2012年9月5日星期三

社交網站百態 (特長!)

上星期寫咗篇關於我 + Mr.T FB遇到既奇人異事(網誌),
扑友們回應時都指出咗好多佢地
見過既社交網"magical moments"......
大大話話多年來我地都用過唔少不同既社交網站,
會令我反白眼既事又何止咁少呢?


我 + Mr.T 仲未開FB之前,曾經玩過一個叫做bebo 既社交網,
用法同FB大同小異,不過功能比FB簡陋,
果時我英國既朋友大都用bebo 多過FB,
所以我遲遲都無開FB AC......



朋友間流行玩bebo 只一段好短既時間就放棄,轉哂去玩FB~
不過我既bebo 時期有2件關於同一個人既事,
令我對眼反完再反!

要了解發生咩事,首先要知道bebo friend list 點work......

所有FB用戶都應該知道
friend list 裡面既朋友,
無論新加入或舊加入,
系統會以朋友既名字alphabetical order 去排列;

不過bebo 既friend list,
新加入既朋友,會自動被系統安排
排到最尾~


bebo 有一項我認為幾攪分化既攪屎棍功能 - Top Friend!

何謂Top friend?
雖然新加入既朋友會自動排喺
friend list 最尾,
不過用戶可以自行根據同對方"友誼深厚程度"來改變排列次序~
其實都無咩所謂,
不過依個
排列次序係會公開顯示於用戶既bebo page,
換句說話所有睇到你個page 既人,
都會知道你同邊幾位朋友"友誼特別深厚"!



Top friend 排列顯示位置為左至右,
所以左上角就係你既終極Top friend,
正常情況下
終極Top friend 既位置都係自己既另一半~

特別再清楚說明一下......

空friend list 內所加入既第一位朋友,
會自動成為
終極Top friend 
如果之後一直無自行改動friend list 排列次序
依個被第一位加入既朋友會
一直出現喺左上角,
一直保持
終極Top friend 既寶座~
之後再加入既新朋友,係無可能無啦啦排喺左上角既,
所以如果之後加入既朋友做咗終極Top friend,
一定係自行
排列出來!

當時我 + Mr.T bebo friend list 裡面,
有一個住喺香港既人E,

當時佢有一位拍拖近10年好好既男朋友X,
E既終極Top friend 一直都係X~
直至有一日......

Mr.T有一個非常乞我憎既下屬A(鬼仔),
廿歲出頭口多多,
佢對東方女性特別感興趣,
個個weekend 打電話來撩
Mr.T出去玩,
每次都託
Mr.T叫埋我出去 - 想我介紹朋友比佢識!
Mr.T同我講依個人工作表現懶散但性好擦鞋,
總之依個人身上充滿哂我最討厭既缺點!
A曾經add 過我,但我無accept 到!


有一日A喺bebo 見到E留言比Mr.T,
A同Mr.T講覺得E好靚,
於是A主動add 咗E,E accept 咗~

過咗幾日,我 + Mr.T 喺一pair 好朋友屋企八卦緊人地bebo,
好朋友係我地英國婚禮時既兄弟 + 姊妹,
雖然佢地完全唔認識E,不過佢地睇過我香港婚禮既相,
所以佢地認得E係我香港婚禮時既
姊妹,亦知道X係E既男友!

英國
姊妹突然問我一句: 咦~ E換咗個鬼仔男友呀?
我即時搲哂頭......

英國
姊妹就指比我睇 - 我見到E既終極Top friend竟然係A!咁X呢? 
彈咗去後面幾個位置! 我真係覺得好震驚!!

當時我認識咗E已十多年,認識X都有8年,
不過A只add 咗E幾日,而且A喺英國; E喺香港,
風馬牛不相及,佢地完全無見過對方,
根本連普通朋友都談唔上!
A竟然有本事咁把炮幾日之間可以超越X、我 + Mr.T,
升呢排頭位成為E既
終極Top friend?
唔好忘記 - 終極Top friend一定要自己排果喎!

當時我
胡亂咁答英國姊妹: 可能bebo系統出咗問題或改咗啩......
英國
姊妹: 唔係喎! Top friend 係自己set 果喎!

我: 我點知啫......
其實喺依件"終極Top friend 事件"之前,
我 + Mr.T 已經留意到某人既"崇洋"行為......


Mr.T由細玩到大既3位鬼仔死黨,

特別去香港出席我地香港既婚禮,

席間E同佢地3個都有合照~

結果E 既bebo 相簿裡面,

只有佢自己同依3位
鬼仔既合照,

我 + Mr.T,甚至X同佢既合照全部都欠奉!

果個係我
+ Mr.T既婚禮來果喎!!
當然,係佢自己既page,佢鍾意點就點
......

其實認識咗某人咁多年,
我當然知道某人一直好響往外國既生活啦!
畢竟世界上的確有好多認為"外國月亮一定特別圓"既傻人!!
但我就無唸過有人會desperate 到明明完全唔識對方,
都會刻意扮到好熟......
只因為人家大眼高鼻金頭髮講英文?
(唸到依度,我對眼又不受控制地反一反!
)



社交網站令我反白眼既
所見所聞仲有以下......

- 經常update status 呻自己唔開心,生活唔如意既人

我FB就有一個咁既人,
負面情緒頻密程度真係好誇張!
初時我都會回應一兩句鼓勵既說話,
但對方
長期都係咁三日唔埋兩日就呻一次
久而久之我就覺得自己太渺小 +
無能為力!
無論我留幾多回應,都唔會幫到佢......

仲有就係,都唔知留言回應既人心態堅定流?
好多時對方根本無講佢因咩事唔開心或有乜唔如意,
字裡行間又好明顯睇得出回應既人根本唔知佢發生咩事......
不過回應果咋人一開波就緊張兮兮話好擔心佢會有事,
叫佢一定要振作......(洗唔洗呀?
)

長久下來,每次我再見到依個人既負面status,
回應佢既人已越來越少,
我唸唔再回應既人大約同我有同感吧?
不過繼續回應既人就真係愛心無限咯!


除咗我之外,Mr.T FB都有一個咁既人!
對方係一位單親媽媽,
從佢日日大量update 既status 睇得出,
好多時佢上FB時應該係已經飲醉咗......


同我既情況一樣 - Mr.T最初都有份開解佢,
後來都漸漸麻木~
之後有一日,
Mr.T收到一個電話,
來電既人係
單親媽媽 + Mr.T既mutual friend,
對方話
單親媽媽要自殺!
對方話佢已經盡哂力開解咗單親媽媽一段好長時間,
佢已經無哂辦法......
佢打來搵
Mr.T,係因為知道Mr.T有單親媽媽既地址,
 (Mr.T同佢地一班人聚會過 + 幫佢地畫過t shirt!)
對方唸住幫埋單親媽媽最後一次,以後就唔再理佢~
人命關天,老公即時報警!
Apparently 差人上
單親媽媽屋企拍門查問......

唔知應該點形容?
應該話好心著雷劈? 定係話
Mr.T自己拿屎上身呢?
唔記得係當晚定第二日,

單親媽媽pm Mr.T,小佢話佢好去報警!
吹脹later on 又同Mr.T沙哂冧道歉喎!!


長話短說......2年多後既今日,
單親媽媽仍然健在,
仍然繼續update 佢既負面status......

究竟依種人真係咁唔開心,
還是只係attention seeker?
遇到唔開心唔如意,第一件事唔係去唸解決方法,
反而即時喺FB公告天下,
然後坐喺電腦前逐個回覆其他人
嘘寒問暖既回應......
唔治標又唔治標! 反白眼~~~~~




 

- 無病呻吟慨嘆自嘲自己好肥 + 生得唔靚既人

我發現有依類
status 既人,往往唔會只得一次!
隔一段時間,就會有個內容差不多既
status重現,
目的只係想其他人回應佢一句:
"邊係呢? 妳一d都唔肥!"
"妳身材好好啊!"
"妳天生就係靚女啦!".......之類,
然後當事人會欣然地向回應既人道謝.......


見到依d,我一律當自己時運高睇唔到!
因為無論對方係咪真係肥或生得唔靚,
我一句回應都唔會改變任何野架啦!
所以反一反對眼scroll 去睇其他人既new feeds~



 

- 鵲巢鳩占騎劫人家話題

有時唔關頁主或blog 主事,
而係回應既人
令人反白眼!
依類人多數都係attention seeker~


舉個例有人慶祝相識10週年,
通常其他人會
留言回應恭喜祝福之類,
不過我見過有人既回應係咁 - "我同老公16年呀!"
反白眼!!!


其實回應中提及自己既事絕對唔係問題!
不過自我放大只自說自話,
對網主一句祝賀說話都無是否有點兒那個呢?
洗唔洗
網主掉返轉頭祝福妳??
既然可以回應,即係自己都有AC,
點解唔返去自己果頁話比人家知"妳同老公16年"?

舉個例,有人喺自己頁呻因為經濟唔好無人工加,
不過好慶幸無比老闆炒魷......
竟然會有人回應: 我/我老公有人工加呀! 而且仲加得好豐厚!!
天呀! 反白眼~~~~~

P.S. 我好幸運~ 我既blog友 + FB友都無依d
騎劫人!
以上2個例子我係喺人家處睇到既~

一樣米養百樣人~
我唔認同既,
同我唔啱咀形,唔代表就係錯,
雖然以上幾種人會令我反白眼,
不過基本上佢地影響唔到我!

而且佢地有時做d野都幾攪笑......
例如生日過後數吓有幾多人留言同自己講生日快樂!!



Photobucket

15 則留言:

  1. hee....what can i say? I keep laughing at what you wrote. I hate negative people too. Give me five!
    [版主回覆09/06/2012 04:19:29]i dont hate them cos they dont affect me a bit at all! just think that they're ridiculous~

    回覆刪除
  2. 一樣米養百樣人。。。有次我係FB UPDATE左一塊用焗爐既多士。。。因為我整左個心心係中間分享下。。。點知有個FD回一句"勁熱氣。。要飲涼茶。。"呢個人有次見我送D裙俾朋友個女。。。第一句係。。"睡衣黎架。。"。。。最後唔想自己心情大壞。。。DEL左佢。。我都小氣架
    [版主回覆09/08/2012 18:23:52]無聊 + 衰格囉! 有種人心地唔好見親人地分享好事,就要去破壞氣氛!
    例如妳塊多士有個心心咁靚,佢可能見到其他人留言讚話好靚,咁就會唔抵得,於是喺雞蛋裡挑d無厘頭骨頭出來,目的就係想令妳唔開心!

    依個世界好多依種人架,我個blog 都見唔少! 唔理佢地就啱架嘞!! 依種人對事事都負面好批評,佢地唔會開心架~
    [小車回覆09/07/2012 08:59:14]係呀.....我又無問佢意見.....下下要批評...為咩呢???
    [版主回覆09/06/2012 19:42:57]妳講既FD都幾乞人憎喎! 狗口長不出象牙~ 有句說話: if you don't have anything nice to say, don't say anything at all!" 啱哂依種人!

    回覆刪除
  3. 真係天下怪事無奇不有,當笑話好了..
    [版主回覆09/06/2012 19:40:38]總之影響唔到我就得嘞! 我一律當笑話咁睇~

    回覆刪除
  4. 正!
    [版主回覆09/06/2012 19:39:53]

    回覆刪除
  5. 哈哈哈~~ 睇到最尾嗰句真係忍唔住爆笑... 因為我都有啲 fd 係咁做, 仲要驚人唔記得特登喺 FB status 度祝自己生日快樂.....
    [版主回覆09/06/2012 19:39:45]數生日咁搞笑既人咪就係bebo 事件果位E小姐囉! 佢係我認識既人當中,令我反白眼反得最多既人! 好彩佢已經唔再係我朋友,如果唔係反到對眼盲都似!!

    回覆刪除
  6. 人生百態! 無奇不有,多謝分享!
    [版主回覆09/06/2012 19:35:51]

    回覆刪除
  7. 我都跟你一齊反白眼呀, 我都好憎有d人講嘢隱隱悔悔, 咁人地問下你啦又唔覆人又唔講咩事~~~呢d又要反白眼
    仲有寫住"終於買到啦"咁又唔講買到乜, 有朋友鄧佢開心又話要低調! 咁寫係fb做乜呢?! 再反
    [版主回覆09/06/2012 19:27:02]其實我間中都會打一兩句只有只己先睇得明既野e.g. 祈求某件事,不過我唔係要人追問我咩事,而係想記低自己當時既心情! 而且我祈求既事有結果後我會講返出來~ 大部份人知道我性格都唔會回應問咩事,但會留句good luck 心想事成之類,不過有d人會回應估係咩事,我一係唔回佢一係直接同對方講唔會話比佢知!

    不過我見過一個反眼既情況,有人貼咗張落雪相出來加句"到咗嘞"咁,佢d朋友問佢邊度來架? 佢答人地"confidential"! 妖~ 真係機密就唔好貼埋相出來啦!

    回覆刪除
  8. V女你好犀利~你講講下又真係好多呢D人..我都見唔少...
    [版主回覆09/06/2012 18:52:28]其實仲有架! 不過篇幅有限,講d最搞笑果d先!

    回覆刪除
  9. 一樣米養百樣人~
    我唔認同既,同我唔啱咀形,唔代表就係錯,

    * super agree!
    [版主回覆09/06/2012 18:43:55]係~ 我無果d會令我反白眼既人做既野係錯,不過我支持佢地唔住囉!

    回覆刪除
  10. 這個世界咩人都有呢,有時一笑置之
    [版主回覆09/08/2012 18:13:49]有時睇到d特別既騎呢既人...尤其係鵲巢鳩占果d,我真係笑唔出! 不過至緊要佢地唔好搞到我就得嘞!

    回覆刪除
  11. 依個世界真係咩人都有~~
    我今次返英國都見識到一個好犀利既醒目女
    最衰唔可以私人留言俾你!!
    [版主回覆09/10/2012 19:04:08]早排既事來啦!
    [andrea回覆09/08/2012 21:13:53]我記得之前妳話私人留言睇唔到~~
    [版主回覆09/08/2012 18:11:57]點解留唔到私人留言呀? Yahoo 又有問題呀?

    回覆刪除
  12. 睇完我對眼都要反一反
    [版主回覆09/08/2012 18:10:49]反咗一反咁少咋?

    回覆刪除
  13. 社交網站就是咁千奇百怪

    [版主回覆09/10/2012 20:04:09]騎呢人做既當然係騎呢事!

    回覆刪除
  14. 我都發現attention seeker情況越黎越嚴重...

    但另一個情況也令我困擾~就係當你好開心Post一D生活點滴時~有人會認為你扮野 show off...

    唉~搞到我都對社交網站有D保留...
    [版主回覆09/12/2012 21:55:43]依個世界總有心地唔好,唔抵得人家成日都開開心心既人,所以佢地鍾意出招嘗試破壞人家好心情...真係比佢地影響到佢地咪得戚囉! 所以唔好中佢地計呀!
    [littlejoe回覆09/12/2012 13:34:20]比你講完舒服好多!!!
    [版主回覆09/10/2012 19:09:50]妳講既情況我認為無問題喎! 喺自己page 或自己blog 貼自己開心事post 有咩問題? 人地要唸妳扮野show off 只係佢地眼紅,係佢地既事! 佢地係要咁唸,可以不理! 亦唔需要因為佢地而覺得唔開心~ 唔可能please 到全世界人,要全世界人都鍾意妳嘛!

    喺人地page 或blog 射尿show off 自己d野就乞人憎嘞!

    回覆刪除
  15. haha....寫得好, 寫得妙!
    [版主回覆09/21/2012 22:00:01]嘻嘻~~~~ 多謝! 咁妳有無睇到哈哈笑?

    回覆刪除

Related Posts Plugin for WordPress, Blogger...