2013年8月27日星期二

釣魚記@Loch Long Arrochar (2013年8月25日)


大約2星期前姑仔同男友去釣魚釣到十幾條鯖魚,
事後仲醒咗4條比我地;
之後喺FB見到有位住喺南下既blog友又釣咗40幾條鯖魚

請教過對方,發現並唔需要sophisticated既工具,
鯖魚咁鬼易上當!

咁好玩~ 於是星期日(8月25日)我同Mr.T又去試吓!!

買齊魚杆 + 魚鈎 + 假魚餌後就出發,
去上次姑仔釣魚既地方Loch Long~



是日天氣風和日麗,Loch Long湖畔風景優美~


我地沿住湖畔搵一處可以泊到車又可以釣魚既地方........



發現湖畔另一邊,有一大座伸延出湖正待拆卸既荒廢建築物!
離遠見到有人正企喺建築物上釣魚~

上網翻查一下資料,原來依度曾經係一座torpedo testing station,
用作試發潛艇魚雷既地方!



試發站既地上仍然留有當時搬運魚雷小車用既路軌~
據聞依座
荒廢試發站將會清拆,
並會改建成一個5星渡
假resort!


雖然
荒廢試發站爛溶溶,
但座落喺Loch Long真係另有一番味道!




周圍有好多依種蝴蝶飛舞,大大話話最少有十幾廿隻!
隻隻都一模一樣,好鬼靚~
(可惜佢地動作太快,好彩依張相影得佢好清楚!)


草叢中仲有好多野生黑莓(blackberry)~
(Mr.T唔比我試食.........
)

進入試發站後,要捐過一度晨早被人剪爛咗會勾頭髮既生锈鐵欄,
就到達適合釣魚既荒廢碼頭~

碼頭上已有其他人釣緊魚,睇佢地應該已釣咗一段時間,
因為旁邊既大膠箱滿載魚穫!

除鯖魚外,仲有好多其他我唔認識種類既魚!!

水清且極深,有好多海草 + 白色物體飄浮.........



仔細一睇原來係體型細小既水母!


好嘞! 睇吓我地既收穫..........




Mr.T幾開心!


仲大條過姑仔比我地果4條呢!


釣完魚好肚餓! 不過果頭無咩啱食..........



於是返Glasgow去試新開既International buffet!
都係印巴人開既自助餐廳..........



不過都唔錯喎! 雖然同Manchester Red Hot相比都係差dd,
但水準比我想像中高好多呢~




壽司雖然樣衰,不過味道都唔錯!


平時唔食甜品既我,因為天氣熱熱地,今次連甜品都食埋!


--------------------------------------------

好嘞~ 講完餐晚飯,係時候come clean........

可能大家會問: 妳 + Mr.T釣得2魚咋?
其實..............答案係0條!

我 + Mr.T都未用過魚杆釣魚,
我釣魚既經驗只係以前細個時用手絲chok泥鯭石狗公之類既魚仔......
出發去Loch Long之前又懶醒唔做research,
當日我地坐咗喺碼頭邊完全唔知道自己做緊乜, photo 106.gif
胡亂將魚鈎假餌勉強地綁喺魚杆上,
就唸住打天材波開始我地所謂既"釣魚"!

眼見碼頭上其他人,
隔唔夠幾分鐘就一次過2條、3條咁拉上出來,
我地就只有羨慕既份兒!
在場有位好強勁釣咗5、60條鯖魚既伯伯似乎有點睇唔過眼,
過來指點我地.........
我地用既魚杆,係用來坐艇仔出海用既魚杆;
我地用既魚鈎,係用來釣trout(淡水),唔係用來釣鯖魚(鹹水);
而我地用既假餌,都係用來釣淡水魚既........
換句說話,我地釣魚既用具........全部錯哂!
釣唔到,係絕對正常既!!

同伯伯同行既係一位都相當強勁釣咗4、50條魚既四眼先生,
依位四眼先生曾經多次以充滿同情既眼光望住我 + Mr.T.......
伯伯指點完我地之後,佢同依位四眼先生就開始收拾準備離開~
四眼先生收拾好後,突然將佢用來裝魚穫既膠箱放喺我身旁,
問我: Want a couple?
我一睇,膠箱裡面有2大條泛著銀藍色彩光既鯖魚~
我又驚喜又非常唔好意思地問: Are you sure?
四眼先生回答: yeah~ I have too many!
 photo 65.gif

向四眼先生道謝後,我將魚放入帶來既保溫袋........
依個時候伯伯打開佢自己裝魚穫既冰箱,
問我: Do you want some more?
哇塞~~~~ 我真係唔好意思嘞!
 photo _104.gif 於是婉拒咗伯伯既好意~
伯伯不屑地話: I don't like fish! I just save them for catching bigger fish~
原來伯伯果5、60條鯖魚只係留來做魚餌去釣更大條既魚!
 photo _1282.gif

伯伯 + 四眼先生一齊離去,我 + Mr.T都開始執野走人~
Mr.T突然問我: 妳洗唔洗攞住d魚影張相呀?
一不做二不休,既然有魚鈎.........
 photo _1273.gif


睇吓我地幾唔知醜! 嘻嘻~~~~~~~

碼頭上仲有一對夫婦釣緊魚.........
果位女士見到我地咁影相,即時大嗌話我地cheating!
依個時候我先發現..........
原來伯伯 + 四眼先生架車泊喺對岸不遠處,
正面向碼頭方向望緊過來食緊煙! 場面攪笑~~~~~~




雖然我地烏龍買錯哂釣魚工具,不過我地一定會再返來!
下次會帶住正確工具,誓要一雪前恥!!
(好彩我地醒目只拆開咗一枝唔啱既魚杆,未拆果枝可以退返錢~ )




多年前喺西班牙旅行時買下依個設計有點怪雞,
但我好鍾意既"紅立魚包包"..........



星期日去Loch Long前,
婆仔既我特別換咗依個包包,
期望紅立魚會為我地"招"來些少魚穫.........
Well~ 唔係自己釣既魚,咁算唔算係收穫呢?







Photobucket

15 則留言:

  1. 玩得好開心呀!!!
    [版主回覆08/28/2013 20:41:46]係呀~ 雖然自己釣唔到魚,但係都好好玩!

    回覆刪除
  2. 你地好搞笑,如果系我都會攞住黎影相....哈哈!
    下次出猫作弊要睇清楚有冇人
    [版主回覆08/28/2013 20:41:20]哈哈~~~~ 咁佢地都係攪笑啫!

    回覆刪除
  3. 哈哈,個個場面一定好好笑....見到你地去釣魚,攪到我都有啲心郁...我N年前都有釣過幾次...好想去釣下添
    [版主回覆08/28/2013 20:39:36]影相時真係好好笑!

    回覆刪除
  4. 最喜歡睇你啲小品,有時窩心,有時攪笑,有時感觸,多謝你的分享.
    [版主回覆08/28/2013 20:38:39]you're welcome TAM! 好開心你鍾意睇我寫既野~

    回覆刪除
  5. 果度好多水母啊! 好得意~
    唔怪得你個樣好似笑得有D尷尬咁啦~ 相信你地下次一定會大有收鑊呢~
    [版主回覆08/28/2013 20:38:10]d水母細細隻好得意~
    影相時笑到我地肚痛!

    回覆刪除
  6. sooo funny, lovely couple! Happy forever!
    [版主回覆08/28/2013 20:36:05]Thank you very much Happy! same to you~

    回覆刪除
  7. d 蝴蝶真係好靚呀..顏色好鮮艷....d水母好可愛呢
    [版主回覆08/28/2013 20:35:40]果度真係好多蝴蝶 + 水母!

    回覆刪除
  8. 好玩喎! 點解妳食咁多野都咁fit既呢!? 是不是天生的
    [版主回覆08/28/2013 20:34:46]係~ 我係天生瘦既!

    回覆刪除
  9. 啊...原來有分 ga....你後尾有冇問番個姑仔呀....我哋以前都係成日釣嚟釣去都釣唔到魚 ga...攪到以後都冇咩心機去釣魚....會唔會都關呢個原因呢?
    [版主回覆08/28/2013 20:32:24]有分架! 魚杆魚絲魚鈎魚餌....全部都有分架! 唔同力架嘛~ 其實我地都知依點,不過d用工具包裝好似預咗你係識咁,好多都無寫明邊隻打邊隻,我見同blog友比我睇既相差唔多,所以無問店員就買咗!

    回覆刪除
  10. the blackberries are safe to be eaten. We have the same in our garden
    [版主回覆08/29/2013 00:30:45]i know they are edible. just Mr.T thinks they are dirty

    回覆刪除
  11. 哈哈哈~~ 唔知伯伯同四眼先生見到既時候有冇笑呢?
    不過佢幾好人啵~~~指點你地又送兩條魚比你地
    唔知你地下次去會唔會再見到佢地呢XDD 要一雪前恥呀
    [版主回覆08/29/2013 00:30:08]太遠睇唔到佢地有無笑呀!
    蘇格蘭人大多係好友善~
    我唸佢地可能住喺附近或成日去釣魚,因為佢地臨走時同夫婦講see you next week!

    回覆刪除
  12. hahahaha 岩岩睇相以為你地收獲豐富會有食譜, 點知睇落去就笑左出黎 你地把握時間去釣多幾次啦~~gud luck!!!
    [版主回覆08/29/2013 19:12:18]蘇格蘭人大部份都係好友善架! (咁當然佢唔一定要教我地 + 比魚我地~)
    果度本身已經係渡假區,只係依座野會改建做5星resort~ 不過Mr.T話已經講咗好耐都未開始,建唔成

    回覆刪除
  13. 個袋好特別
    [版主回覆08/30/2013 00:56:54]係咪未見過咁怪雞既袋呢?

    回覆刪除
  14. 我都是未試過真正釣魚,只是細個時跟哥哥在碼頭用手絲chok泥鯭㗎咋,初時chok啲份量夠煲泥鯭粥,魚亦越來越少,以後就沒有再次釣嘞,不過如果有機會,我想試下摸蜆。
    [版主回覆09/02/2013 02:16:56]我以前細個用手絲chok泥鯭石狗公係喺西貢或長洲,碼頭我真係唔敢,d水太污糟......
    掘蜆好玩呀! 以前年年暑假我返香港都會成家人去西貢掘蜆架! 不過好多年無去過咯.....好懷念~

    回覆刪除
  15. haha.. you guys are really funny.... I was thinking if the same thing happens to me and my hubby (bought the wrong tool), what will we do. I think he will just blame me and then I will defend and talk back. It's so lovely how u turned the situation to a real funny incident.
    [版主回覆09/04/2013 21:27:14]haahaa~~~ it was for fun that we went fishing in the first place, besides no guarantee we would catch anything even if we bought the right tools. there is no point in trying to pin the blame on each other, so why not laugh abt it? we loved every min we spent together that day~

    回覆刪除

Related Posts Plugin for WordPress, Blogger...