The Conjuring (詭屋驚凶實錄) - 2013年8月11日

99、Mr.T + 我都係恐怖片迷!
不過3個人之中有一個係膽小鬼...果個就係我......(抱歉~ )
我自己一個人既時候絕對唔會睇鬼片，
每次睇完鬼片當晚，任何時候我都要Mr.T同我共處一室，
即係無論我去廚房定去洗手間，我都要Mr.T陪我一齊去，
若佢要去洗手間，我又會跟埋入去........
正宗又要驚又要睇!

上次同99一齊睇World War Z，
畫頭就係依套The Conjuring，散場後99表示有興趣，
咁我同Mr.T都好有興趣，
於是星期日(8月11日)搵埋99一齊去睇~The Conjuring香港仲未上畫(8月尾先上! )，
而英國8月2日已經上咗，
無唸到套戲上咗個幾星期我地先去睇都仲會爆棚!
據聞套戲好收得，尚未落畫埋單，已經決定會開拍第二集~
睇完散場先知點解咁收得 + 點解仲會爆棚..........
因為真係好恐怖~~~~~~

華裔導演James Wan一直係我 + Mr.T心目中既恐怖片金漆招牌!
佢執導無論恐怖片懸疑片，都有一種令人唔敢抖大氣既緊張氣氛，
的確有一手! 所以見親有佢個名既戲都會有所期望~不過我 + Mr.T一向對關於exorcism既恐怖片無乜好感，
就算最經典既Exorcist 驅魔人，我地都唔多識欣賞!
而今次The Conjuring正正係以驅魔作為題材，
所以雖然有James Wan大名我地會捧場，
但入場前不免將期望稍為降低咗少少.......不過散場後覺得 - 唔單止無令我地失望，
Mr.T認為比先前既Insidious更出色進步咗!

記憶中無論套戲幾恐怖，我最多只會嚇到彈起，
不過我從來未試過會嚇到嗌出聲.......今次係第一次!
(唓~ 咁睇恐怖片緊係要覺得恐怖先過癮架嘛!! )
The Conjuring based on真人真事........

Ed and Lorraine Warren係美國一對義務幫人驅魔既夫婦，Lorraine自稱7歲起有陰陽眼;
而Ed雖無陰陽眼，但自小住既家卻有鬼係一間鬼屋~

兩人相遇成為夫婦，合作為其他人化解怪事，就如戲中所講"God brought us together for a reason!"
夫婦二人處理過上千件靈異怪事，
部份case更曾經被寫成書及改編拍成電影，
e.g. 著名既Amityville事件就係Warren夫婦處理，
而今次The Conjuring係改編自另一個家庭The Perrons既case~

As usual唔講戲既情節，
及完trailer有興趣的話不妨去戲院睇~
我只講 - 真係拍得好恐怖! 鍾意恐怖片既人不可錯過!






戲中提到Warren夫婦每次處理完靈異事件，
都會將附有邪靈既物件帶返屋企保管，
夫婦二人1952年將保存物件依個房間，
改作為"Warren Occult Museum"~戲中出現過既邪靈娃娃Annabell doll亦真有其物，
現保存喺museum裡面.........

不過戲中同現實既Annabell doll大不相同 (左為真版; 右為戲中版本)
雖然真實版本外表善良得多，不過一想到娃娃背後既故事，
真係有點令人不寒而心慄.......
將來有機會的話我都想去museum參觀一下，
親眼見一見Annabell!

後記........
星期日晚睇完戲先車99返屋企，
之後我同Mr.T都返屋企，成晚我都好鬼驚!
臨瞓前同Mr.T一齊睇緊網上關於Warren夫婦既紀錄片，已11點幾正睇得入神.......屋企電話突然響起嚇到我彈起!!
平時依個鐘數絕少會有人打來屋企架嘛........

99來電告知 - 姑仔晏晝同男友去釣魚釣到十幾條，
叫我地過去攞魚!!