Mr.T weekend大顯身手! (2013年5月11日 + 12日附食譜)

雖然蘇格蘭已踏入初夏，但天氣仍然非常唔穩定.......
過去連續2個Sunday都落狗屎，
早幾日仲連續兩日落雹，
攪到我有野要買但都完全唔想出街!

無得出街，唯有同Mr.T齊齊喺屋企hea吓睇吓戲，
不過都要食野，Mr.T就提議由佢整野比我食......
 

5月11日: 午餐肉奄列

有人懶浪漫唧咗個茄汁心心喺奄列上面，
不過手勢唔好變咗兩個茄汁籮柚!

奄列，一樣看似好簡單既食物，
不過我永遠都整得唔好!
我可以整到外表好靚完全唔燶，但內裡會太乾;
不過內裡唔乾的話，又會唔夠熟......
而Mr.T整既奄列熟得來唔會乾，軟綿綿~~~
總之我點整都唔夠Mr.T整得好食啦!! 

可能最近整馬卡龍練習得多........
我連唧pat茄汁都唧得咁鬼圓! 哈哈~~~

5月12日: 水波蛋雜菌威爾特郡火腿法國牛油吐司

Mr.T好似煮野食煮開有條癮!
是日一早上網搵食譜，話要再整比我食喎~
話時話Mr.T真係好有潛質........

水波蛋我之前整過幾次都唔成功，
Mr.T今次第一次整就已經整得咁鬼靚! 我輸了........

依份brunch Mr.T親手煮，賣相靚不特止，
除咗甜，仲真係好好味~~~~
我老公真係叻既啫!

水波蛋雜菌威爾特郡火腿法國牛油吐司食譜click here~


Mr.T煮咗午餐比我食，我煮返晚餐比佢食~

三餸無湯: 冬菇蟲草花蒸滑雞; 雜菌蒸水蛋; 清炒菜花

冬菇蟲草花蒸滑雞食譜click here~

依個Mr.T鍾意食又好送飯! 所以唸唔到煮乜就煮佢~
雜菌蒸水蛋食譜click here~


Mr.T煮既水波蛋實在太靚~ 而且份brunch亦太好食! 於是第二日我決定翻一翻........

無菇版......因為食哂d菇~
之前我試過整水波蛋幾次都失敗，
今次睇完Mr.T點整之後，我依兩隻都幾見得人吖!

yum~~~~~

我好鍾意食brioche，
因為brioche本身已經用咗好多牛油去整，
所以我一向都唔會搽牛油亦唔會烘~

今次Mr.T整依個brunch，
我先發現brioche搽牛油再烘成吐司原來好食得咁交關!!!

攪到最近我日日下午茶都整兩個搽大pat牛油 + 烘過既brioche buns，
另加杯我至愛既Earl Grey.......
唔知我會唔會好快變肥師奶呢?