二人世界消暑晚餐 (附食譜)

英國天氣一向出哂名一個字 - 屎!
不過天公似乎為倫敦奧運造美，
開幕一星期以來熱到飛起!!
熱到連一向唔多吼雪糕既我都頂唔順，
日日消滅2枝甜筒......

天口咁熱，我做咗一樣好涼快既家務 - 洗雪櫃!
除咗可當消暑之外，我仲因此有個意外驚喜......

喺冰格深處搵到包被我久違有大有細既乾鮑!
等我唸吓方法炮製佢地先~


花咗2日時間先將個雪櫃洗到內內外外乾乾淨淨，
無咩時間整野食，因為想儲齊麥麥奧運可樂杯，
所以食咗幾餐麥麥......

雖然好想煮好耐無煮過既三餸一湯，
不過天氣熱成咁真係無咩胃口食咁多野!
所以最近一係無煮，一係就煮碟頭餐......

7月26日: Devilled Kidneys 魔鬼羊腰

自從之前整Steak & Kidney Pie 食過羊腰之後，
我就愛上咗又平又好味既羊腰!
今次整咗依個有少少辣既口味，非常好味~
越來越鍾意食羊腰，等我唸多d唔同煮法先!

7月27日: 龍蝦意大利雲吞; 燒露筍配荷蘭醬 & 焦糖澤西牛奶布丁

一早預備好哂材料!

雖然第一次整意大利雲吞，
不過可能因為之前有整意粉既經驗，做起來得心應手!
過程好玩而且好好味道~ 依個一定會encore!!

仲有飯後甜品...又係第一次整既焦糖澤西牛奶布丁~
好多人都話牛奶布丁好易整，
今次第一次整，估唔到原來易成咁!

Mr.T第一次食，佢話好滑好香好正!
不過咁細樽佢1分鐘內幾啖就食哂咯........

8月1日: 英式炸魚薯條

上次第一次整炸魚薯條係一人前;
今次特別整比老公試吓!
Mr.T's verdict: BEST fish & chips ever!

8月2日: 素小炒

是日十五食花齋......

是日午餐用露筍、木耳、竹笙、煎豆腐、金菇乾 + 素蠔油炒;

食剩素晚餐用來炒烏冬~初一十五食齋依個習慣不知不覺已經維持咗一年多!
其實我自問係一隻食肉獸，
不過原來實行起來比我原本想像容易好多，
因為齋菜都可以好多變化 + 好好味，
所以我好有信心可以繼續維持依個習慣!

8月4日: 節瓜鹹蛋肉片湯 & 椰菜雞絲炒烏冬
天氣咁熱好想飲湯水!
醒起早排浸果樽鹹蛋夠哂日子......就滾鹹蛋湯啦!

正!

滾湯....再炒個烏冬~

依餐好快手搞掂又好味!
最重要係唔洗留喺熱辣辣廚房咁耐~

Devilled Kidneys 魔鬼羊腰食譜click here~燒露筍配荷蘭汁食譜click here~龍蝦意大利雲吞食譜click here~焦糖澤西牛奶布丁食譜click here~英式炸魚薯條食譜click here~自製鹹蛋做法click here~節瓜鹹蛋肉片湯食譜click here~椰菜雞絲炒烏冬click here~