2011年10月4日星期二

玫瑰的故事


其實我唔鍾意食洋人果種fondant 蛋糕,

不過我見好多用fondant 整既蛋糕好靚~ (咁當然要手工好先整得靚啦! )

於是我又想試吓整個fondant 蛋糕......

第一件事就係要學整fondant 糖花!

 我本身都有d整糖花既基本用具~ 例如:

 大咋唔同顏色既食用色素;


 之前喺香港買定準備用來整fondant 糖塑既基本工具~



早幾日正式開始試整糖花......


 首先當然係要買盒fondant icing 啦!

睇書話做糖花其實最好用gum paste,成品會細緻好多~

不過gum paste 價錢較貴,而且質地較硬又快乾,初學既我一定會慢手慢腳......

所以都係先用fondant 試吓!!



正式開始之前,先做d超簡單既淡紫色花仔熱熱身......


 將白色fondant 染成淡紫色 - 我無紫色食用色素,唯有用紅色 + 藍色溝出來!

搞咗一大輪先溝到依個淡紫色......



 再用上星期買既calyx 模吸出花花型~


 除咗溝色之外,完全毫無難度!



熱身過後,再溝咗一塊深粉紅色 + 一塊綠色用來整玫瑰花......


 開頭覺得還可以OK 似玫瑰......

但若想整大朵d就要加多幾塊花瓣,不過我覺得越加多花瓣就越唔似!  


 於是整到半路忍唔住去超市買咗札真玫瑰返屋企研究研究!


 最後整到眼花只係整咗5朵就收工! (整得最靚果朵收檔時唔小心比我禁爛咗!!)



本來我貪徒手整出來塊塊玫瑰葉都唔一樣 - 咁就夠哂自然嘛!

可惜自己技巧有限...

係塊塊葉唔一樣呀! 不過硬係覺得唔似玫瑰葉囉......


 最後都係買咗依set 玫瑰葉模幫手!


 本來只係去買玫瑰葉模,但去到店買吓買吓又買咗大咋其他野......


 珍珠色食用噴劑;


 甘油 - 用於軟化fondant icing;


 Blossom Tint 食用色粉 - 喺糖花製成品既花瓣上,乾掃上一層blossom tint色粉可以增加糖花像真度!


 紅色食用閃粉;


 可食用金色food pen;


 用來唧忌廉花既flower nail - 依個今次未用得著! 只係買定來遲吓學唧忌廉玫瑰花!


 自己溝淡紫色實在太麻煩,索性買多枝lilac 食用色素!


 矽膠焗墊 - 見品質唔錯,買塊來試試~



>>>>>>>>>>>>>>>>>>>>>>>>>>>>>>>>>>>>>>>>>>>

原本為咗整好幾朵玫瑰糖花只打算買玫瑰葉模......

結果一出街就買咗以上果咋野大部份同玫瑰糖花"唔啦間"既用具!

仲有以下幾樣更加唔啦間既野......



 今年七夕前幾日見到有人放孔明燈~


我未放過孔明燈,感覺好好玩好想試吓!  


 早幾日竟然比我喺超市見到有孔明燈賣! 呵呵~


 等一晚好天氣就同老公一齊去放咗佢! 期待ing~~~~~



>>>>>>>>>>>>>>>>>>>>>>>>>>>>>>>>>>>>>>>>>>>>

"獨子蒜"聽就聽過嘞,但我一直無見過其真身......


 尋日終於比我買到依pack 由意大利入口既獨子蒜嘞!

最初係佢蒜頭細細個,加個迷你籃仔咁鬼cute 既packing 吸引到我注意;

我原先根本無留意到原來依pack 係獨子蒜來!


 直至我睇到包裝上果句好鬼老土既"屎撈緊" - "One bulb, one clove, one love!"

見過人地話獨子蒜特香 + 特辣~

係咪特辣仲未知 - 因為未試;

不過就咁聞都聞到陣蒜香,果然係特香喎!



早前買d屎咁大果枝喜瑪拉雅山粉紅鹽 (網誌),不知不覺已食得七七八八......


 尋日喺一間健康食品店見到依包完全未磨 + 超級粉紅,足足1kg! 慢慢有排食咯~







16 則留言:

  1. 好野....我第一......哈...哈.......妳真好學嘞....朵花都好靚啊
    [版主回覆10/04/2011 23:20:00]過獎嘞靚婆婆!  我係心野樣樣都想試吓,唔係好學啊!
     
     

    回覆刪除
  2. 第一次都整到朵玫瑰花出嚟好勁啦
    [版主回覆10/07/2011 00:17:00]Thank bv! 聽日會試吓用另一方法再整過,希望今次會整得靚d!
     
     

    回覆刪除
  3. 好靚 ~
    [版主回覆10/07/2011 00:17:00]過獎嘞其美~ 今次只整得麻麻地咋! 希望下次會整得好d~
     
     

    回覆刪除
  4. 吾好意思,我想問下個鹽係英國邊度有得賣?? 我好想買但吾知邊度有  Thanks!
    [版主回覆10/07/2011 00:16:00]依包我喺Glasgow 一間有機健康食品店買既: http://www.grassrootsorganic.co.uk/   不過唔知佢地有無online shopping?
     
    一係就去Lakeland Limited! 如果妳附近無分店,可以online order~
    http://www.lakeland.co.uk/14583/Himalayan-Pink-Salt
     
     

    回覆刪除
  5. 玫瑰葉 邊邊有齒狀, 真係會幾難整,不過我估你整多幾次就似,個模都係比你放埋一邊 
    [版主回覆10/07/2011 00:10:00]其實果套玫瑰葉模我見到好耐架嘞! 今次除咗想整得似之外,仲有另一個原因令我買套模.......
     
    就係我發現咗一間店依套模比起其他店平一半!  所以唔買有種唔抵既感覺!!
     
     

    回覆刪除
  6. T太太這個玫瑰的故事比她與家明之間的更感人~
    第一次整D花就咁靚係唔在講的,因為之前已認識到你的藝術天分,
    感動我的是你的認真和嚴格、一絲不苟的精神!
    利其器 + 嚴其材 + 精其工 = 善其事 !
    [版主回覆10/07/2011 00:08:00]依個版本係咪比亦舒版更峰迴路轉呢?
     
    不過太過獎嘞! 自問今次真係整得好麻麻! 我聽日會試另一個方法去整,希望今次會整得靚d啦!
     
     

    回覆刪除
  7. 你真系好埋得~
    [版主回覆10/07/2011 00:06:00]Hi Cindy 妳好嗎? 咩野好埋得???
     
     

    回覆刪除
  8. 你真係勁.......仲好有心機...... 整得好靚AR!!
    [版主回覆10/07/2011 00:05:00]過獎嘞Yvonne! 今次整得真係好麻麻地,我好唔滿意啊.....不過聽日我會試另一個方法去整,希望今次會整得靚d啦!
     
     

    回覆刪除
  9. 真既一樣 你好叻丫  仲好好心機真係要向你多多學習
    [版主回覆10/07/2011 00:03:00]過獎嘞pinky! 我覺得今次整得麻麻地咋,聽日我會用另一個方法再試過,希望今次會整得靚d啦~
     
     

    回覆刪除
  10. It looks pretty! Very professional!
    [版主回覆10/07/2011 00:01:00]Thank you 荔枝冰! but it's just so so, not good enough. will try it again tmr, hope i can make it better this time!
     
     

    回覆刪除
  11. 嘩~整得真係好靚.如果係紫色我估一定都會好靚
    我近來開始鍾意桃紅色 每次見到好自然覺得妳都會鍾意
    [版主回覆10/07/2011 00:00:00]過獎嘞Andrea! 今次只係整得麻麻地咋,我唸住聽日試吓用另一個方法,希望今次會整得靚d啦~
     
    我覺得桃紅色同紫色好配好襯啊! 我而家會唸起妳送比我果個桃紅玫瑰咕o臣~
     
     

    回覆刪除
  12. 我好奇怪妳用什麼方法將咁大舊鹽整碎? 我真是想不到.
    [版主回覆10/06/2011 23:53:00]要用時先用個磨磨碎佢,用幾多磨幾多,好似芝士咁!
     
     

    回覆刪除
  13. 整到好似真花咁呀
    [版主回覆10/06/2011 23:50:00]過獎嘞Coey! 只係似花但唔似玫瑰.....
     
     

    回覆刪除
  14. 好靚呀, 你真係叻到冇朋友呀
    [版主回覆10/06/2011 23:35:00]過獎嘞甜薯小姐!  今次我都整得唔靚,希望之後再整會有進步啦!
     
     
     

    回覆刪除
  15. 玫瑰花 整的好靓,但.....到最后你怎样解决了些花呀??
    [版主回覆10/06/2011 23:34:00]多謝月兒讚賞!  Fondant 風乾後可以長期保存,所以d花可以keep 住遲吓整蛋糕用來裝飾~
     
     

    回覆刪除
  16. 好埋的即系~好喜欢买东西 乜都可以买一餐甘解!
    [版主回覆10/07/2011 18:07:00]OIC~ 其實我已經收歛咗好多,我以前shopping 仲加凶狠!!
     
     

    回覆刪除

Related Posts Plugin for WordPress, Blogger...