二人世界2013第一餐三餸一湯 - 2013年1月16日 (附食譜)

唔知大家有無睇新聞知唔知道英國有大風雪呢?

當英國各地大風雪到交通癱瘓學校停課既時候........

Glasgow 無落大風雪交通無癱瘓之餘，仲陽光普照好好天! 

Glasgow 無落雪咩?
其實有架! 仲已經落咗2次添!! 
氣溫一直持續零度或零下，根本凍到係應該落大雪既天氣，
但偏偏谷住谷住落唔出，最終落得出果2次就得d屎咁多，
地面只鋪咗一層薄薄既積雪，第二朝太陽一出曬一陣就無哂，
十足十便秘咁既款......

天氣凍就要食飽d......要煮多d飯......
不過又係因為天氣凍......
好多時想煮飯但唔想出街買餸!
仲有10日左右，2013年話咁快就過咗一個月，
不過暫時今年我煮碟頭多d，so far 只煮過一餐三餸一湯~ 

我幾時都話 - 唸唔到煮乜或can't be bothered 既時候，
最好就係煎牛扒! 快 ‧ 靚 ‧ 正~ 
所以當我唔想出街買餸既時候，
我就會請Mr.T代勞 - 放工時順便幫我買牛扒返來，
我就較啱時間煲定飯，Mr.T + 牛扒返到來就即煎，
10分鐘左右就有熱熱碟頭牛扒飯食嘞! 

1月2日: 格格肉眼扒碟頭飯 + 新年飯既剩餘物資 - 少量翠玉瓜 + 黃燈籠椒

1月5日: 再來格格肉眼扒飯配翠玉瓜

就算幾鍾意食牛扒都好，食得多都會厭.......

有時連煮都懶得煮就會叫外賣!  (1月6日)

不過其實天氣咁凍，最正就係食一d熱辣辣有汁既餸! 好似.......

1月8日: 醃檸檬青橄欖摩洛哥塔吉鍋燜雞

炆好一大鍋........

有汁餸熱辣辣配飯一流! 

醃檸檬青橄欖摩洛哥塔吉鍋燜雞食譜click here~

1月9日: Beef Bourguignon
依餐配薯仔 + 紅蘿蔔仔，我覺得依個配白飯都會好好味! 
Beef Bourguignon 法式紅酒燉牛肉食譜click here~

1月13日: World's Best Omelette by Mr.T
是日係星期日，平時星期日我 + Mr.T會出街食，
不過之前一日星期六Mr.T去咗倫敦開會，
本來想跟埋去倫敦既我因為"親戚來訪"留喺屋企休息......

Mr.T星期六晚開完全漏夜返來，
返到Glasgow 已經係星期日清晨，一覺瞓到晏晝點幾鐘先起身，
決定留喺屋企hea一日，不過是晚改為Mr.T煮比我食~
我只需要一路玩電腦一路等食，爽! 

雖然我係煮飯婆.......
不過omelette 係一樣我永遠整得唔夠Mr.T好既食物!
Mr.T整既蛋皮金黃柔軟又moist + 厚薄適中......
外表 + 味道都無得彈! 
我呢......整親都係相反!! 所以我食omelette 一定要Mr.T整~

1月16日三餸一湯: 蕃茄薯仔湯; 豉汁蒸排骨; 翠玉瓜炒炸魚片 & 清蒸立魚(原來長氣既我講咗咁耐而家先講到標題依餐......之前果d當熱身啦! )

假期前後都煮咗咋比較fancy 既菜式，
想食返d最家常不過既小菜.......

蕃茄薯仔湯食譜click here~

豉汁蒸排骨食譜click here~

翠玉瓜炒炸魚片(參考食譜)click here~

清蒸立魚(參考食譜)click here~

依條立魚雖然係喺超市買既養魚，
不過好新鮮，加上我又好手勢蒸得啱啱好，
無怪味 + 肉好滑，好好味! 

上星期日無出街食......尋日(1月20日)晏晝去咗食壽司!
天氣太凍，食生冷野既胃口好明顯細咗，
今次只食咗23碟 + 4碗味噌湯~

 
晚餐外賣 - 我既sausage supper + Mr.T既fish supper
(飲食非常唔健康既一天! )