Pretty Little Things (2012年8月19日)

尋日(8月19日)突然興起想去N年無逛過既Sunday Market......

The Barras Market 係蘇格蘭出名既週末跳蚤市場~不過果度龍蛇混雜，
仲經常會有差佬突然殺出來捉老翻走鬼檔，
所以老公絕對嚴禁我自己一個人去逛!

好在老公同我志同道合一樣咁鍾意逛跳蚤市場!
想當年我 + 老公仲讀緊大學時，
週末經常去逛Sunday Market 消磨時間，
我地第一部電視都係來自The Barras Market，
係果種最原始，唔夠廿吋已經好鬼重好鬼大舊，
連remote control 都無既按制式傳統電視機!不過部電視性能良好，用咗差不多3年，
到我地買得起全新電視時佢都仲未壞，最後送咗比朋友!

尋日舊地重遊，我地依然興致勃勃~
喺其中一個舊物攤大堆唔知幾多手既舊物中，
眼利既我一眼就見到佢......

心型Wedgwood Jasperware~ ♥

Jasperware 係Wedgwood 最具代表性既系列~手工精細既白色手造浮雕，，

襯托住藍/綠/淡紫/黃或黑既啞色底，
絕對係一件精緻漂亮既藝術品!

依隻尤如晴天天空既蔚藍色，被稱為"Wedgwood Blue"~

最早既Wedgwood Jasperware 已有200多年歷史，
所以早期既Jasperware 相當值錢!

從每一件Jasperware 既底印，
就可以分辨得出係邊個時期既產品......
不過依個心型碟只係唔值錢既近代產品!

雖然依個心型Jasperware 唔值錢......

不過我之前去過南下Wedgwood Factory Outlet，見Jasperware 賣得好貴!
好似依個只有煙灰碟咁上下大細既心型碟，Outlet 價都要£2X至£3X!!

咁我究竟花咗幾多錢買依個心型Jasperware 呢?
當我從舊物堆發現咗依個滿佈灰塵既蔚藍色心型，
即時拎起佢驗明正身，然後問攤主幾銀......
攤主竟然答我: A pound~
拿拿淋比錢據為己有!

好開心好開心只比咗£1就買到個咁靚既Wedgwood!
返屋企幫佢洗洗擦擦後新既一樣，
我打算用來放平時經常帶既耳環戒指~

-------------------------------------------------------

我想要一個款式古典高貴既afternoon tea snack tray，
已經搵咗好耐，
但暫時搵到最接近我心目中既款式，
都只係兩層高果種cake stand~兩層我嫌太高，我想要只一層既款式!

尋日喺跳蚤市場果然有我想要既款式!
我睇中一個設計簡單典雅既鍍銀snack tray，
老公一見到係鍍銀 + 只賣£10，
就不停慫恿我: 買啦~ 買啦~ 難得係妳想要既款又咁平!
不過最後我都無買到，
一來我嫌佢貴 - 雖然£10好平，
不過始終係二手貨，我覺得唔值;
二來鍍銀即係會變色，雖然變色可以清潔得到，
但我唔想次次攞出來都要洗一輪先用得!

果然，我既決定係正確既........

因為之後繼續行街比我搵到佢!
只得一層，黑配金又靚又classy，
100%符合哂我心目中要求，
仲係100%全新唔係二手貨~
連老公都話依個靚過跳蚤市場鍍銀果個，大讚我有眼光!!

-------------------------------------------------------

同老公逛一間喺屋企附近好細既outlet shop，
老公發現咗依盒小小口香糖，我即時愛不釋手勁鍾意!

由Outlet 返屋企既途中，
我攞住盒糖不停同老公講咗無數句"I love it!"，
老公話: 我一早知道妳會鍾意，不過無唸過妳會鍾意得咁緊要......
哈~ 用文字真係形容唔到我有幾鍾意!
總之我係好好好好好好鍾意啦!!
有時一件小小既"靚野"，可能潛在巨大令人開心既威力啊~

不過我愛既只限依個靚靚英倫古典花花盒~
(我打算用佢來做藥丸盒! )
裡面果咋茴香及八角口味既口香糖，
味道實在太過恐怖......

-------------------------------------------------------

尋日行街時我口痕地隨意同老公講咗句: 我想玩浮燈!之前同老公玩過放天燈~ (網誌)
但無特別搵過或想買浮燈來玩，
尋日完全係無意，只係突然唸起先向老公提起.......

點知真係比我撞見有浮燈賣喎!
仲要好似朵花咁鬼靚，於是買咗一朵紅色一黃色~ ♥

浮燈同天燈一樣，要夠18歲先可以買!
老公走去比錢，我繼續睇野.......
老公比完錢後走來同我講: 收銀話要check 我ID喎!!

-------------------------------------------------------

喺一間波蘭食品超市買咗包煙燻胡瓜魚~
條條魚燻到金黃色好鬼靚啊!
不過仲未試，唔知好唔好食呢?

另外仲買咗個雪糕羹~
雖然佢唔算係一件"靚"野，不過係一件我想要既野!

Another happy shopping day!!