一個我等了10年的男人 (2013年5月17日)

10年前2003年既暑假我同Mr.T一齊返咗香港，
有日喺尖沙咀買咗飛準備睇一套極度垃圾既爛戲<大逃殺2> ，
趁開場前既空檔，我地去咗HMV打躉，
我買咗克羅地亞鋼琴手Maksim Mrvica，
佢當時第一張全球發行既專輯"The Piano Player"~

其實當時我返香港前，已經喺英國電視睇過Maksim既MV，
一聽鍾情，非常鍾意佢將古典音樂crossover流行音樂既style，
同時更加欣賞佢驚為天人既琴技!
所以喺香港見到佢既專輯第一時要買~

比錢時店員話我知2粒鐘後會有個簽名會，
因此爛戲睇到一半我地就離場返去HMV排隊.......
當年唔興乜鬼都影一餐去邊都拿住部相機，
一心只唸住排隊攞親筆簽名.......
不過排緊隊時見前面既人個個都同Maksim影合照，
我就開始揼心口!!

好彩一路排隊一路同排我前面果位小姐吹水，
依位好好人既小姐幫我同Maksim影咗幾張合照寄比我!

簽名會後Maksim去咗海港城作現場表演，
可惜當日我地隨後有約，無緣睇到佢現場表演.......

依張封面、內盒 + CD上各有1個當日我親眼睇住Maksim
簽上去既親筆簽名CD，比多多錢我都唔會賣!

因為一首Maksim version既"Flight of the Bumblebee"，
令我迷上咗Maksim既music，
而且連Mr.T都受我感染埋一份~
當日睇唔到Maksim現場表演，我一直覺得好遺憾......
Mr.T承諾若Maksim來英開show，一定會帶我去睇!

殊不知2007年我同Mr.T去完法國旅行返到英國，
發現我地剛剛錯過咗Maksim喺倫敦開既concert!!
當時真係好想喊~~~~~

多年來Maksim一直集中喺亞洲或東歐各地巡迴開show，
中國、日本、韓國、新加坡、台灣......偏偏等極都唔來英國!

光陰似箭~~~~~
自2007年起，等咗6年..........終於比我等到嘞!!!!!!!!

今年9月尾Maksim將會喺倫敦開show!
由於只開一千零一場，
我上星期一從官網上得知消息門票會星期五佛誕當日發售，
心情興奮又緊張!
興奮...終於有機會一圓依個等咗10年既心願;
緊張...好怕買唔到飛.......第一時間Whatsapp Mr.T!

星期四晚Mr.T較定鬧鐘，
第二朝晨早屹起身上網撲飛，
多謝哂親愛既Mr.T~~~~
因為我敢寫包單 - 除咗Mr.T之外，
唔會有人肯陪我比錢睇人彈鋼琴! 仲要山長水遠去倫敦!!
因為朋友們都無乜音樂細胞，唔識欣賞好野!!!
我敢再寫包單 - 就算Mr.T完全無興趣，佢都一定會陪我~
(You're the best my darling hon! )


收到booking confirmation email確認後，
興奮地去Maksim官方facebook留咗個回應，
讓一眾完全唔識我既Maksim fans知道我已經買咗飛!

4分鐘後Maksim竟然回應同我講"Thanks!"喎!! 飄飄然~~~
(OK...OK...I know~ I know!
唔係Maksim本人回應嘛! 其實係佢既agent嘛!! )

Anyway我真係好好好開心，
10年後終於有機會再見到Maksim，
仲可以現場聽到佢既音樂!
Can't wait!! 9月23日倫敦見~

P.S. 我要唸定9月23日著咩衫!