二人世界食過乜 - 2013年8月9日至13日 (附食譜)

8月9日: 忌廉芝士煙三文魚意粉; 辣雞翼上星期五無買餸本來唸住等Mr.T放工後叫外賣，
不過對住咋餐牌來來去去都係印度咖喱呃洋人中國菜炸魚薯條，
唔想食依d野，但又唸唔到食乜!

摷吓雪櫃見有盒快到期但仲未開既cream cheese，
去超市買pack煙三文魚加個洋蔥，
話咁快整到兩大碟熱辣辣又好食意粉!

Mr.T想食肉，加多盒超市現成辣雞翼，
又平又快手既一餐，正過外賣多多聲!!
忌廉芝士煙三文魚意粉食譜click here~


8月10: 出街食Nando's

第二日星期六，Mr.T朝早又要去office，
我有野要買，所以又跟埋佢去愛丁堡，
等Mr.T攪掂工作後，我地唸唔到食乜既情況下，
去咗Livingston食Nando's........

幾乎次次食親Nando's都係咁既組合 - 每人半隻燒雞加2個sides，
再另加一份雞肝.......
Post上FB引死鍾意食Nando's但無得食既朋友仔，
不過老實講...我已經開始有少少食到厭! 無以前咁enjoy......

8月11日: 星期日燒牛肉午餐@99

99星期五晚來電叫我地星期日返去食飯~
99知道我近年有初一十五食齋既習慣，
可能佢以為我戒埋牛肉，特別問Mr.T我仲食唔食牛........

唔通99星期日整燒牛肉?
於是我問Mr.T: S(我姑仔)帶男友返去食飯? (姑仔男友係洋人! )
Mr.T一貫懵盛盛: 唔知呀! Mum無講喎~

星期日返到去一入門口，
99就叫我 + Mr.T幫手切青瓜砍蘑菇.........


我果然冰雪聰明!
剛切完青瓜砍完蘑菇等緊開飯時，姑仔 + 男友就返到來，
5人開餐，依餐有燒牛肉、車厘茄、青瓜生菜沙律，
炒蘑菇 + 約克郡布丁~

牛肉燒得啱啱好，好腍好好食~
不過如果舊牛肥返少少更香更好食!

8月13日: 照燒鯖魚; 蒜蓉炒菜心

依餐唔洗出街買餸，d餸完全免費! 嘻嘻~~~~

星期日喺99度食完飯，姑仔同男友去咗釣魚，
事前我同姑仔講笑 - 如果釣到魚要比d我~
點知當晚姑仔真係txt Mr.T話佢地釣到16條鯖魚!
不過有2條太細要放返落海，
佢地攞咗d魚去99度，叫我地過去攞~
因為果晚已太夜，所以99第二日朝早攞d魚過來比我，
唔記得點解仲搭咗大札菜心!

條條都眼仔碌碌好鬼新鮮!
細心既99仲已經幫我劏咗魚肚~

原本我weekend時已另外買咗餸菜，
不過見鯖魚咁新鮮咁靚，鯖魚唔留得耐，
所以插隊先煮咗d鯖魚，今次起咗魚柳用照燒方法，
真係好好食! 攪到我都想去釣魚!!!!!
照燒鯖魚食譜click here~

8月13日: 脆皮燒腩; 咖喱三文魚頭; 蝦乾炒洋白菜

依餐原本打算星期一晚煮，不過臨時有免費鯖魚 + 菜心，
所以順延至星期二晚~

Weekend喺中超買咗條又平又靚既豬骨腩..........

今次用咗個快手減咗步驟既方法來整燒腩，
味道無乜分別之餘，一樣都係脆卜卜好好味，
所以我將食譜簡化咗~

自製脆皮燒肉食譜click here~

仲咗條靚骨腩，仲有好鬼抵88p兩個大大新鮮三文魚頭!
(兌返港紙10蚊咋! 哈哈~~~ )

2大個三文魚頭煮埋一大鍋惹味咖喱三文魚頭!
可惜因為要累骨，Mr.T唔多識食，
我唯有將三文魚頭上大大塊既魚肉拱手相讓.......
佢就緊係話好好味啦!!
咖喱三文魚頭食譜click here~

蝦乾炒洋白菜(參考食譜)click here~