大減價日誌

之前2年既聖誕 + 新年都喺香港渡過，
返到來英國時，大減價已經結束得七七八八......
今年留喺英國過聖誕 + 新年，
當然要把握返機會啦!

雖則話要把握機會，但其實我真係無咩特別需要或想買......
不過依點非常容易解決，只要我屹起身去躝街就一定會有收穫!
哈哈~~~~~~
 
先講返29號我牛一果日，食生日晚飯前去躝咗一陣街.......

聖誕theme 曲奇模

基本上我 + Mr.T都唔食餅乾既，我本身亦無乜興趣整......
但聖誕期間喺FB見到大家整既糖霜曲奇好鬼靚，
攪到我又心思思想整埋一份!

不過一我無聖誕曲奇模，二聖誕已經過咗......
過咗聖誕就啱哂嘞 - 因為聖誕野一過聖誕就會即時減價!

依套買定出年用~
Tala 係烘焙用具名牌來，減到咁平真係好抵呢!

電子沙漏廚房計時器

早排煲湯時將平時用開既廚房電子計時器放得太近煲湯，
可能熱得滯又或者比蒸氣蒸得太耐，
我親眼睇住個顯示屏垂死地眨咗兩眨後熄咗，
之後撳極都無反應!

依個沙漏型好得意，真係可以好似沙漏咁兩邊計時呢~
加上有埋時鐘顯示，好好用!

糖霜/朱古力唧管

是日只買咗依3樣野，
點知返到屋企睇吓張單先發現........只計咗2樣野!
原來依個唧管無計到錢喎!! 呵呵~~~~~


New Year Sales 1月2日正式開始~~~~~
可惜大減價頭2日落大雨，完全淋熄哂我既購物慾......落足2日雨，1月4日終於放晴!

是日去咗愛丁堡搵Mr.T食lunch，食飽飽後進入作戰狀態!

收穫!

先去日本餐廳隔離既泰國超市入2枝白胡椒粉，
依隻曼谷源順號，係我食過最正既白胡椒粉!

More baking stuff........

依個都係買定出年聖誕用既!

白色心型布丁模4個

依pack 野係醒目Mr.T搵到既~
佢知道我鍾意白色心型物體，攞過來問我要唔要，緊係要啦!!

買來有特別用途既木鑊剷 (遲吓先開估話比大家知! )

勁可愛大眼鴨仔膠絲鮑魚刷

可愛到唔係好捨得用! 不過已經拆咗來用嘞，
而且洗野洗得好乾淨呢~

早排買咗雙色忌廉唧咀，但當時唔記得買埋既唧袋........

貴貴地但超級襟用既膠手套

發花癲bath towel

原本想買2條，比錢時先知只攞咗1條，
但又費事走去攞多條.........

發花癲tea towel

可愛鹿仔暖手包2個

另外仲有套無影到相既窗簾，
由於套窗簾實在太重，Mr.T又就快收工，是日就此收檔，
去Mr.T office 接佢放工一齊返屋企!


第二日星期六本想趁Mr.T返半晝去Glasgow 搏殺，
點知Mr.T 突然玩驚喜，換好哂西裝...打好哂呔....
攞埋公事包出去.........買麥麥早餐返來!
就係咁我打消咗搏殺既念頭，
同老公喺屋企hea 足一日~


星期日先去Glasgow City Centre食lunch (網誌)，
之後行咗大約2粒鐘，感覺大減價似乎已進入水尾!
收穫雖少，不過每樣都好鍾意........

Lakeland 買既米紙雪花

靚係靚.....不過原價發神經£2.99 each，
依個價錢我一定唔會買!
因為過咗聖誕勁減至99p each，
反正2015年先到期，又買定出年~

暫時未知買來做乜既Cath Kidston 花花袋

Mango一千零一件細碼粉紅針織top (好鍾意!! )


往後幾日零零碎碎既收穫.......

發花癲廚房掛勾

純粹覺得靚 + 得意.......
不過唔知係咩來，唔知點用又唔知買來做乜既閃閃雀仔.......

扮靚靚.......

米色靚靚盒裝紙巾盒

New toy - Cake Pop Maker

係我最鍾意既桃紅色呢!