲有62碟鹹魚!)是日大伯 + 姑仔都無返來，得6299 + 我同老公，
份量十足4個人好豐富啊!

餐飯食到一半，
62無啦啦走入廚房捧咗大碟炒桂花翅出來......
佢話唔記得咗攞出來!
結果碟翅食唔哂，99叫我地打包攞返屋企~

8月27日四餸一湯: 霸王花豬肚湯; 蕃茄炒煙肉腸; 香煎紅福壽魚; 炒桂花翅 & 蒜頭豆豉炒猪乸菜

星期日去完6299度食飯後落咗一場大雨，
天氣即時轉涼咗dd，天氣無咁熱我終於想煲老火湯嘞!

雖然天氣涼咗少少，不過仍然想食酸微微既餸菜!
但連續煮咗2次紫蘿乜乜，
就算Mr.T 食唔厭，我都煮到厭啦!!

咁一於煮蕃茄啦!
本來想煮蕃茄牛，不過一早唸好咗今晚會整牛肉，
唔想連續2晚食牛肉......
反正依期鍾意煙肉腸，就用來炒煙肉腸啦! 快靚正~~

星期日果餐99煎果條dover sole 好鬼正!
Lucky me 喺泗和行買到條又平又新鮮既紅福壽魚......
照板煮碗略略醃鹹用來煎~

福壽魚雖然係淡水魚，不過厚肉骨少肉質嫩滑，
喺英國食魚咁少選擇來講，福壽魚真係好好食 + 好抵食!


上星期喺一間新開既Morrisons 分店，
見到有好多唔五顏六色唔同種類，
喺其他鬼超無見過，或我完全無見過既蔬菜，仲竟然有豬乸菜賣!豬乸菜有好多種唔同顏色，
Morrisons 都有成3種 - 白色既Swiss Chard, Yellow Chard + Red Chard......
全部都係豬乸菜!
不過因為第一次見又唔知點煮，
於是問吓V媽媽，佢話佢都未食過，不過佢知道有人用蒜頭豆豉炒!

於是今個星期再返去買咗2札黃色既試吓!

網上資料見好多人話豬乸菜有陣味，不過我又唔覺喎!
我覺得好正好好食，最離奇係竟然連老公都話好好食~
不過唔知係咪我既錯覺呢?
落鑊果一刻我竟然聞到陣"果汁糖香味"!!
不過食落係完全無任何怪味既~
(仲有一札今晚再炒，睇吓今次仲會唔會有果汁糖味先!! )

老公鍾意食就啱哂嘞 - 等我唔洗攪盡腦汁氹佢食菜!
暫時只見過Morrisons 有豬乸菜賣，
不過有一樣野我好唔鍾意.......

第一次見 - 唔知做乜鬼菜枱上面有條管，管上有一排窿，
每個窿都會不停噴出打成霧既水!
除咗一路揀菜一路煙霧迷漫之外，
仲噴到d菜濕鬼哂水滴滴!!
有好多菜叠埋一堆又噴到濕哂，搞到d菜霉鬼哂!!!
依d咪叫"好做唔做"囉!!!!

依餐加料既炒桂花翅~
我 + 老公本身對魚翅無咩興趣，
就算V媽媽燉翅，我都係齋飲湯，d翅比V媽媽食......

不過d翅咁鬼粗，我唸依兜野唔平! 唔想浪費啊~

霸王花豬肚湯食譜click here~

蕃茄炒煙肉腸食譜click here~

香煎福壽魚食譜click here~

蒜頭豆豉炒豬乸菜食譜click here~