依篇係離家出走前寫落既，
不過未完成就走咗佬，
所以依家先post 返!以為越用得多新版Yahoo Blog 會越習慣，
相反係越用越火滾就真!
不過其實鬧都係嘥氣，都係講返食野好過......
10月21日午餐: 自製雞肝醬(Homemade Chicken Liver Pate)
最近無意中發現Asda 原來有急凍雞肝賣~
細細盒，唔洗好似中國超市要一次買咁多，
一盒份量整到1又1/2個ramekin，夠哂慢慢食!
今次第二次整雞肝醬，
老公話今次仲好食過上次......
連我自己都覺得係呢!
唔知係自己手勢進步咗?
還是因為今次買咗枝靚d既紅砵酒來整呢?自從學識整雞肝醬後，我真係覺得好易整!
而且仲係餐廳食到既"高級"味道來呢~
我真係唔明點解超市賣現成雞肝醬，大部份都係唔好食既......
自製雞肝醬(Homemade Chicken Liver Pate)食譜click here~
10月22日午餐: 檸檬香草烤雞沙律
買咗依隻Nando's 出品既peri peri 醃料好耐都未試......
第一次用就用來整依個烤雞沙律~
睇包醃料乾爭爭咁款，估唔到醃出來又幾好味喎!
不過始終做唔到Nando's 餐廳燒雞果隻味......
咁又係既...如果個個買包鎊幾銀既醃料返屋企就整到餐廳既味道，
咁仲邊有人幫襯佢地d餐廳食野呢?
Peri Peri 檸檬香草烤雞沙律食譜click here~
10月24日: 白酒鮮蜆意粉是晚要一個人食自己!
因為上個星期日晚(10月23日)Mr.T 臨時決定第二日星期一要出trip~
於是星期一晚我就快手整個白酒鮮蜆意粉比自己當晚餐!
平時我會買定細枝(125ml)白酒 + 紅酒各一枝擺定喺屋企，
以備不時之需用來煮西餐!
通常煮野紅酒白酒既份量只用好少，
我本身又唔飲酒，Mr.T 又只飲啤酒，
所以我唔會特登開大枝白酒紅酒來煮野食!
不過今次唔記得幾時用咗枝細白酒又未補倉，
我又唔想特登出街買酒喎......
於是今次破例開咗大枝白酒來煮意粉!
我地唔飲wine，咁點解屋企會有酒既呢?
查實我地屋企有大把酒!
白酒、紅酒、香檳、白蘭地、威士忌、伏特加......
靚野cheap 野都有......
全部都係老公d朋友或佢公司玩抽獎送既!
(洋人最興送酒架啦!!)
眾裡尋它揀咗枝澳洲白酒(因為見佢個樣最cheap，用來煮野啱哂!)
咁鬼大枝煮意粉只用咗好少，
於是斟咗一杯來自對......
哇~ 好酸好鬼難飲!
白酒鮮蜆意粉食譜click here~
10月25日: Marrow瓜雞肉湯螺絲通粉
Mr.T 出trip 未歸，所以是晚都係一個人食自己......
平時我會用節瓜來煮依個湯粉;
節瓜唔係時時有得賣，買唔到節瓜時我就會改用翠玉瓜~
經常喺洋人超市見到依條一半節瓜一半翠玉瓜既物體 - Marrow
搵唔到中文名，只知佢叫做Marrow~
無買過 + 從來都唔知點煮，
今次即管買咗條來煲粉試吓......
原來依條Marrow 煮出來外形 + 味道均激似節瓜呢!
無心插柳竟然比我搵到節瓜代替品~
以後我就當Marrow 節瓜咁來煮啦!!
節瓜肉片大地魚湯螺絲通粉(參考食譜)click here~
樣樣都好吸引呀 ^^
回覆刪除[版主回覆10/30/2011 21:45:22]Thank you Katie! ^^
雞肝---膽固醇高唔高架?
回覆刪除[版主回覆10/30/2011 22:36:42]任何肝臟都係高膽固醇，不過膽固醇係我好朋友來! ^^
雞肝醬好似唔錯咁啵
回覆刪除我淨係食過鵝肝醬 有咩分別架
[版主回覆10/31/2011 19:29:17]材料 + 食味唔同囉! 雞同鵝本身都好有分別啦~
你個blog介紹的美食仍十分的吸引呀!
回覆刪除[版主回覆10/31/2011 19:29:41]Thank you very much Rose! ^^
樣樣都好好味咁喎，搞到我夜麻麻都口痕痕想搵嘢食添！(^ v ^)
回覆刪除[版主回覆10/31/2011 19:30:31]下次食飽飽先入來睇我個blog 嘛! ;-)
雞肝係乜味架？同鵝肝係咪差勁遠？？
回覆刪除[版主回覆10/31/2011 19:34:40]好難用文字形容雞肝醬咩味喎...咁雞同鵝係兩樣野來，當然會有分別啦! 香味、食味、口感都唔一樣，不過我唸如果唔食開肝醬既人未必會食得出分別.
雞肝就食得多.....雞肝醬就未試過....
回覆刪除[版主回覆10/31/2011 19:36:38]我依邊幾乎間間意大利餐廳都有雞肝醬! 反而鵝肝醬就未見過，只見過foie gras~
雞肝係內臟,最好不要食呢,無益,,,
回覆刪除[版主回覆10/31/2011 19:39:16]雞肝含好豐富維他命A + 鐵質，其實係好有營養架! 只係凡內臟都高膽固醇，不過食乜只要適可而止就無問題啦~
我鍾意你個意粉呀, 見到都流口水呀...
回覆刪除[版主回覆10/31/2011 19:41:40]依個意粉超快手煮又好味! 我鍾意落好多白酒~~~ ^^
乜肝醬...間唔中食下都是一種享受啊 ! ^^
回覆刪除[版主回覆10/31/2011 19:43:07]我只好雞肝 + 鵝肝醬架咋! 我好唔鍾意豬肝醬因為有陣味....
跟妳個做法整大地魚湯底，原來真係好好味，^0^ 除粉麵外，我仲試過做紫菜湯同埋泡飯等，都一樣咁正，不過我就將未處理的大地魚放左入冰箱，有人話是錯的方法，惟有盡快食哂佢囉！
回覆刪除[版主回覆11/01/2011 05:05:07]我由細到大V婆婆V媽媽煮親湯粉都係用地仔魚來餚湯底架! ^^ 我將未食既地仔魚放喺陰涼既地方，其實可以保存好耐架~ 另外可以浸吓佢，加油 + 蒜蓉蒸來食，好鬼鮮甜架! 不過唔好成日食呀，地仔魚幾燥架!! =)
人地本來已經食飽咗，但見到你d嘢好鬼吸引，攪到我又口痕痕心思思想食嘢咋嘛！
回覆刪除[版主回覆11/01/2011 05:05:49]咁妳下次預備埋野食先入來，以備不時之需嘛! ;-)
WA, 衰鬼你個雞沙整到咁靚GE, 你而家真係好勁呀
回覆刪除[版主回覆11/01/2011 21:51:30]Thank you enya! ^^
因為你這番話：以為越用得多新版Yahoo Blog 會越習慣，相反係越用越火滾就真!不過其實鬧都係嘥氣，都係講返食野好過......
回覆刪除令我大叫好。真的是我的心聲。
[版主回覆11/03/2011 17:58:22]日日寫，日日都有新問題發現...唉!︳
我好鐘意你煲果D扭紋粉呀~~~
回覆刪除[版主回覆11/18/2011 00:10:03]懶唔想整咁多功夫時最好煮粉! 快手搞掂有瓜菜有肉有湯，熱辣辣好味又飽肚!! ^^