DIY環保酵素

我發現人既口味真係會隨住年齡而改變....... 
10歲前我同其他所有小朋友一樣食飯時多數係"誓願"，
只鍾意食餸唔食飯;
但而家既我變成咗一個飯桶!
一定要有飯先食得落餸，無飯食仲會軟手軟腳~
我自少就好鍾意飲清茶，不過好討厭玄米茶果陣炒米既味道;
廿零歲時有一日我口味突然改變，好想飲一杯熱辣辣既玄米茶......
自此我屋企常備一大罐玄米茶!

由細到大我都唔鍾意食水果，尤其至憎係橙!
細個時曾經試過因為有人要我食橙，
我堅拒而將自己反鎖喺茅廁裡面!
(返出來後緊係比人打到飛起啦.......)

不過最近我突然變到好鍾意食橙，
晚晚食完飯都要食2個橙先安樂!

鍾意咗食橙，屋企突然多咗好多橙皮.......
醒起早排睇報紙講，
柑橘類水果(即檸檬、橙、西柚、柑之類)既皮含有檸烯(檸檬油精)，
有效去除油漬，用橙皮來洗碗會好乾淨，
好奇之下早幾日親身試驗一下，果然真係洗得好乾淨喎!

但細塊既橙皮好難用來洗碗，不過日日都有2個橙皮，
既然明知可以廢物利用，若揼咗好浪費啊!一於試吓用來DIY環保酵素!!


1. 首先預備膠樽一個(我用1L lemonade 膠汽水樽)。


2. 製造環保酵素材料: 1份糖(黃糖、黑糖或糖蜜 - 唔係蜜糖呀!! ) + 3份鮮垃圾(水果皮或未煮過既蔬菜頭菜尾) + 10份清水

3. 先將清水和黃糖拌勻。(我用清水600ml + 黃糖60g)


4. 再加入撕碎橙皮180g拌勻，所有果皮要浸在糖水中。


5. 蓋緊樽蓋，放在陰涼通風地方發酵3個月即成環保酵素。


- 頭一個月樽內會產生天氣體，每日將樽蓋扭鬆釋出氣體後再扭緊繼續發酵;

- 製作環保酵素既容器要留有發酵空間，不能全滿;

- 完成後既酵素經過濾隔渣 + 稀釋，可作為多用途環保清潔劑使用。
詳情請參考: 環保酵素稀釋用法