二人世界晚餐週記 (附食譜)

2012年9月20日二餸一湯: 花旗參麥冬圓肉煲瘦肉; 荷葉蒸雞; 幼枝西蘭花炒魚肉大蝦

蘇格蘭天氣開始涼，樹葉開始變黃變紅，
而我就感覺到有少少"秋燥".......

來個花旗參麥冬圓肉煲瘦肉來潤一潤~

買咗包乾荷葉九世都未用.......
早排喺FB見到朋友整荷葉飯，我先醒起自己有包荷葉!

來個荷葉蒸走地雞(肶)，又香又滑~
老公食到lam lam 脷，一路食一路話好香(荷葉香~)
完全忘記哂佢自己好憎累骨既!

當我由廚房捧碟荷葉蒸雞出來......
老公: 糯米雞呀!!!!!!!
我: 乜你見到有糯米咩?

當晚食完飯我將荷葉蒸雞貼咗上FB......

引到我個friend 第二日即刻走去買荷葉，
即晚老翻咗whatsapp 過我!
佢仲大讚依個食譜"香、滑、正"呢! 嘻嘻~~~


有包幼枝西蘭花，但就咁清炒有d寡......
摷吓冰格.....搵到包魚肉大蝦!

炒埋一碟，本來覺得紅紅綠綠顏色幾靚~
不過望望吓又覺得切半既魚肉大蝦有少少似大毛蟲.......
(Oh well~ 不過好好味! )
花旗參麥冬圓肉煲瘦肉食譜click here~

荷葉蒸雞食譜click here~

2012年9月22日二餸一湯: 花旗參麥冬圓肉煲瘦肉; 快炒九層塔三杯肉片; 清炒幼枝西蘭花
湯係之前飲剩既......
依餐本來早一晚煮既，
不過果晚個胃有少少唔舒服無煮到，
但餸菜之前果晚已經準備好，
所以第二日星期六同老公留喺屋企食lunch~


廚房儲埋大咋汁汁醬醬又係時候要清清嘞......

舊年喺愛丁堡台灣美食節貪個樽得意買咗2枝醬汁，
到而家都仲未開封......

開咗左邊果枝"三杯快炒"，加埋竹筍 + 九層塔葉來炒肉片~
估唔到依枝現成汁會好香又咁好味!



Glasgow 天氣明顯轉涼咗好多，雖未至於凍，
不過天氣涼咗，"煮慾"大增!

2012年9月24日: 泰式炒貴刁

上星期日初一去咗食泰菜 (網誌)，
果日我食齋所以點咗個豆腐泰式炒貴刁，
查實係我第一次食泰式炒貴刁!
因為我食親泰菜都好少叫炒粉麵......
Anyway 第一次食炒貴刁我覺得好好味!

咁啱喺中超見到有泰國入口既貴刁賣，買包來試吓自己炒~

其實中超都有現成炒貴刁汁賣，
不過實在太太太鬼大枝嘞!
睇過枝貴刁汁招紙上既材料成份，
發現大部份材料屋企已有，
決定唔買現成汁自己溝個汁出來~

自己炒加咗雞絲 + 大蝦，個汁又溝得好成功~
慳返唔洗特登買大大枝炒貴刁汁!

炒咗一大鑊，同老公一人一碟，
原本唸住有剩可以留返第二日做lunch，
點知老公清完自己果碟自行走去廚房encore!
佢咁比面咁捧場，我當然無任歡迎啦~
不過我無咗碟lunch 囉......
泰式炒貴刁食譜click here~

2012年9月25日: 五香陳皮鴨腿瓜粒湯飯

尋日Glasgow 天氣非常差，橫風又橫雨!
約咗朋友歎茶吹水兼攞月餅比佢，
雖然有帶遮，不過返到屋企半條褲都濕鬼哂......

天氣涼涼地，食個熱辣辣湯飯成身即時暖哂!

超市鴨腿終於有貨! 鴨腿早一日醃好咗，
去完街返來煎一煎後入焗爐，
跟手再煮個無肉既冬瓜粒湯，
開飯前煲飯......都好快手就有得食!
好開心第一次就煮到小時候回憶中既味道~

五香陳皮鴨腿瓜粒湯飯食譜click here~


---------------------------------

前日星期一整埋今年最後一月餅比朋友~
月餅皮粉糰剩低少少......

隨手攞咗依個早前買咗仲未開光既曲奇模......

整咗幾塊"曲奇餅"! 幾好食架~


尋日同朋友歎完茶後去中超逛咗轉......

買咗包palm sugar - 樹糖 or 棕櫚糖，
係煮泰國菜常用既調味料，
其實煮冬蔭功 + Pad Thai 都應該用palm sugar!
之前未買我先用普通糖，下次再煮要試吓用palm sugar~

好多人會將palm sugar 譯做"椰糖"......其實係錯既!
椰糖應該係coconut sugar;
而palm sugar 正確應為"香椰糖"至啱~
Palm Sugar + Coconut Sugar 完全係兩樣野來!

不過喺依個乜鬼野都話要簡化既年代，
好多人已將香椰糖簡化地叫做椰糖，
甚至連好多正宗泰國入口既palm sugar，
包裝上英文就印palm sugar，但中文就印椰糖!
最初一少撮人錯，久而久之大咋人齊齊錯落去......
咁點先知道自己買得啱唔啱呢?

Palm Sugar 外型一般都係一餅餅，
有大餅又有細餅 (我依pack 係細餅! )
無論大餅細餅形狀都好似砵仔糕~

不過其實最容易分辨就係睇包裝上既英文名!
只要印住palm sugar 就可以嘞，
唔洗理佢中文叫椰糖、香椰糖、樹糖、棕櫚糖........



仲有幾日就到中秋嘞!

中超見到有沙田柚賣，我又買個來應應節!
柚皮唸住可以用來整蝦子柚皮......
不過1隻沙田柚夠唔夠呢?