2008年4月23日星期三

瑤柱蒸水蛋


我係用清雞湯來替清水蒸蛋既~ 慳番調味.........

1. 先將瑤柱或蝦米浸軟,如用瑤柱撕成絲瀝乾備用。

2. 雞蛋數隻打勻,盡量唔好打到出泡!

3. 加入同等份量的清雞湯和已浸軟的瑤柱絲或蝦米拌勻。

4. 隔水大火蒸約8至10分鐘至蛋液凝固取出,淋上豉油熟油 (係熟油~ 唔係滾油!),洒上蔥花即成。

P.S. 蒸蛋時留意唔好比鑊蓋上既"倒汗水"滴落蛋液之中~ 如果唔係蒸出來唔靚架!!!


8 則留言:

  1. 蒸水蛋我未成功過,一係好實,一係成條毛巾咁,真係好白痴!
    [版主回覆04/25/2008 02:03:00]我用雞湯來蒸,蒸幾耐都唔會實架! 就算蒸到巢哂皮唔靚仔都好滑滑架!  妳都試吓呀~~~~

    回覆刪除
  2. 蒸水蛋我會搵多個碟com面, 咁d倒汗水就唔會跌左入去d蛋面架啦~
    [版主回覆04/26/2008 07:34:00]我聽過有人話用保鮮紙包住~ 不過我個蒸籠係玻璃蓋,可以睇到蛋夠熟未,所以乜都冇用~

    回覆刪除
  3. hi Vca,
    好耐冇入黎, 頭先一次過追番晒你啲topic  
    我都好鐘意蒸水蛋, 尤其諗唔到煮咩嗰陣, 蒸水蛋真係快靚正, 我都係加雞湯一齊蒸, 通常加蟹柳, 因為兩隻馬騮最鐘意
     
    [版主回覆04/26/2008 07:37:00]係喎~ 真係好耐冇見喎!!!!
    用雞湯煮好方便~~~ 不過我唔係好鍾意食蟹柳...但我老公鍾意呀! 唔知係咪"馬騮"都鍾意食蟹柳既呢????  - 老公係馬騮年出世!

    回覆刪除
  4. 一見到烝水旦,就稔番"舊時",好有懷舊feel 呀!....掛住亞媽忝,係甘先,要打電話.
    [版主回覆04/26/2008 11:06:00]我都好掛住爹哋媽咪~~~
    今日先同佢地傾過電話!

    回覆刪除
  5. 我多數用蝦米蒸...好少用乾瑤柱蒸...
    [版主回覆04/26/2008 15:49:00]我都有用過蝦米!! 等我加埋落個食譜度先~ 提醒咗我唔該哂~~~

    回覆刪除
  6. 啱啱有個好朋友係美國過咗身, 都冇咩心機, 所以依排好少上黎睇呀
    我個女又係馬騮年架, 咁啱既, 我估小朋友個個都鐘意食蟹柳, 可能你老公仲有童真, 所以咪又like囉, 其實我都好鐘意瑤柱, 不過小朋友食就唔係太消化, 所以要就佢地囉, 上次我試過加咗半盒粟米蓉撈埋一齊蒸, 啲味又幾夾喎 , 我個仔超鐘意, 成日話要食"燒賣" (佢成日將"粟米"講成"燒賣")  
    [版主回覆04/28/2008 05:24:00]哦~ 原來係咁......安慰人既說話我唔識講.....但我自己都係過來人~ 5年前差唔多依個時候,我好朋友都離開咗我......最近睇咗本書裡面有句說話令我覺得好感觸 + 好啱 - "rather than be sad for her passing...let's feel grateful that she was born into this world." 大意係 - 與其為對方既離去而傷心...倒不如為對方曾經來到過依個世界而覺得感謝~ 多d記住大家開心既回憶啦! 共勉之啦~

    回覆刪除
  7. 講起又記得,以前試過用皮蛋&咸蛋+雞蛋一齊蒸,技術欠佳,但幾得意!
    [版主回覆04/28/2008 05:27:00]皮蛋會切碎...咁個咸蛋呢? 我估切碎咸蛋黃跟住咸蛋白撈埋落去雞蛋度??????? 我雖然未試過...但我想像到好食喎! "金銀蒸蛋"~~~~~ 嘻嘻......

    回覆刪除
  8. wan講嗰款蒸蛋叫"蒸三色蛋",  香港啲小菜館好多都有得食, 你返黎可以去啲飯館試下
    "rather than be sad for her passing...let's feel grateful that she was born into this world." 依句真係好啱, 唔經唔覺我同佢都識就18年啦,  佢係我識既人之中最勇敢最堅強既一個女仔, 我好慶幸能夠識到佢, 同佢做好朋友, 不過前幾晚睇到佢妹妹既msg, 講番佢係ICU既情況, 見到佢咁辛苦, 又忍唔住喊囉
     

    回覆刪除

Related Posts Plugin for WordPress, Blogger...