二人世界撐枱腳 - 2012年7月10日 + 11日 (附食譜)

無論煮一人前或二人餐都好，
超市買餸pack 好哂係咁大份就咁大份，
一人前往往最少要分兩餐先食得哂，
有時唔想連續兩餐食一模一樣既餸，
同一份材料要唸兩個唔同煮法......

所以Mr.T 搬咗返來真係好!
佢餓咗我既手勢咁耐，幫我餐餐清呢~

7月10日: 柱侯牛腩 & 荷蘭豆芹菜炒魚鬆

Weekend 買咗大塊靚牛腩，本來想加埋牛筋......
不過早一晚唔記得攞包牛筋出來溶雪!
算啦! 反正依塊牛腩好鬼大塊，一餐都食唔哂~

同平時一樣 - 無加白蘿蔔~
久未食過我炆牛腩既Mr.T好似餓鬼上身咁.....
碗裡面仲有一舊牛腩未食，佢對筷子已去夾第二舊!

上次買既急凍鯪魚肉只食咗一塊，
不過上次係一人前Mr.T無份食，今次特登整依個比佢試吓......

Weekend 買到好靚既芹菜，不過今次改咗用荷蘭豆......
原因好簡單 - 因為Asda 無蜜糖豆賣!

之前發現Mr.T鍾意食芹菜，
而家煮飯想佢食多d菜就好辦事嘞!
不過.......我都好鍾意食芹菜，
睇來下次我似乎要買大棵d先得嘞!!

7月11日: 牛腩瀨粉

漫畫"深夜食堂"有隔夜咖喱;
T家晚餐有隔夜牛腩......瀨粉!

之前一晚煲牛腩太多食唔哂，
所以尋晚無煮飯，煲返滾d牛腩...煮d瀨粉......
再加d葱花........

話咁快就成為一碗香噴噴既牛腩瀨粉!
隔過夜既炆牛腩更加入味，肉更加香軟呢~~~ ♥



牛腩尋晚已經食哂一舊無剩，只剩返少少牛腩汁~不過我尋晚煮多咗瀨粉......

無浪費! 今日晏晝來碗齋瀨加腩汁，都好好味啊~ ♥

柱侯牛腩食譜click here~
蜜糖豆炒魚鬆食譜click here~