二人世界New Year - 2012年12月31日 + 2013年1月1日 (附食譜)

之前連續2年既Christmas + New Year 都返咗香港渡過，
今年留喺英國過聖誕 + 新年，
隆重其事提早唸定聖誕 + 新年兩個大日子食乜!

之前都提過英國每年既12月25日 + 1月1日所有超市食肆都唔開門，
不過我要食材新鮮，
我唔興洋人習慣買定大堆食材塞喺雪櫃食個幾兩個星期，
所以煮聖誕 + 新年餐我都係平安夜 + 大除夕先去買材料確保新鮮~

平安夜果日我晏晝先去超市買餸，
雖然多人搶購，不過staff 不停補充貨架，
一早寫定購物單既我兜一個圈好快就買哂我要既野!
(雖然返到屋企後發現攞錯野 + 漏買2樣野要出去換......)

雖然平安夜買餸買得咁順利，但大除夕我都唔敢咁老定，
10點零鐘我已經去超市入貨，
點知今次咁早去，已經有好多貨架空哂!!

西蘭花得返兩個，即時立咗一個;
黃色燈籠椒剩返三個咁大把，有一隻開始爛爛地;
走地雞胸無哂，連corn fed 既都無，唯有買普通雞胸;
包裝新鮮紅酒gravy 無哂，轉買樽裝;
Extra Special 既cheddar cheese 賣哂，買普通cheddar cheese.....

以上都係我始料不及既!
雖然部份材料買唔到我預期既，
不過尚可搵到代替品，影響不大 + 未至於打亂我陣腳~

但係當我去到放pastry 既凍櫃時，
見到puff pastry 果格空空如也，我就開始panic 嘞!! 
牛柳已買，但一定要有puff pastry 先整到beef Wellington，
難道咁鬼忙仲要我自己搓pastry 咁殘忍??? 
即時打電話向Mr.T求救........
5分鐘後偉大既Mr.T回電告知 - 佢已經幫我返咗一pack!
Problem solved!! 

大除夕老翻咗生日當晚喺Gandolfi Fish 食過既Smokie linguine (網誌)，
結果大成功! 
Mr.T話激似，不過我既老翻無咁漏，佢更加鍾意;
但我自己就比較鍾意餐廳濃郁正版，
下次再整時落多d忌廉就啱啱好嘞~

雖然Mr.T手機成晚嘟嘟響(朋友叫我地出去玩!)，
不過我地食飽飽喺暖笠笠舒舒服服既屋企完全唔想郁，
決定留喺屋企睇電視倒數~ 

1月1日天氣非常好~
新一年天氣好加埋食餐好，好好去迎接新一年新開始! 

喺廚房忙咗大輪，終於食得嘞! 

今餐有雙頭盆 - 芝士忌廉蔬菜千層杯 + 麵包碗西蘭花忌廉湯

第一次整麵包碗，喺廚房準備其他菜色忙到氹氹轉，
攪到擺烏龍預備咗蛋白液但唔記得掃，
又用錯黐底焗盆攪到其中一個麵包甩底.....
好彩反轉後仍然用得啫~ 

頭盆除咗有Beef Wellington 之外，
仲有依個雜菜雞肉串燒!
我覺得翠玉瓜 + 黃燈籠椒比雞肉更好味~ 

依餐既主角 - Beef Wellington
已經想整Beef Wellington 好耐架嘞! 不過唔知點解遲遲無實行.........

一直以為Beef Wellington 好難整得好既我，
一早有哂心理準備牛柳可能會太熟......
但切開後見到Beef Wellington 應有既粉紅色，大喜! 

仲有大盆Yorkshire Pudding......

淋埋紅酒gravy........兩個人食哂整條Beef Wellington!
大滿足~ 


依餐預先擬訂既menu 本來仲有potato rosti......
不過Mr.T 覺得已經好多野食太豐富，
肯定食唔哂又唔想我整多樣咁辛苦，所以最後無整到~

不過飯後有甜品 - traditional baked cheesecake

原本打算裝飾吓個餅，不過食飽後太懶......
用icing 筆寫幾隻字算嘞.......

芝士餅係參照Philadelphia website 食譜做法，
不過芝士餅入爐後，
大懵既我唔小心撞到焗爐溫度制，
原本170C變咗200C! 到我發現時已經太遲......
芝士餅變咗黑炭頭!! 

好彩無燶到，味道都幾好啊~ 


Smokies Linguine in a Tomato, Cream & Parmesan Sauce食譜click here~
Creamy Broccoli Soup in Bread Bowls食譜click here~
Creamy Vegetable Filo Cups食譜click here~
Mixed Vegetables & Chicken Kebab食譜click here~
Beef Wellington食譜click here~

Yorkshire Pudding食譜click here~

Traditional Baked Cheesecake食譜click here~