Burns Night 的免費Haggis (2013年1月25日)

每年1月25日係Burns Night - 紀念蘇格蘭詩人Robert Burns 既日子!
Robert Burns 係乜水?
相信大家對"Auld Lang Syne"依首歌應該好熟識，
"Auld Lang Syne"就係出自Robert Burns 手筆架嘞~

唔明"Auld Lang Syne"點解?
唔出奇~ 因為唔係英文來!
而係Scots Leid, aka Lowland Scots - 一種蘇格蘭方言，
即係好似我地既客家話、潮州話......之類~

Burns Night 係一個蘇格蘭傳統日子，
依一日好多人都會食一種蘇格蘭傳統食物 - Haggis 作為晚餐!
Haggis 係以攪碎既羊內臟(心、肝、腰、肺)、
混合洋蔥、燕麥、香料、肉湯 + 調味，
塞入羊胃中札好，再放入水中慢煮數小時而製成~
有人齋聽就已經覺得核突，不過我覺得好好食!

Burns Night 蘇格蘭人食haggis 時會配"neeps and tatties"同食，
Neeps 係蕪菁甘藍蓉(即瑞典青蘿蔔);
而Tatties 就係薯仔蓉，
依個組合被稱為Burns Supper~

我來咗蘇格蘭咁多年都未煮過Burns Supper，
今年決定要試吓整! Burns Night 晏晝去超市買材料，
買買吓突然聽到有人近距離吹bagpipes(蘇格蘭風笛)........

轉身一望，就見到一位著住kilt 既風笛手，
後面有位經理狀既男人手捧大個用鍚紙蓋住既焗盆......
我即時估到焗盆裡面既一定係haggis!

Burns Night有一個我一直覺得好好笑既傳統.......
Mr.T認識一位女士，
每年Burns Night 佢都會攪一個為癌症病人籌款既慈善餐舞會，
佢每年都會邀請我地去，我地去過2次，
依一晚既晚餐當然係Burns Supper 啦~
不過Burns Supper 開飯前有一個好隆重既儀式......先有位風笛手吹住風笛帶頭，
後面有一至兩位同樣身穿成套kilt既男士，
捧住一個大盆，大盆上放住大舊haggis 跟隨風笛手出場，
(就好似我喺超市見到既情況咁!)

風笛手引領男士(們)到場中一張大枱放低盆haggis 後，
有人會朗讀一首Robert Burns 既詩"Address to a Haggis"，
朗讀完畢後全場賓客舉杯向舊haggis 祝酒，
之後男士就會切開舊haggis 分比賓客......
每年我都忍住笑!

講返超市....我見好多人跟住風笛手，
我又八卦跟埋一份，
最後佢地喺近超市門口處一張大枱停低.......

職員開始將焗盆內既haggis, neeps and tatties 盛入發泡膠小杯，
免費派比超市內既客人!

無人讀詩，風笛手繼續吹風笛.......

我當然唔執輸攞埋一份啦!